އަތޮޅު ކައުންސިލްތަކުގެ ނާއިބުރައީސުންނަށް ދެވޭ އެލަވަންސް އިތުރުކުރުމަށް މަޖިލީހުން ފާސްކޮށްފި
އަތޮޅު ކައުންސިލްތަކުގެ ނާއިބުރައީސުންނާއި އަތޮޅު ކައުންސިލްތަކުގެ އާންމު މެމްބަރުންގެ މުސާރައާއި އިނާޔަތްތަކުގައި އެއްވެސް ފަރަގެއް ނެތް
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އަތޮޅު ކައުންސިލްތަކުގެ ނާއިބުރައީސުންނަށް ދެވޭ އެލަވަންސް އިތުރުކުރުމަށް މަޖިލީހުން ފާސްކޮށްފިއެވެ.
އަތޮޅު ކައުންސިލްތަކުގެ ނާއިބުރައީސުންގެ މުސާރައާއި ލިވިންގ އެލަވަންސް އަދި ސިޓިންގ އެލަވަންސްގެ އިތުރުން "އަތޮޅު ކައުންސިލްތަކުގެ ނާއިބުރައީސުންނަށް ދެވޭ އެލަވަންސް"ގެ ގޮތުގައި ކޮންމެ މަހަކު 1000 ރުފިޔާ ދިނުމަށް މާލިޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓު ފާސްވީ ވޯޓުގައި ބައިވެރިވެވަޑައިގެންނެވި 41 މެމްބަރުންގެ އިއްތިފާގުންނެވެ. ރިޕޯޓު މަޖިލީހުގެ ތަޅުމަށް ހުށަހެޅުމުން އެއްވެސް އިސްލާހެއް ހުށަހަޅާފައި ނުވާތީ، ރިޕޯޓަށް ވޯޓަށް އަހާފައިވަނީ ބުދަ ދުވަހުގެ ޖަލްސާގައެވެ.
އިތުރު އެލަވަންސެއް ދިނުމަށް މާލިއްޔަތު ކޮމިޓީން ފާސްކޮށްފައި ވަނީ އަތޮޅު ކައުންސިލްތަކުގެ ނާއިބުރައީސުންނާއި އަތޮޅު ކައުންސިލްތަކުގެ އާންމު މެމްބަރުންގެ މުސާރައާއި އިނާޔަތްތަކުގައި އެއްވެސް ފަރަގެއް ނެތުމުންނެވެ.
އެކަން ދިރާސާކުރުމަށްފަހު އެކުލަވާލާފައިވާ މާލިއްޔަތު ކޮމިޓީގެ ރިޕޯޓްގައި ބުނެފައިވަނީ ލާމަރުކަޒީ އުސޫލުން އިދާރީ ދާއިރާތައް ހިންގުމުގެ ގާނޫނަށް އިސްލާހު ގެނައުމުގެ ގާނޫނާ ގުޅިގެން, ލޯކަލް ކައުންސިލްތަކުގެ މެމްބަރުންގެ މުސާރައާއި އިނާޔަތްތައް މުރާޖަޢާކުރުމުގެ މައްސަލަ މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވާފައިވާ އިޞްލާހާއެކު ރައްޔިތުންގެ މަޖިލީހުން ފާސްކުރި ފަހުން، އަތޮޅު ކައުންސިލްތަކުގެ ނާއިބުރައީސުންގެ ގޮތުގައި ޢައްޔަންކުރާ ފަރާތްތަކާއި އަތޮޅު ކައުންސިލްތަކުގެ އާންމު މެމްބަރުންގެ ގޮތުގައި ތިއްބަވާ ފަރާތްތަކުގެ މުސާރައާއި ޢިނާޔަތުގައި އެއްވެސް ފަރަގެއްނުވާކަން ފާހަގަކުރައްވައި ލޯކަލް ގަވަރމެންޓް އޮތޯރިޓީން އެ މައްސަލަ ރައްޔިތުންގެ މަޖިލީހަށް ހުށަހަޅުއްވާފައިވާ ކަމަށެވެ. އެހެންކަމުން މި މައްސަލަ މާލިއްޔަތު ކޮމިޓީން އިތުރަށް ދިރާސާކޮށްފައިވާ ކަމަށް ކޮމިޓީ ރިޕޯޓްގައި ބުނެފައިވެއެވެ.
އެގޮތުން އުސޫލެއްގެ ގޮތުން އަތޮޅު ކައުންސިލްތަކުގެ ނާއިބުރައީސުންގެ ގޮތުގައި ޢައްޔަންކުރާ ފަރާތްތަކާއި އަތޮޅު ކައުންސިލްތަކުގެ އާންމު މެމްބަރުންގެ ގޮތުގައި ތިއްބަވާ ފަރާތްތަކުގެ މުސާރައާއި ޢިނާޔަތުގައި ފަރަގެއް ހުންނަންޖެހޭނެކަމަށް ކޮމިޓީގެ މެމްބަރުން ފާހަގަކުރެއްވިއެވެ. އަދި، އަތޮޅު ކައުންސިލްތަކުގެ ރައީސް ނެތް ހާލަތްތަކުގައި، ރައީސްގެ އެންމެހާ މަސްއޫލިއްޔަތުތައް އަދާކުރަންޖެހޭނީ ނާއިބުރައީސް ކަމަށްވުމުން، މަގާމުގެ މަސްއޫލިއްޔަތުތަކުގެ ބުރަދަނަށް ބަލައި، އިތުރު އެލަވެންސެއް ދިނުމަށް ކޮމިޓީން ނިންމީކަމަށް ރިޕޯޓްގައި ބުނެފައިވެއެވެ.
މީގެއިތުރުން ނެޝަނަލް ޕޭ ކޮމިޝަނުން އެކުލަވާލާފައިވާ "ޤާނޫނުއަސާސީންނާއި ޤާނޫނުން ރައީސުލްޖުމްހޫރިއްޔާއަށް ލިބިގެންވާ ބާރުގެ ދަށުން އުފައްދާފައިވާ ކޮމިޝަންތަކާއި، ބޯޑުތަކާއި، ކޮމިޓީ އަދި ކައުންސިލް/މަޖިލިސްތަކުގެ މުސާރައާއި ޢިނާޔަތްތަކުގެ އޮނިގަނޑު"ގައި ބަޔާންކޮށްފައިވާ ގޮތުގެމަތިން އަތޮޅު ކައުންސިލްގެ ރައީސް ފިޔަވައި އެހެން މެންބަރުންނަށް އެ އޮނިގަނޑުގެ ލެވެލް 3 ގައިވާ ގޮތުގެ މަތިން ސިޓިންގ އެލަވަންސްގެ ގޮތުގައި ކޮންމެ ބައްދަލުވުމަކަށް 500 ރުފިޔާ ކަނޑައަޅައި، އަދި އެ އޮނިގަނޑުގައިވާ ފަދައިން މަހެއްގެ މައްޗަށް އެންމެ ގިނަވެގެން ލިބޭނެ ސިޓިންގ އެލަވަންސްގެ މިންވަރަކީ 2000 ރުފިޔާކަމުގައި ކަނޑައެޅުމަށް ވެސް ކޮމިޓީން ނިންމާފައިވެއެވެ.
އެލަވަންސް ދިނުމަށް ނިންމާފައިވަނީ 2022 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެންނެވެ.
ޤާނޫނަށް ގެނައި ބަދަލާއެކު މިހާރު އަތޮޅު ކައުންސިލްގައި ހިމެނެނީ އަތޮޅު ކައުންސިލްގެ ރައީސުންގެ އިތުރުން އެ އަތޮޅެއްގެ ރަށު ކައުންސިލްތަކުގެ ރައީސުންނެވެ. އަތޮޅު ކައުންސިލްގެ ރައީސަކީ އިންތިޚާބު ކުރާ މަގާމެއްވިޔަސް އަތޮޅު ކައުންސިލްގެ ނާއިބުރައީސް ހޮވަނީ އަތޮޅު ކައުންސިލްގައި ހިމެނޭ މެމްބަރުންގެ ވޯޓުންނެވެ.
އެންމެ ފަހުން ފާސްކުރި އޮނިގަނޑާއެކު އަތޮޅު ކައުންސިލްގެ ރައީސަށް މުސާރައިގެ ގޮތުގައި 22،400 ރުފިޔާ އަދި ލިވިން އެލަވަންސްގެ ގޮތުގައި 5،600 އާއެކު ޖުމްލަ 28،000 ރުފިޔާ ލިބޭނެއެވެ. ރަށު ކައުންސިލްގެ ރައީސްގެ މުސާރައިގެ ގޮތުގައި 15،400 ރުފިޔާ އަދި ލިވިން އެލަވަންސްގެ ގޮތުގައި 4،600 ރުފިޔާއާއެކު ޖުމްލަ 20،000 ރުފިޔާ ލިބޭނެއެވެ. ރަށު ކައުންސިލްގެ ނާއިބުރައީސްގެ މުސާރައިގެ ގޮތުގައި 11،600 ރުފިޔާ އަދި ލިވިން އެލަވަންސްގެ ގޮތުގައި 3،400 ރުފިޔާއާއެކު ޖުމްލަ 15،000 ރުފިޔާ ލިބޭއިރު ކައުންސިލްގެ މެމްބަރުންނަށް 10،600 ރުފިޔާ އަދި އިނާޔަތުގެ ގޮތުގައި 2،400 ރުފިޔާ އާއެކު ޖުމްލަ 13،000 ރުފިޔާ ވަނީ ހަމަޖައްސާފައެވެ.
