އައްޑޫ ފްލައިންގ ސްކޫލްގައި ކިޔަމުންދާ ދަރިވަރުންގެ ޝަކުވާތަކާއި ކަންބޮޑުވުންތައް އެވިޑް ކޮލެޖާ ހިއްސާ ކުރުމުން އެދެވޭ ހައްލެއް ނުލިބުނު ކަމަށް ދަރިވަރުން ބުނެފިއެވެ.
ގާތްގަނޑަކަށް ވިއްސަކަށް ދަރިވަރުން ހިމެނޭ ގޮތަށް އެވިޑް ކޮލެޖްގެ އިސްވެރިންނާ ބައްދަލުކުރީ އެ ކޮލެޖުން، އޭ.އޭ.އޭ މެނޭޖްކުރުމަށް ސޭލްސް ޕަރޗޭސް އެގްރީމެންޓެއް ހަދައި، އެ އެއްބަސްވުމުގެ ދަށުން އައްޑޫ ފްލައިންގ ސްކޫލު ހިންގުމާ ހަވާލުވާން މަސައްކަތްކުރަމުން ދަނިކޮށެވެ. އެގްރިމެންޓެއް ހެދި ނަމަވެސް އެވިޑް ސްކޫލް އޮފް އޭވިއޭޝަންގެ ފެކަލްޓީގެ ނަމުގައި އެވިޑް ކޮލެޖުން ހިންގަން ނިންމާފައިވާ އައްޑޫ ފްލައިންގ ސްކޫލްގެ އެއްވެސް ކަހަލަ ލައިސެންސްއެއް ހޯދުމަށް އެ ކޮލެޖުން މިހާތަނަށް ސަރުކާރުގެ ރަސްމީ އިދާރާއެއްގައި އެދިފައެއް ނުވެއެވެ.
ދަރިވަރުން ބުނީ، އެވިޑް ކޮލެޖުގެ ޗެއަރމަން ޢަބްދުﷲ މުޝްތާޤް ރަޝާދު ދަރިވަރުންނާ ބައްދަލުކޮށް އެ ދަރިވަރުންގެ ހުރި ގިނަ ކަންބޮޑުވުންތަކާ ގުޅޭގޮތުން ވާހަކަ ދެއްކެވި ނަމަވެސް އެ ކަންބޮޑުވުންތަކަށް އެއްވެސް ކަހަލަ ހައްލެއް ލިބުމުގެ ކޮޅުމައްޗެއް އަދި ނެތް ކަމަށާއި ދަރިވަރުން އުފުލި ޝަކުވާތަކަށް އެވިޑް ކޮލެޖުގެ ފަރާތުން އެދެވޭ އެއްވެސް ޖަވާބެއް ނުލިބުނު ކަމަށެވެ.
އަދި ދަރިވަރުން ކުރި ސުވާލުތަކަށް ޖަވާބު ނުދެވުނުކަން ވެސް ދަރިވަރުން ފާހަގަކުރިއެވެ. ދަރިވަރުން ވަނީ އެ ކުދިން ކިޔެވުމަށްޓަކައި އޭ.އޭ.އޭ.އަށް ދައްކާފައިވާ ފައިސާގެ ރީފަންޑް ލިބޭނޭ ގޮތެއް ހަމަޖައްސައިދިނުމަށް ވެސް އެދިފައެވެ. ފައިސާ ލިބޭނެތޯ ދަރިވަރުން ކުރި ސުވާލުގެ ޖަވާބުގައި މުޝްތާޤް ވިދާޅުވެފައިވަނީ ދަރިވަރުން ވަކިވަކިން ރިފަންޑަން އެދުމުން އެ ލިބޭނެ ގޮތެއް އޮތްތޯ ބަލައި ދޭނެ ކަމަށާއި، އެހާ ހިސާބު އެ ދަރިވަރެއްގެ ކޯސް ޑްރޮޕް ކޮށްލަން ޖެހޭނެ ކަމަށެވެ. ދަރިވަރުން ބުނީ، މިހާތަނަށް އޭ.އޭ.އޭ.އަށް ފައިސާ ދައްކައިގެން ކިޔެވުން ފުރިހަމަ ނުވެ މިދިޔަ ދުވަސްތަކަށް ބަދަލު ދޭން ޖެހޭނެ ކަމަށެވެ. އަދި ރީފަންޑުގެ މައްސަލައިގައި ދަރިވަރުން އެވިޑް ކޮލެޖަށް އީމެއިލް ކުރުމަށްވެސް އެދުނެވެ.
މީގެ އިތުރުން ވެސް އެވިޑް ކޮލެޖުން އޭ.އޭ.އޭ.އާ ހަވާލުވުމަށްފަހު ދަރިވަރުންނަށް މޮކް އިމްތިހާނެއް ހަދަން ދޭން އުޅުމުން އެކަމުގެ ކަންބޮޑުވުން ވެސް ދަރިވަރުން ހިއްސާކުރިއެވެ. އަދި އައްޑޫގައި ސްކޫލް ހިންގޭނެ ފުރުސަތެއް ނެތް ކަމަށާއި އެތަނުގައި ކުދިންގެ ކޯސް ނިންމަން ބޭނުންވާ މަތިންދާބޯޓެއް ނެތްކަމުގެ ޝަކުވާ ވެސް ދަރިވަރުން ވަނީ އުފުލައިފައެވެ.
މުޝްތާޤް ވިދާޅުވެފައިވަނީ، އައްޑޫ އިންޓަރނޭޝަނަލް އެއަރޕޯޓުން ފްލައިންގ ސްކޫލް ހިންގަމުން އައި ތަން ހުސްކުރުމަށް އަންގާފައި ނުވާ ކަމަށެވެ. އެހެންނަމަވެސް ރާއްޖެއެމްވީއަށް މައުލޫމާތު ދެމުން ބުނީ، އެވިޑާއެކު ރަސްމީ މަޝްވަރާތަކެއް ކޮށްފައި ނުވާ ކަމަށާއި، ނުރަސްމީ ވާހަކަތަކުގެ ތެރެއިންވެސް ދެން އިތުރު މުއްދަތެއް ދެވެން ނެތްކަމަށް އަންގާފައިވާނެ ކަމަށެވެ.
އެވިޑް ކޮލެޖުން އައްޑޫ ނޫން އެހެން ތަނެއްގައި ފްލައިންގ ސްކޫލު ހިންގަން ވިސްނާ ކަމަށްވެސް މި ބައްދަލުވުމުގައި މުޝްތާގް ފާހަގަކުރެއްވިއެވެ. އެވިޑް ކޮލެޖުން މިހާރު ތިބީ ސަރުކާރުން އެ މަސައްކަތް ކުރިޔަށް ގެންދިޔުމަށް އިޝާރާތެއް ކުރަންދެން ކަމަށް ވެސް ވިދާޅުވިއެވެ.
އައްޑޫ ފްލައިންގ ސްކޫލްގެ އޮޑިޓެއް މިހާރު ކުރިއަށްދާއިރު ސެޕްޓެމްބަރުގައި ނިމޭނެ ކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.
އޮޑިޓް އޮފީހުން ބުނެފައިވަނީ މިހާރު ކުރިއަށްދަނީ އެންމެ ފަހުގެ އިވެލުއޭޝަން މަސައްކަތް ކަމަށާއި، ރިޕޯޓް ސެޕްޓެމްބަރު މަހު އާންމު ކުރާނެ ކަމަށެވެ. އޭޭ.އޭ.އޭ.ގެ އޮޑިޓް ފަށާފައިވަނީ މެއި މަހުގެ 16ވަނަ ދުވަހުއެވެ. އޮޑިޓް ނިންމުމަށް ޖޫން މަހުގެ 16ވަނަ ދުވަސް ކަނޑައަޅާފައިވީ ނަމަވެސް އެ މުއްދަތުގެ ތެރޭގައި އޮޑިޓްގެ މަސައްކަތްތައް ނުނިމެއެވެ.
ރައީސް އޮފީހުން ބުނީ، އޮޑިޓް ނިމުމުން ރެކޮމެންޑޭޝަނަށް ބަލައި އިތުރު ފިޔަވަޅުތައް އެޅުމަށް ނިންމާފައިވާ ކަމަށެވެ.
އެވިޑްގެ ދަށުން އައްޑޫ ފްލައިންގ ސްކޫލް ހިންގުމަށް ސިވިލް އޭވިއޭޝަން ގަވާއިދުގެ ތެރެއިން ހުއްދަ ހޯދުމަށް އެވިޑް ކޮލެޖަށް އަންގާފައިވާނެކަމަށް ރައީސް އޮފީހުންވަނީ ބުނެފައެވެ. ރައީސް އޮފީހުން ބުނީ، އެވިޑް ކޮލެޖާއެކު މަޝްވަރާތަކެއް ކުރިއަށްދާ ކަމަށާއި، އޭ.އޭ.އޭ.ގެ އެކައުންޓަބަލް މެނޭޖަރ އަކްބަރު ޖީވަންޖީ ބަދަލުކުރުމަށް ޖޫން މަހުގެ ތެރޭގައި އަންގާފައިވާނެ ކަމަށެވެ. އެހެންނަމަވެސް ސިވިލް އޭވިއޭޝަން ގަވާއިދުގެ ތެރެއިން ފުރިހަމަ ކުރަންޖެހޭ ކަންކަން ފުރިހަމަ ކޮށްފައި ނުވާތީ އޭނާ ބަދަލުކުރުން މަޑުޖައްސާލާފައިވާ ކަމަށެވެ.
ސަރުކާރުން މޯލްޑިވިއަންގެ ފްލައިންގ ސްކޫލް ގާއިމުކުރުމުގެ މަސައްކަތް ވަރަށް ބާރަށް ކުރިއަށްދާ ކަމަށާއި، އެކަމާގުޅޭ ލިޔެކިޔުންތައް ކަމާބެހޭ ފަރާތްތަކާ ހިއްސާ ކޮށްފައިވާކަމަށް ރައީސް އޮފީހުން މައުލޫމާތު ދެއެވެ.
ފްލައިންގ ސްކޫލް ހިންގުމަށް އޭޝިއަން އެކަޑަމީ އޮފް އެއިރޮނޮޓިކްސްއަށް ގަން އިންޓަރނޭޝަނަލް އެއަރޕޯޓުން ދީފައިވާ ބިމުގެ އެގްރީމެންޓް މުއްދަތު ހަމަވެ މިހާރު އެތަން ހުސްކުރަން ވަނީ އަންގާފައެވެ. އެ އެއްބަސްވުން އައު ނުކޮށްދޭން އައްޑޫ އިންޓަރނޭޝަނަލް އެއަރޕޯޓް ކޮމްޕެނީން ވަނީ ނިންމާފައެވެ.
އައްޑޫ ފްލައިންގ ސްކޫލްގައި ކިޔަވާ ދަރިވަރުންގެ ކިޔެވުން ހުއްޓި، ލިބުނު ގެއްލުމުގެ ބަދަލު ހޯދަން އެ ދަރިވަރުން ސިވިލް ކޯޓަށް ހުށަހަޅާފައިވާ މައްސަލަ ވެސް މިހާރު ކުރިއަށްދެއެވެ.
ބަދަލު ހޯދަން ހުށަހެޅީ އެ ސްކޫލުގައި ކިޔަވަމުންދާ 48 ދަރިވަރެކެވެ. މައްސަލައިގެ ފުރަތަމަ އަޑު އެހުމަށްފަހު އިތުރު އަޑު އެހުމެއް ބާއްވާފައެއް ނުވެއެވެ.
