ޕާޓީގެ އެތެރޭގައި ހިޔާލު ތަފާތު ވިޔަސް މަންޒަރު ކިލަނބުވާ ފަދަ ކަމެއް ނުކުރާނަން: ރައީސް ޞާލިޙް
7 ސެޕްޓެމްބަރު 2021 | އަންގާރަ 11:08އެމްޑީޕީއާ ވާދަކުރެވޭނެ ވަރުގެ އެހެން ޕާޓީއެއް ރާއްޖޭގައި ނޯންނާނެ
ރައީސް ސޯލިހު ފުނަދޫގެ އެމްޑީޕީގެ މެންބަރުންނާއި ބައްދަލުކުރެއްވުން
ޕާޓީ އެތެރޭގައި ހިޔާލު ތަފާތު ވިޔަސް މަންޒަރު ކިލަނބުވާ ފަދަ ކަމެއް ނުކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ށ. ފުނަދޫގެ އެމްޑީޕީ މެމްބަރުންނާ ބައްދަލުކުރައްވައި ވާހަކަ ދައްކަވަމުންނެވެ. ރައީސް ވިދާޅުވީ ޕާޓީ އެތެރޭގައި ހިޔާލު ތަފާތުވުންތައް އުޅުނަސް އެކަންތައްތައް ހައްލުވާނެ ކަމަށެވެ. އަދި އެމްޑީޕީއާ ވާދަކުރެވޭނެ ވަރުގެ އެހެން ޕާޓީއެއް ރާއްޖޭގައި ނޯންނާނެ ކަމަށް ވިދާޅުވިއެވެ. ޕާޓީގެ ކަންކަން ކުރެއްވުމުގައި އެމަނިކުފާނަށް ކުރެއްވެން ހުރި މަސައްކަތް ކޮށްދެއްވާނެކަމުގެ ޔަގީންކަން ދެއްވާފައިވާ އިރު، ޕާޓީއާއެކު ކުރިއަށް ވަޑައިގަންނަވާނެކަމަށް ރައީސް ވަނީ ވިދާޅުވެފައެވެ.
ރައީސް ގެންދަވަނީ ށ. އަތޮޅަށާއި ރ. އަތޮޅުގެ ބައެއް ރަށްތަކަށް ދަތުރުކުރައްވަމުންނެވެ. އަދި މި ދަތުރުފުޅުގެ ތެރެއިން ރައީސުލްޖުމްހޫރިއްޔާ، އެ ރަށްރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިތުރުން، މަސްވެރިންނާއި، ދަނޑުވެރިންނާ ބައްދަލުކުރެއްވުމަށް ހަމަޖެހިފައިވެއެވެ. އަދި، ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅުގައި ރ. އަލިފުށީގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ފަރާތުން ޤާއިމުކޮށްފައިވާ ޖޮބް ސެންޓަރުގެ ޚިދުމަތް ވެސް އިފްތިތާޙްކޮށްދެއްވުމަށް ހަމަޖެހިފައިވެއެވެ.
ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅުގައި ވަޑައިގަތުމަށް ހަމަޖެހިފައިވާ ރަށްތަކަކީ ށ. ފުނަދޫ، ށ. ޅައިމަގު، ށ. ފޯކައިދޫ، ށ. މާއުނގޫދޫ، ރ. ވާދޫ، ރ. އަލިފުށި، ރ. ރަސްގެތީމު އަދި ރ. އަނގޮޅިތީމެވެ.
ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅު ނިންމަވާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ އަންނަ ބުރާސްފަތި ދުވަހުގެ ރެޔެވެ.
