ރާއްޖެ ގެންނަ ބިދޭސީންނާ ގުޅޭގޮތުން އިކޮނޮމިކް މިނިސްޓަރ ފައްޔާޒު އިސްމާޢީލާ, ހޯމަ ދުވަހު އޮންނަ ރައްޔިތުންގެ މަޖިލީހުގެ ޖަލްސާގައި ސުވާލުކުރުމަށް އެޖެންޑާކޮށްފިއެވެ.

އިކޮނޮމިކް މިނިސްޓަރާ ސުވާލުކުރައްވަނީ މެދު ހެންވޭރު ދާއިރާގެ މެމްބަރ ޢަލީ ޢާޒިމެވެ. އިކޮނޮމިކް މިނިސްޓަރާ އޭނާ މައިގަނޑު ދެ ސުވާލެއް ކުރެއްވުމަށް ވަނީ ހުށަހަޅުއްވާފައެވެ.

ފުރަތަމަ ސުވާލަކީ މިވަގުތު ދިވެހިރާއްޖޭގައި ކިތައް ބިދޭސީން ގަވާއިދުންނާއި ނުގަވާއިދުން މަސައްކަތްކުރަމުންދޭތޯއެވެ. ދެވަނަ ސުވާލަކީ ބަންގްލަދޭޝްގެ ކިތައް މީހުން ރާއްޖޭގައި މަސައްކަތް ކުރަމުންދޭތޯއެވެ.

ދާދިފަހުން ރ އަލިފުށީގައި ޖޮބް ސެންޓަރު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ ރާއްޖޭގައި ގަވާއިދާ ޚިލާފަށް އުޅޭ ބިދޭސީން އަނބުރާ ގައުމަށް ފޮނުވާލުމަށް ކުރަމުންދާ މަސައްކަތުގެ ދަށުން މިހާތަނަށް 24،000 ބިދޭސީން އަނބުރާ ގައުމަށް ފޮނުވާލާފައިވާކަމަށެވެ. މިނިސްޓަރ ވިދާޅުވީ ޑޮކިޔުމެންޓްނެތް މީހުންގެ ތެރެއިން އަމިއްލައަށް އެދިގެން 10،000 މީހުން ގައުމަށް ފޮނުވާލާފައިވާކަމަށެވެ.

ހޯމަ ދުވަހުގެ ޖަލްސާގައި ސުވާލުގެ އިތުރުން ނުނިމިހުރި މަސައްކަތުގެ ދަށުން ދެ ބިލަކަށް ބަހުސްކުރުމަށް ވަނީ ހަމަޖެހިފައެވެ. އަދި ކޮމިޓީތަކުން ދެ ރިޕޯޓެއް ހުށަހެޅުމަށް ވަނީ އެޖެންޑާކޮށްފައެވެ.