މާލޭގެ ބޯހިޔާވަހިކަމަށް ރައީސް ވެވަޑައިގެންފައިވާ ވައުދު ނުފުއްދަވާ އޮތްކަމަށްބުނެ މާފަންނު މެދު ދާއިރާގެ އެމްޑީޕީގެ މެމްބަރު އިބްރާހީމް ރަޝީދު (ބޮންޑޭ)، ރައްޔިތުންގެ މަޖިލީހަށް ހުށަހެޅުއްވި މައްސަލަ ބަލައިގަނެ ބަހުސް ފަށައިފިއެވެ.

މައްސަލަ ބަލައިގަތުމަށް ވޯޓު ދެއްވީ، 11 މެމްބަރުންނެވެ. ނުފެންނަ ކަމަށް 1 މެމްބަރަކު ވޯޓު ދެއްވިއިރު، ވޯޓުގައި ބައިވެރިވެވަޑައިގަތީ 12 މެމްބަރުންނެވެ.

ބޯހިޔާވަހިކަމުގެ މައްސަލައަށް އެމްޑީޕީ މެމްބަރުން ވޯޓު ދެއްވީ ޕާޓީން ނެރެފައިވާ ވިޕްލައިނާ ޚިލާފަށެވެ. މި މައްސަލަ ބަލައިނުގަތުމަށް އެމްޑީޕީން ވިޕްލައިނެއް ނެރެފައިވާއިރު، ވިޕްލައިނާ އެއްގޮތަށް ވޯޓު ދެއްވީ، ވިޕްލައިން ނެރުއްވި ޕީޖީ ލީޑަރު އަލީ އާޒިމް އެކަންޏެވެ.

ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެން ތަނަކުން އެކަށީގެންވާ ވަރުގެ ގޯއްޗެއް ފޯރުވައިދޭނެކަމަށް ސަރުކާރުން ވައުދުވެވަޑައިގެންފައިވާ ކަމަށާއި، އެ ވައުދު ނުފުއްދަވާކަމަށް ބޮންޑޭ ހުށަހެޅުއްވި މައްސަލައިގައި ވެއެވެ.

މާލޭގައި އެކަށީގެންވާ ވަރުގެ ބިމެއް އޮވެ، އިމާރާތްކުރާނެ ތަނަވަސްކަން ނެތިފައިވާ އާއިލާތައް ދެނެގަނެ، އެފަރާތްތަކަށް ލުއިފަސޭހަކޮށް ގެ އިމާރާތްކުރެވޭނެ މަގު ހޯދައިދިނުމަށާއި، ލުއިފަސޭހަކޮށް ގެ އިމާރާތްކުރެވޭނެ މަގު ހޯދައިދިނުމުގައި އެކަނިވެރި މައިންނަށް އިސްކަންދިނުމަށް ވެވަޑައިގެންފައިވާ ވައުދުފުޅު ފުއްދެވުމަށް ވެސް މި މައްސަލައިގައި ވަނީ ގޮވާލާފައެވެ.

ބޯހިޔާވަހިކަމުގެ މައްސަލައަކީ މާލޭގައި ޒަމާނުއްސުރެ އެންމެ ބޮޑުވެފައިވާ އެއް މައްސަލައެވެ. މި މައްސަލަ ހައްލުކުރުމަށް އެކި ސަރުކާރުތަކުން މަސައްކަތް ކުރައްވާފައިވީ ނަމަވެސް އެކަށީގެންވާ ހައްލެއް ލިބިފައެއް ނެތެވެ.