އަންނަ އޮކްޓޯބަރު މަހުގެ އެއްވަނަ ދުވަހު ރާއްޖޭގައި ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގެ މެޗުތައް ކުރިއަށްގެންދާނީ ސަޕޯޓަރުން ވައްދައިގެންކަން "ރާއްޖެ.އެމްވީ" އަށް ކަށަވަރުވެއްޖެއެވެ.

"ރާއްޖެ.އެމްވީ" އަށް މައުލޫމާތުދެއްވަމުން ކުޅިވަރާ ބެހޭ ވުޒާރާގެ އޮފިޝަލަކު ވިދާޅުވީ ސާފް ޗެމްޕިއަންޝިޕުގެ މެޗުތައް ބަލަން ގައުމީ ފުޓްބޯޅަ ދަނޑަށް ސަޕޯޓަރުން ވެއްދުމުގެ ހުއްދަ މިހާރު ލިބިފައިވާ ކަމަށެވެ. އެއާއެކު ދަނޑުގެ މަރާމާތުގެ މަސައްކަތް މިހާރު ކުރަމުން އަންނަ ކަމަށްވެސް ވިދާޅުވިއެވެ.

ކުޅިވަރާ ބެހޭ ވުޒާރާގެ އޮފިޝަލް ވިދާޅުވީ މިހާރު މީހުން ވެއްދުން މަނާކޮށްފައިވާ ދެކުނު ފަރާތް (ސަހާރާ ފަޅި) ގެ ސިޑިބަރީގެ ތިރީ ބަޔަށް ސަޕޯޓަރުން ވައްދަން ހަމަޖެހިފައިވާ ކަމަށާއި، އެގޮތުން އެ ސިޑިބަރީގެ އަޑިން ޖުންގު ޖަހަން ނިންމާފައިވާ ކަމަށެވެ. އަދި ސަޕޯޓަރުން ވެއްދުމުގެ ކުރިން އިންޖިނިއަރުން އައިސް، ސިޑިބަރި ބޭނުން ކުރެވޭނެތޯ ޗެކުކުރާނެ ކަމަށްވެސް ވިދާޅުވިއެވެ.

ގައުމީ ފުޓްބޯޅަ ދަނޑުގެ ސަހަރާއާވީ ފަޅީގެ ސިޑިބަރީގެ ތިރީ ބަޔަށް ސަޕޯޓަރުން ވައްދަން މަސައްކަތްކުރަމުން އަންނައިރު، ސަހާރާ ފަޅި އާއި އިރުމަތީ ފަރާތުގެ (ބޮޑުގޭޓު ފަޅި) ބޭނުންކުރުން ރައްކާތެރި ނޫން ކަމަށް ޕްލޭނިން މިނިސްޓްރީން އަންގާފައިވާތީ، 2019 ވަނަ އަހަރު އެތަން ވަނީ ބަންދުކޮށްފައެވެ. އެއާއެކު ބައިނަލްއަގުވާމީ މެޗުތައް ކުޅެފައިވަނީވެސް މަދު އަދަދެއްގެ ޓިކެޓު ވިއްކައިގެންނެވެ. އަދި ދަނޑުގެ އެންމެ ބޮޑު ސިޑިބަރި ބޭނުންކުރަން ހުއްޓާލަން ޖެހުނީ، ދަނޑުގެ ހުރިހާ ސިޑިބަރިއެއްގައި ގޮނޑި ޖަހާފައިވަނިކޮށެވެ.

މި އަހަރުގެ ސާފް ޗެމްޕިއަންޝިޕް އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ބޭއްވާއިރު، ސާފް ޗެމްޕިއަންޝިޕާ ގުޅޭ ގޮތުން ރާއްޖޭގައި ރަސްމީކޮށް ކުރިއަށް ގެންދިޔުމަށް ހަމަޖެހިފައިވާ ކެމްޕެއިން އިފުތިތާހުކުރުން އާދީއްތަ ދުވަހުގެރޭ ގައުމީ ފުޓްބޯޅަ ދަނޑުގައި އޮންނާނެއެވެ.

މި ފަހަރުގެ ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެ ހަވީރު ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ. މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕް މި އަހަރު ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.