ފީފާ ވޯލްޑް ކަޕުގެ ޔޫރަޕް ކޮލިފައިންގައި ބުދަ ދުވަހުގެރޭ ލިތުއޭނިއާ ބަލިކޮށް އިޓަލީން ރިކޯޑު ދެމެހެއްޓިއިރު، ޕޮލެންޑާ އެއްވަރުވެ އިންގްލެންޑުގެ ރިކޯޑަށް ނިމުން އައިސްފިއެވެ.

އަމިއްލަ ގައުމުގައި ކުޅުނު މެޗުން އިޓަލީ މޮޅުވީ ލިތުއޭނިއާ އަތުން ފަސޭހަކަމާއެކު 5-0 ގެ ނަތީޖާއަކުންނެވެ.

މި މެޗުގެ ކުރިން ކޮލިފައިންގައި އާދީއްތަ ދުވަހުގެރޭ ކުޅުނު މެޗުން ސްވިޓްޒަލެންޑާ އެއްވަރުކޮށް އިޓަލީން ބައިނަލްއަގުވާމީ މެޗުތަކުގައި ޖެހިޖެހިގެން ބަލިނުވެ މީގެ ކުރިން ސްޕެއިނާއި ބްރެޒިލުން ހަދާފައިވާ ރިކޯޑު މުގުރާލާފައެވެ. ލިތުއޭނިއާ އަތުން ހޯދި މޮޅާއެކު އެންމެ ފަހުން ކުޅުނު 37 މެޗުންވެސް އިޓަލީ ބަލިވެފައެއް ނުވެއެވެ.

ބުދަ ދުވަހުގެރޭ ކުޅުނު މެޗުގައި އިޓަލީން މޮޅު ކުޅުމެއް ދެއްކިއިރު، މެޗުގެ 11 ވަނަ މިނެޓުގައި މޮއިސް ކީން ވަނީ އެ ގައުމަށް ލީޑު ނަގާދީފައެވެ. މިއީ ދާދި ފަހުން ޔުވެންޓަސްއާ އަލުން ގުޅުނު ކީން 2019 ވަނަ އަހަރަށްފަހު އިޓަލީއަށް ކާމިޔާބުކޮށްދިން ފުރަތަމަ ލަނޑެވެ. އަދި އޭގެ ތިން މިނެޓު ފަހުން ލިތުއޭނިއާ ކުޅުންތެރިއެއްގެ އަތުން ބައިކޮޅަށް ވަން ލަނޑާއެކު އިޓަލީން ވަނީ ލީޑު ފުޅާކޮށްފައެވެ.

މެޗުގެ 24 ވަނަ މިނެޓުގައި ޖިއަކޮމޯ ރަސްޕަޑޯރީ އިޓަލީގެ ތިންވަނަ ލަނޑު ޖަހައިދިންއިރު، އޭގެ ފަސް މިނެޓު ފަހުން ކީން ވަނީ އެ ގައުމުގެ ހަތަރުވަނަ ލަނޑު ކާމިޔާބުކޮށްދީފައެވެ. ދެން މި މެޗުގައި އިޓަލީން ކާމިޔާބުކުރި ފަސްވަނަ ލަނޑު ދެވަނަ ހާފުގައި ޖަހައިދިނީ ޖިއޮވާނީ ޑި ލޮރެންޒޯއެވެ.

މި މޮޅާއެކު ކޮލިފައިންގެ ގްރޫޕް ސީގެ އެއްވަނައިގައި އިޓަލީ އޮތީ ކުޅުނު ހަ މެޗުން ލިބުނު 14 ޕޮއިންޓާއެކުއެވެ. ދެވަނައިގައި އޮތް ސްވިޓްޒަލެންޑަށް ހަތަރު މެޗުން ލިބިފައިވަނީ އަށް ޕޮއިންޓެވެ. ކޮލިފައިންގައި ބުދަ ދުވަހުގެރޭ ކުޅުނު މެޗުން ސްވިޓްޒަލެންޑް ވަނީ އަޔަލެންދާ ބައްދަލުކޮށް ލަނޑެއް ނުޖެހި އެއްވަރުވެފައެވެ.

މީގެ އިތުރުން ކޮލިފައިންގެ ގްރޫޕް އައިގައި ހިމެނޭ ޕޮލެންޑާއި އިންގްލެންޑް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ. އެއާއެކު ކޮލިފައިންގައި އިންގްލެންޑުން ދަމަހައްޓަމުން އައި ސައްތައިން ސައްތަ ރިކޯޑަށް ވަނީ ނިންމުން އައިސްފައެވެ.

ޕޮލެންޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ފެނިފައިނުވި ނަމަވެސް، ދެވަނަ ހާފުގައި އެންމެ ފުރަތަމަ ލަނޑު ޖަހާ ލީޑު ނެގީ އިންގްލެންޑުންނެވެ. މެޗުގެ 72 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ގައުމަށް ކާމިޔާބުކޮށްދިނީ ކެޕްޓަން ހެރީ ކޭންއެވެ. އެކަމަކު މެޗުގެ އިތުރު ވަގުުތުގައި ޕޮލެންޑުން ވަނީ ނަތީޖާ އެއްވަރުކޮށްފައެވެ. ކެޕްޓަން ރޮބަޓް ލެވަންޑޯސްކީގެ އެހީއާއެކު މި ލަނޑު އެ ގައުމަށް ކާމިޔާބުކޮށްދިނީ ޑެމިއަން ޒިމާންސްކީއެވެ.

މި ނަތީޖާއާއެކުވެސް ކޮލިފައިންގެ ގްރޫޕް އައިގެ އެއްވަނައިގައި އިންގްލެންޑް އޮތީ ކުޅުނު ހަ މެޗުން 16 ޕޮއިންޓް ހޯދައިގެންނެވެ. ދެވަނައިގައި އޮތީ ބުދަ ދުވަހުގެރޭ ސެން މެރީނޯ އަތުން 5-0 ގެ ނަތީޖާއަކުން މޮޅުވި އަލްބޭނިއާއެވެ. އެ ގައުމަށް ވަނީ ހަ މެޗުން 12 ޕޮއިންޓް ލިބިފައެވެ. އަދި އިންގްލެންޑާ އެއްވަރުކުރި ޕޮލެންޑް އޮތީ ތިންވަނައިގައި ހަ މެޗުން 11 ޕޮއިންޓް ހޯދައިގެންނެވެ.