އޭއޭއޭގެ މައްސަލަ ހައްލު ނުވާނެކަން ޔަގީންވެ އެވިޑުން އަމާން ދީފި

އެވިޑުން އޭއޭއޭ އާއެކު ހަދާފައިވާ އެއްބަސްވުން އުވާލަން ނިންމައިފިއެވެ.

އެވިޑްގެ މެނޭޖްމެންޓުން ދައިވަރުންނާއެކު ކުރިއަށް ގެންދިޔަ ބައްދަލުވުމުގައި އެކަން ދަރިވަރުންނާ ހިއްސާ ކުރަކުރަމުން އެވިޑް ކޮލެޖުގެ ޗެއާމަން އަބްދުﷲ މުޝާތާގު ރަޝާދު ވިދާޅުވީ އެ ކޮލެޖަށް އެއްބަސްވުން އުވާލަން ޖެހުނީ ސަރުކާރުގެ ބައެއް އިދާރާތަކުން އެއްބާރުލުން ނުލިބުމުގެ ސަބަބުން، ޕްލޭނާ އެއްގޮތަށް ކަންކަން ކުރިއަށް ނުގެންދެވިދާނެތީ ކަމަށެވެ.

ކިޔެވުން ކުރިއަށްގެންދެވޭތޯ ވަރަށް މަސައްކަތްކުރި ކަމަށާއި އެކަމަށް ދެ މަސް ދުވަހުގެ ތެރޭގައި މިލިއަނުން ރުފިޔާ ޚަރަދުކުރި ކަމަށް ވެސް އޭނާ ވިދާޅުވިއެވެ. 

އެބައްދަލުވުމުގައި ދަރިވަރުން ބުނީ ސަރުކާރުން ކަންތައް ކޮށްނުދެނީ ކަމަށް ބުނެ އެވިޑުން ދައްކަނީ ރަނގަޅު ވާކައެއް ނޫން ކަމަށެވެ. އެވިޑުން އެ މައްސަލަ ހައްލު ކުރުމަށް އެއްވެސް މަސައްކަތެއް ކޮށްފައި ނުވާ ކަމަށެވެ.

އެބައްދަލުވުމުގައި ބައިވެރިވި ދަރިވަރުން ބުނީ އެވިޑުން މަސައްކަތްކުރީ ދަރިވަރުންނަށް އޮޅުވާލަން ކަމަށެވެ. އަދި ބައެއް ދަރިވަރުންގެ ކެރިއަރ ބަންދު ކުރުމުގެ މަސައްކަތްވެސް ކުރިކަން ސާބިތުވާ ކަމަށެވެ. އެގޮތުން ފުރަތަމަ ބައްދަލުވުން ނިންމާލުމަށްފަހު ވަކި ދަރިވަރަކަށް ނިސްބަތްކޮށް އެއީ އެއްވެސް ޑިސިޕްލިންއެއް ނެތް ދަތިވަރެއްކަން އެެއަރލައިންތަކާ ހިއްސާކުރާކަމަށް ބުނެފައިވާ ކަމަށެެވެ. އެވާހަކަ ހޮނިހިރު ދުވަހު އޮތް ބައްދަލުވުމުގައި ހިއްސާކުރުމުން އެހެން ވިދާޅުނުވާ ކަމަށް ބުނެ އޮންލައިންކޮށް ބައިވެރިވި ދަތިވަރުންގެ ލައިން ޑިސްކަނެކްޓް ކޮށްލާފައިވާ ކަމަށެވެ.

އެއްވެސް ދަރިވަރަކާ ޒާތީ ނުވާނެ ކަމަށް ބުނެ މި ގޮތަށް އިންޒާރު ދިނުން ބަލައި ނުގަނެވޭ ކަމަށް ރާއްޖެއެމްވީއަށް މައުލޫމާތު ދެމުން ދަރިވަރުން ވަނީ ބުނެފައެވެ.

އޭއޭއޭގެ ހާލަތު ގޯސްވެ ދަރިވަރުންގެ ކިޔެވުން ހުއްޓިފައިވަނިކޮށް އެ ތަނުގެ ހިންގުމާ އެވިޑުން ހަވާލުވީ ޖޫން މަހުއެވެ. އޭގެ ފަހުން، ފްލައިން ސްކޫލުގެ ކަންކަން ބަލަހައްޓަމުން އައީ އެވިޑް ސްކޫލް އޮފް އޭވިއޭޝަން (އަސާ) ގެ ނަމުގައި އުފައްދާފައިވާ ކުންފުންޏަކުންނެވެ.