ރަސްދޫ އައު އިންޖީނުގޭގެ މަސައްކަތް ޑިސެމްބަރު މަހު ނިމޭނެ: ސްޓެލްކޯ
މި މަސައްކަތް ފަށާފައިވަނީ ޖުލައި މަހު
ރަސްދޫގައި އިމާރާތްކުރާ އައު އިންޖީނުގެ
އއ. ރަސްދޫގައި އިމާރަތްކުރާ ޒަމާނީ އިންޖީނުގޭގެ މަސައްކަތް ޑިސެމްބަރު މަހު ނިންމާލެވޭނެކަމަށް ސްޓެލްކޯއިން ބުނެފިއެވެ.
ރަސްދޫގައި އިމާރާތް ކުރާ ޒަމާނީ އައު އިންޖީނުގޭގެ އަމަލީ މަސައްކަތް ފަށާފައިވަނީ ޖުލައި މަހުގެ ތެރޭގައެވެ. މި އިންޖީނުގޭގެ މަސައްކަތް އަންނަ ޑިސެމްބަރު މަހުގެ ނިޔަލަށް ނިންމާލުމަށް އަމާޒުހިފާފައިވާކަމަށް ސްޓެލްކޯއިން ބުނެފައިވެއެވެ.
ސްޓެލްކޯއިން ބުނީ ރަސްދޫއަކީ އެކި ފަންތިއާއި ގިންތީގެ ގެސްޓްހައުސްތައް ހިންގަމުން ގެންދާ ރަށަކަށް ވެފައި، އެރަށަށް އަންނަމުންދާ ތަރައްގީއާ އެއްވަރަށް އަދި އެ ރަށުގެ މަތިވަމުންދާ ލޯޑަށް ކޭޓަރ ކުރުމަށްޓަކައި އެ ކުންފުނިން އަބަދުވެސް މަސައްކަތްކުރަމުންދާ ކަމަށެވެ.
މިވަގުތު ރަސްދޫގައި ޚިދުމަތް ދެމުން ގެންދަނީ 754 ކިލޯވޮޓްގެ ކެޕޭސިޓީގައި ކަމަށް ސްޓެލްކޯއިން ފާހަގަކޮށްފައިވެއެވެ. އެ އިންޖީނުގެއަކީ ކުރިއަށް އޮތްތަނުގައި ރަސްދޫއަށް ބޭނުންވާ ކަރަންޓު ފޯރުކޮށްދެވޭ ވަރަށްވުރެ ޖާގައިގެ ގޮތުން ކުޑަ ތަނެއް ކަމަށާއި، މިހާރު އިމާރާތް ކުރެވެމުންދާ އިންޖީނުގެއަކީ 5 މެގަވޮޓްގެ ކެޕޭސިޓީއެއް ބިލްޑް ކުރެވޭގޮތަށް ފަރުމާކޮށްފައިވާ އިންޖީނުގެއެއް ކަމަށް ސްޓެލްކޯއިން ބުނެފައިވެއެވެ.
އައު އިންޖީނުގެ އިމާރާތް ކުރަމުންދަނީ ޚިދުމަތައް ބުރޫ ނާރާގޮތަށް, މިހާރުގެ އިންޖީނުގެ ހުރިތަނުގައި ކަމަށާއި، މި އިންޖީނުގެ އަކީ ވެންޓިލޭޝަން ރަނގަޅު، އުސްކޮށް އިމާރާތް ކުރެވޭ, ޒަމާނީ ފެންވަރުގެ ތަނަކަށްވެގެންދާނެކަމަށް ސްޓެލްކޯއިން ބުނެއެވެ. އަދި މި އައު އިންޖީނުގެ ވެގެންދާނީ، އަޑު މަޑު، ތިމާވެއްޓާ ރައްޓެހި ތަނަކަށް ކަމަށާއި، އިންޖީނުގެއަށް ބޭނުންވާ ކަރަންޓު އުފައްދައިދޭނީ އިންޖީނުގޭގައި ހަރުކުރާ ސޯލާ ޕެނަލްތަކުން ކަމަށް ސްޓެލްކޯއިން ބުނެއެވެ.
ސްޓެލްކޯއިން ބުނީ އޮންލައިން މޮނިޓަރިންގއާއި، ޓެކްނިކަލް ސަޕޯޓްގެ އިތުރުން، އައު އިންޖީނުގެ ވެގެންދާނީ މުވައްޒަފުންނަށް ރައްކާތެރި މަސައްކަތުގެ މާހައުލަކަށް ކަމަށެވެ. އެ ކުންފުނީގެ އުއްމީދަކީ މި އައު އިންޖީނުގެއާއެކު، ރަސްދޫއަށް ބާރު ދުވެލީގައި ސަރުކާރުން ގެންނަމުންދާ ތަރައްގީއާއި، ލޯކަލް ޓުއަރިޒަމް ވިޔަފާރިއަށް އިތުރު ތަރައްގީއާއި ކުރިއެރުން ލިބި، ރައްޔިތުންނަށް މަންފާކުރަނިވި ރަނގަޅު ޚިދުމަތެއް ރަސްދޫގައި ދެވިގެންދިއުން ކަމަށް ސްޓެލްކޯއިން ބުނެއެވެ.
