ނޮޅިވަރަމްގައި އެމްބިއުލާންސެއް ނެތުމުން މަޖިލީހަށް ކުއްލި މައްސަލައެއް
8 ސެޕްޓެމްބަރު 2021 | ބުދަ 05:23ދުއްވާނެ އެމްބިއުލާންސެއް ނެތް އިރު ސިއްހީމަރުކަޒުގައި ބޭނުން ކުރަމުން ދަނީ ޕިކަޕެއް
މުހައްމަދު ނަޝީދު އަބްދުﷲ - ނޮޅިވަރަމް ދާއިރާގެ މެމްބަރު
ހދ. ނޮޅިވަރަމްގައި ކޮވިޑްގެ ހާލަތު ގޯސްވެ، ބަލި މީހުން އުފުލުމަށް އެމްބިއުލާންސެއް ނެތުމުން ކުއްލި މައްސަލައެއް ރައްޔިތުންގެ މަޖިލީހަށް ހުށަހަޅައިފިއެވެ.
މި މައްސަލަ މަޖިލީހަށް ހުށަހެޅުއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ. މި މައްސަލަ ބަލައިގަނެ ބަހުސް ކުރުމަށް މަޖިލީހުން ފާސްކޮށްފައިވަނީ 32 މެމްބަރުންގެ ވޯޓުންނެވެ.
ނަޝީދު ހުށަހެޅުއްވި މައްސަލައިގައި ބުނެފައިވަނީ ކޮވިޑް-19ގެ ހާލަތުގައި ތިލަދުންމަތީ ނޮޅިވަރަމް ދާއިރާ މިއަދު ވަނީ ނާޒުކު ހާލަތެއްގައި ކަމަށެވެ. އާބާދީގައި 2770އަށް ވުރެ ގިނަ މީހުން ދިރިއުޅޭ ނޮޅިވަރަމުގައި މިއަދާ ހަމައަށް ކޮވިޑު ބައްޔަށް 202 މީހުން ޕޮޒިޓިވް ވެފައިވާއިރު ރަށުގެ ސިއްހީ މަރުކަޒުގައި ދުއްވާނެ އެމްބިއުލާންސެއް ނެތް ކަމަށާއި ސިއްހީމަރުކަޒުގައި ބޭނުން ކުރަމުން ދަނީ ޕިކަޕެއް ކަމަށެވެ.
ސިއްހީ މަރުކަޒުގެ މުވައްޒަފުންގެ ތެރެއިން 3 މީހަކު މިހާރު ވެސް ބައްޔަށް ފަރުވާ ހޯދަމުންދާ ކަމަށާއި، މިހާލަތުގައި ރަށަށް އަރައި ފޭބުމަކީ ދަތި އުނދަގޫ ކަމަކަށްވެ، ނޮޅިވަރަމު ރައްޔިތުން މިވަނީ ކޮވިޑުގެ އާލަމީ ވަބާގައި ވަރަށް ވެސް ހިތްދަތި ކަންތައްތަކާ ކުރިމަތިލާންޖެހިފައި ކަމަށް ބުނެފައިވެއެވެ.
މި ކަމަކީ ބަލިމީހުންނަށް އެންމެ ރައްކާތެރި ގޮތް ކަމުގައި ނުވާއިރު މިކަމަށް ހައްލެއް ހޯދުމަށް ބޭނުންވެފައިވާ ކަމަށް ނަޝީދު ވިދާޅުވިއެވެ. އެހެންކަމުން ކަމާ ބެހޭ ފަރާތުން ރައްޔިތުންނަށް އެންމެ ރައްކާތެރިވާނެ ފަދަ ވެހިކަލެއް ވީހާވެސް އަވަހަކަށް ސިއްހީމަރުކަޒަށް ހޯދައި ދިނުމަކީ ކުރަންޖެހިފައިވާ މުހިންމު މަސައްކަތެއްކަމަށް ވެސް ނަޝީދު ހުށަހެޅުއްވި މައްސަލައިގައި ބުނެފައިވެއެވެ.
މިކަމުގައި ކުޅުދުއްފުށިން ލިބޭ އެހީތެރިކަން ފާހަގަކޮށް ޝުކުރު އަދާކުރައްވާ ކަމަށާއި، އަދި މި ހާލަތުން އަރައި ގަތުމަށް ރަށަށް ވީހާ ވެސް އަވަހަކަށް އެމްބިއުލާންސެއް ލިބޭނެ އިންތިޒާމު ހަމަޖެއްސުމަށް ނަޝީދު އެދިވަޑައިގެންނެވިއެވެ.
