އައްޑޫ ފްލައިން ސްކޫލް އެވިޑްގެ ދަށުން ހިންގުމަށް ސިވިލް އޭވިއޭޝަން ގަވާއިދުގެ ތެރެއިން ހުއްދަ ހޯދުމަށް އެވިޑް ކޮލެޖަށް އަންގާފައިވާނެކަމަށް ރައީސް އޮފީހުން ބުނެފިއެވެ.

ރައީސް އޮފީހުން ބުނީ، އެވިޑް ކޮލެޖާއެކު މަޝްވަރާތަކެއް ކުރިއަށްދާ ކަމަށާއި، އޭއޭއޭގެ އެކައުންޓަބަލް މެނޭޖަރ، އަކްބަރު ޖީވަންޖީ ބަދަލުކުރުމަށް ޖޫން މަހުގެ ތެރޭގައި އަންގާފައިވާނެ ކަމަށެވެ. އެހެންނަމަވެސް ސިވިލް އޭވިއޭޝަން ގަވާއިދުގެ ތެރެއިން ފުރިހަމަ ކުރަންޖެހޭ ކަންކަން ފުރިހަމަ ކޮށްފައި ނުވާތީ، އޭނާ ބަދަލުކުރުން މަޑުޖައްސާލާފައިވާ ކަމަށެވެ.

ފްލައިން ސްކޫލްގައި ކިޔަވަމުންދާ ދަރިވަރުންގެ ހައްގު ހޯދުމަށް ފިޔަވަޅުތަކެއް އަޅުއްވަން މެއި މަހުގެ ތެރޭގައި ރައީސުލް ޖުމްހޫރިއްޔާ އިބްރާހީމް މުހައްމަދު ޞާލިޙް ނިންމަވައި އެކަން އިއުލާން ކުރެއްވިއެވެ. އޭގެތެރޭގައި އޭއޭއޭގެ އޮޑިޓެއް ހެދުން ވެސް ހިމެނެއެވެ. ރައީސް އޮފީހުން ބުނީ މެއި މަހުގެ 16 ވަނަ ދުވަހު އޮޑިޓް ކުރުމުގެ މަސައްކަތް އޮޑިޓަރ ޖެނެރަލްގެ އޮފީހުން ފަށާފައިވާ ކަމަށެވެ. ޖޫން 16ގެ ނިޔަލަށް އޮޑިޓް ނިންމަން ކަނޑައަޅާފައި އޮތް ނަަމަވެސް އޮޑިޓްގެ މަސައްކަތް ނުނިމޭ ކަމަށާއި، އަދިވެސް އެ މަސައްކަތް ކުރަމުން އަންނަ ކަމަށް ރައީސް އޮފީހުން މައުލޫމާތުދެއެވެ. އޮޑިޓް ނިމުމުން ރެކޮމެންޑޭޝަނަށް ބަލައި އިތުރު ފިޔަވަޅުތައް އެޅުމަށް ނިންމާފައިވާ ކަމަށެވެ.

ސަރުކާރުން މޯލްޑިވިއަންގެ ފްލައިން ސްކޫލް ގާއިމުކުރުމުގެ މަސައްކަތް ވަރަށް ބާރަށް ކުރިއަށްދާ ކަމަށާއި، އެކަމާ ގުޅޭ ލިޔެކިޔުންތައް ކަމާބެހޭ ފަރާތްތަކާ ހިއްސާ ކޮށްފައިވާކަމަށް ރައީސް އޮފީން މައުލޫމާތު ދެއެވެ.

ފްލައިން ސްކޫލް ހިންގުމަށް އޭޝިއަން އެކެޑަމީ އޮފް އެއިރޮނޮޓިކްސްއަށް ގަން އިންޓަރނޭޝަނަލް އެއަރޕޯޓުން ދީފައިވާ ބިމުގެ އެގްރީމެންޓް މުއްދަތު ހަމަވެ މިހާރު އެތަން ހުސްކުރަން ވަނީ އަންގާފައެވެ. އެ އެއްބަސްވުން އައު ނުކޮށްދޭން އައްޑޫ އިންޓަރނޭޝަނަލް އެއަރޕޯޓް ކޮމްޕެނީން ވަނީ ނިންމާފައެވެ.

އައްޑޫ ފްލައިންގ ސްކޫލްގައި ކިޔަވާ ދަރިވަރުންގެ ކިޔެވުން ހުއްޓި، ލިބުނު ގެއްލުމުގެ ބަދަލު ހޯދަން އެ ދަރިވަރުން ސިވިލް ކޯޓަށް ހުށަހަޅާފައިވާ މައްސަލަ ވެސް މިހާރު ކުރިއަށްދެއެވެ.

ބަދަލު ހޯދަން ހުށަހެޅީ އެ ސްކޫލުގައި ކިޔަވަމުންދާ 48 ދަރިވަރެކެވެ.