ފްލައިން ސްކޫލުގެ ކިޔެވުން ފަށައިފި
ކްލާސްތަކުގެ ކިޔެވުން ކުރިއަށް ގެންގޮސްފައިވަނީ އޮންލައިންކޮށް
ފްލައިންގ ސްކޫލުގެ އޮންލައިން ޓްރެއިނިންގ ސެޝަންގެ ތެރެއިން
ފްލައިން ސްކޫލުގެ ކިޔެވުން ޖެނުއަރީ 10 ގައި ފަށައިފިއެވެ.
އައިލެންޑް އޭވިއޭޝަނުން ކޮށްފައިވާ ޓުވީޓެއްގައި ބުނެފައިވަނީ ފުރަތަމަ ކްލާސްތަކުގެ ކިޔެވުން ކުރިއަށް ގެންގޮސްފައިވަނީ އޮންލައިންކޮށް ކަމަށެވެ. އަދި މިއީ ސީއޭއޭ އެޕްރޫވްކޮށްފައިވާ ކޯހުގެ ދަށުން ފްލައިޓް ޓްރެއިނިން އޮންލައިންކޮށް ކިޔަވައިދޭ ފުރަތަމަ ފަހަރު ކަމަށް ވެސް އެކުންފުނިން ބުންޏެވެ. އައު ކުންފުންޏެއްގެ ދަށުން ފްލައިން ސްކޫލުގެ ކިޔެވުން ފަށާފައިވަނީ އައްޑޫގައި ހިންގި ފްލައިން ސްކޫލް ހުއްޓި އެތަނުގައި ކޯސް ހަދަމުން އަންނަ ދަރިވަރުންގެ ކިޔެވުން މެދުކެނޑިފައިވާތާ އެތަކެއް މަސްތަކެއް ވެފައިވަނިކޮށެވެ.
ރާއްޖެއެމްވީއަށް އައިލެންޑް އޭވިއޭޝަންގެ އޮފިޝަލެއް ވިދާޅުވީ، ރާއްޖޭގައި ފްލައިން ސްކޫލެއް ހިންގުމަށް، ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި އައިލެންޑް އޭވިއޭޝަން ގުޅިގެން އުފެއްދި ޖޮއިންޓް ވެންޗަރ ކުންފުންޏަށް މުއައްޒަފުން ނެގުމުގެ މަސައްކަތް ކުރިއަށްދާ ކަމަށެވެ. އެގޮތުން އިންޖިނިއަރިންގ 6 މުއައްޒަފުން، އެޑްމިންއަށާއި ފައިނޭންސްގެ ޑިމާޕްމެންޓަށް މުއައްޒަފުން ނަގާނެ ކަމަށެވެ. އަދި ޒިންމާދާރު ވެރިއެއް ނަގާނެ ކަމަށް ވެސް އޮފިޝަލް ވިދާޅުވިއެވެ. މުއައްޒަފުން ނަގަނީ މަދުންކަން ފާހަގަކުރައްވައި އޮފިޝަލް ވިދާޅުވީ، އައިލޭންޑް އޭވިއޭޝަންގައި މަސައްކަތްކުރާ މުއައްޒަފުންނާއި އެމްއެންޔޫގެ މުއައްޒަފުން ބޭނުންކުރާނެ ކަމަށެވެ.
އައްޑޫ ސިޓީގައި ގާއިމުކޮށްފައިވާ އޭޝިއަން އެކެޑަމީ އޮފް އެރޯނޯޓިކްސް (އޭއޭއޭ)ގައި ޕައިލެޓްކަން ކިޔަވަމުންދާ ދިވެހި ދަރިވަރުންނަށް ދިމާވެފައިވާ ގިނަ ދުވަސްވީ މައްސަލަތަކަށް ދާއިމީ ހައްލެއް ހޯދުމާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި އޭއޭއޭގައި ޕައިލެޓްކަން ކިޔަވަމުންދާ ދިވެހި ދަރިވަރުންނާއި ކަމާގުޅޭ އިދާރާތަކުގެ އިސްވެރިންނާއެކު އޭރު ބައްދަލުވުމެއް ވެސް ބޭއްވިއެވެ. މި ބައްދަލުވުމުގައި އޭއޭއޭގެ ދަރިވަރުން ވަނީ އެ ދަރިވަރުންނަށް ދިމާވެފައިވާ ކަންކަމަށް ހައްލު ހޯދުމަށް ހުރިހާ އިދާރާއަކަށް ދިޔަކަމަށާއި، ކުރެވެންހުރި ހުރިހާ މަސައްކަތެއް ކޮށްފައިވީ ނަމަވެސް އެއްވެސް އެދެވޭ ޖަވާބެއް ލިބިފައި ނުވާ ކަމަށް ބުނެފައެވެ. އެ ދަރިވަރުން ބުނީ ރީފަންޑް ނުލިބުމާއި، އަލުން ކިޔެވުން ފެށޭނެ ދުވަހެއް ނޭނގުމުގެ ސަބަބުން އެ ދަރިވަރުންނަށް ދިމާވަމުންދާ މާލީ، ނަފްސާނީ، އަދި ވަގުތުގެ ގޮތުން ދިމާވާ ދަތިތައް ވެސް އެބަހުރި ކަމަށެވެ.
އެކަމާ ގުޅޭގޮތުން ރައީސް ވަނީ ކުދިންނަށް ދިމާވެފައިވާ މާލީ ދަތިތައް ހައްލުކޮށްދެއްވުމަށް ޓޮޕްއަޕް ލޯން ތަކެއް ދިނުމާއި، މިކަމުގައި އިތުރަށް ކުރެވެން ހުރި ކަންތައްތަކަކީ ކޮބައިތޯ ބެއްލެވުމަށްފަހު އެކަންކަން ހައްލުކޮށްދެއްވާނެކަމުގައި ވިދާޅުވެފައެވެ. މީގެ ކުރިން ވެސް ސަރުކާރުން ވަނީ މި ކޯސް ހަދާ ދަރިވަރުންނަށް ލުޔެއް ދިނުމުގެ ގޮތުން ދަރިވަރުން އަނބުރާ ލޯނު ދައްކަންޖެހޭނީ ކޯސް ނިމޭ ތާރީޚުން ފެށިގެން 6 މަސްދުވަސް ފަހުންކަމުގައި ކަނޑައަޅައި، މި ކޯސް ފުރިހަމަކުރުމަށް ބައެއް ދަރިވަރުން ބޭންކް އޮފް މޯލްޑިވްސް މެދުވެރިކޮށް ނަގާފައިވާ "ކިޔަވާ" ލޯންތައް ހަޔަރ އެޑިއުކޭޝަން މިނިސްޓްރީގެ ދަށަށް ބަދަލުކޮށްފައެވެ. އައްޑޫ ފްލައިން ސްކޫލްގައި ކިޔަވާ ދަރިވަރުންގެ ކިޔެވުން ހުއްޓި، ލިބުނު ގެއްލުމުގެ ބަދަލު ހޯދަން އެ ދަރިވަރުން ސިވިލް ކޯޓަށް ހުށަހަޅާފައިވާ މައްސަލަ ވެސް މިހާރު ކުރިއަށްދެއެވެ.
