ސާފް ޗެމްޕިއަންޝިޕް ބާއްވަން ލިބުނު ވަގުތަކީ މުނާސަބު ވަގުތެއް: ބައްސާމް

މި އަހަރުގެ ސާފް ޗެމްޕިއަންޝިޕް ރާއްޖޭގައި ބާއްވަން ލިބުނު ވަގުތަކީ މުނާސަބު ވަގުތެއް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މި އަހަރުގެ ސާފް ޗެމްޕިއަންޝިޕް އޮންނާނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. މި މުބާރާތުގެ ބިޑް ރާއްޖޭން ކާމިޔާބުކޮށްފައިވަނީ ނޭޕާލާ ވާދަކުރުމަށްފަހުއެވެ.

ސާފް ޗެމްޕިއަންޝިޕުގެ ކެމްޕެއިން ފެށުމަށް ގައުމީ ފުޓްބޯޅަ ދަނޑުގައި އާދީއްތަ ދުވަހުގެރޭ ބޭއްވި ރަސްމިއްޔާތުގައި ވާހަކަ ދައްކަވަމުން ބައްސާމް ވިދާޅުވީ ރާއްޖޭން ސާފް ޗެމްޕިއަންޝިޕް ބޭއްވުމަށް ބިޑް ކާމިޔާބުކުރުމާއެކު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ކުޅިވަރާ ބެހޭ ވަޒީރު އަޙްމަދު މަޚްލޫފް ވަރަށް ބޮޑު އެއްބާރުލުން ދެއްވި ކަމަށެވެ. އަދި މި ބިޑް ކާމިޔާބުކުރެވުނީ އެންމެން އެކުގައި ގުޅިގެން ކުރި މަސައްކަތުން ކަމަށް ބައްސާމް ވިދާޅުވިއެވެ.

ބައްސާމް ވިދާޅުވީ މި ފަހަރުގެ ސާފް ޗެމްޕިއަންޝިޕް ބާއްވަން ލިބުނު ވަގުތަކީ މުނާސަބު ވަގުތެއް ކަމަށެވެ. އެގޮތުން ގާތްގަނޑަކަށް ދޮޅު އަހަރު ދިވެހި ރައްޔިތުން ވަރަށް އުނދަގޫ ދަތި ހާލުގައި ތަހަންމަލު ކޮށްފައިވާ ކަމަށާއި، ކުރިއަށް ފިޔަވަޅުތަކެއް އަޅާއިރު ރާއްޖޭގައި ސާފް ޗެމްޕިއަންޝިޕް ބޭއްވުމަކީ ދިވެހި ސަޕޯޓަރުންނަށް އުފާވެރިކަން ގެނުވާނެ ކަމެއް ކަމަށްވެސް ވިދާޅުވިއެވެ.

ބައްސާމް އިތުރަށް ވިދާޅުވީ ސާފް ޗެމްޕިއަންޝިޕަށް ސަޕޯޓަރުން ވެއްދުމަށް ކުރަންހުރި މަސައްކަތް އެފްއޭއެމުން ކުރަމުން އަންނަ ކަމަށާއި، އެހެންކަމުން ވެކްސިންގެ ދެ ޑޯޒް ފުރިހަމަނުކޮށް ތިބި މީހުން އަވަހަށް ވެކްސިންގެ ދެ ޑޯޒް ފުރިހަމަކުރުމަށް އިލްތިމާސްކުރާ ކަމަށެވެ. އަދި ސާފް ޗެމްޕިއަންޝިޕާއެކު ރާއްޖޭގެ އިގުތިސޯދު ބިނާވެފައިވާ ފަތުރުވެރިކަމަށްވެސް އޭގެ ސަބަބުން މަންފާތަކެއް ކުރާނެ ކަމަށާއި، އެގޮތުން ފުޓްބޯޅައިގެ ޒަރިއްޔާއިން ފަތުރުވެރިކަން ޕްރޮމޯޓުކުރެވިގެންދާނެ ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.

އަދި ވިދާޅުވީ ފުޓްބޯޅައިން ރާއްޖޭން ހޯދި ހުރިހާ ކާމިޔާބީއެއްގެ ފަހަތުގައި 12 ވަނަ ކުޅުންތެރިޔާގެ ކަމަށްވާ ދިވެހި ސަޕޯޓަރުންގެ ހިއްސާވާ ކަމަށާއި، އެހެންކަމުން މިފެށުނު ކެމްޕެއިނާއެކު އުއްމީދަކީ ގައުމީ ރޫހުގައި އެއްބައިވަންތަކަން މަތީ ދިވެހި ޓީމަށް ސަޕޯޓުކުރުމުގައި އެންމެން ތިބުން ކަމަށްވެސް ބައްސާމް ވިދާޅުވިއެވެ.

އަންނަ އޮކްޓޯބަރު މަހުގެ އެއްވަނަ ދުވަހު ސާފް ޗެމްޕިއަންޝިޕް ފަށާއިރު، މި މުބާރާތުގެ މެޗުތައް ކުރިއަށްގެންދާނީ ސަޕޯޓަރުން ދަނޑަށް ވައްދައިގެންނެވެ. މި އަހަރުގެ މުބާރާތަށް ރާއްޖެއިން ނުކުންނައިރު، އެންމެ ފަހުން 2018 ވަނަ އަހަރު ބޭއްވި ސާފް ޗެމްޕިއަންޝިޕް ރާއްޖެއިން ވަނީ ކާމިޔާބުކޮށްފައެވެ. މި މުބާރާތް ރާއްޖެއިން އެންމެ ފުރަތަމަ ކާމިޔާބުކުރީ 2008 ވަނަ އަހަރުގައެވެ. އެ އަހަރުގެ މުބާރާތް ބާއްވާފައިވަނީ ރާއްޖޭގެ އިތުރުން އަވައްޓެރި ސްރީ ލަންކާއާ ގުޅިގެންނެވެ.