ޔުނައިޓެޑުގެ އެއްބަސްވުން އާކުރަން ލިންގާޑް ދެކޮޅު

މެންޗެސްޓާ ޔުނައިޓެޑާއެކު ހަދާފައި އޮތް އެއްބަސްވުން އިންގްލެންޑުގެ މިޑްފީލްޑަރު ޖެސޭ ލިންގާޑް ދެކޮޅު ހަދާފައިވާ ކަމަށް ރިޕޯޓުތައް ބުނެފިއެވެ.

އުމުރުން 28 އަހަރުގެ ލިންގާޑް ޔުނައިޓެޑާއެކު މިހާރު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެއާއެކު ލިންގާޑުގެ އެއްބަސްވުން އާކުރުމުގެ މަޝްވަރާތައް ޔުނައިޓެޑުން ވަނީ ފަށާފައެވެ. އެކަމަކު އިނގިރޭސި މީޑިއާ ރިޕޯޓުތައް ބުނާ ގޮތުން ޔުނައިޓެޑުން ފުރުސަތު ލިބުން މަދުވުމާއެކު، ކުލަބު ބަދަލުކުރަން ލިންގާޑް ބޭނުންވެއެވެ. އެހެންކަމުން ޔުނައިޓެޑުގެ އެއްބަސްވުން އާކުރަން އޭނާ ދެކޮޅު ހަދާފައިވާ ކަމަށްވެސް ރިޕޯޓުތައް ބުނެއެވެ.

މި ސީޒަނުގައި ޔުނައިޓެޑުން މިހާތަނަށް އިނގިރޭސި ޕްރިމިއާ ލީގުގައި ތިން މެޗެއް ކުޅެފައިވީ ނަމަވެސް، ލީގުގައި ލިންގާޑް މިހާތަނަށް އެ ޓީމަށް ކުޅެފައިވަނީ އެންމެ ހަތަރު މިނެޓަށެވެ. އެއީ ލީގުގައި ރަށުން ބޭރުގައި ސައުތެމްޓަނާ 1-1 ގެ ނަތީޖާއަކުން ޔުނައިޓެޑް އެއްވަރުވި މެޗުގައެވެ.

ޔުނައިޓެޑުގައި ލިންގާޑަށް ފުރުސަތު ލިބުން މަދުވި ނަމަވެސް، މިދިޔަ ފިނި މޫސުމުގެ ޓްރާންސްފާ ބާޒާރުގައި ލޯނު އެއްބަސްވުމެއްގެ ދަށުން ވެސްޓް ހޭމް ޔުނައިޓެޑަށް ބަދަލުވެ، އެ ޓީމުގައި ލިންގާޑް ވަނީ ތަފާތު މޮޅު ކުޅުމެއް ދައްކާފައެވެ. އެގޮތުން ވެސްޓް ހޭމަށް ކުޅެދިން 16 މެޗުގައި އޭނާ ވަނީ ނުވަ ލަނޑު ޖަހާފައެވެ.

އެއާއެކު ލިންގާޑް އަލުން އަނބުރާ ގެންދަން ވެސްޓް ހޭމުން މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ. އަދި މިދިޔަ ސީޒަނުގައި ދެއްކި މޮޅު ކުޅުމާއެކު ޔޫރަޕުގެ ބޮޑެތި ކުލަބުތަކުން އޭނާއަށް ފާރަލަމުން އަންނަ ކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.

މި ފަހަކަށް އައިސް ޔުނައިޓެޑުގެ ފުރަތަމަ އެގާރައިން ލިންގާޑަށް ފުރުސަތު ލިބުން މަދުވި ނަމަވެސް، އޭނާ ވަނީ މިހާތަނަށް އެ ޓީމަށް ކުޅެދިން 211 މެޗުގައި 33 ލަނޑު ޖަހާފައެވެ. އަދި މީގެ ކުރިން އޭނާ ވަނީ ޔުނައިޓެޑާއެކު އެފްއޭ ކަޕާއި، އިނގިރޭސި ލީގު ކަޕާއި، އެފްއޭ ކޮމިއުނިޓީ ޝީލްޑުގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.