ރެހެންދި އެވޯޑް 14 އަންހެނަކަށް ދީފި
މިއީ ޖެންޑަރ މިނިސްޓްރީގެ ފަރާތުން ކޮންމެ އަހަރު ދެމުންގެންދާ ޚާއްސަ އެވޯޑެއް
2020 އަދި 2021 ވަނަ އަހަރުގެ ރެހެންދި އެވޯޑް ހަވާލުކުރުމުގެ ރަސްމިއްޔާތު
ޤައުމީ ޚިދުމަތުގައި އަންހެނުން ކުރާ މަސައްކަތް ފާހަގަ ކުރުމުގެ ގޮތުން ދޭ ރެހެންދި އެވޯޑް 14 އަންހެނަކަށް ދީފިއެވެ.
ކޮވިޑްގެ ހާލަތާގުޅިގެން 2020 ވަނަ އަހަރު ރެހެންދި އެވޯޑް ޙަފްލާ ބާއްވާފައެއްނުވެއެވެ. އެހެންކަމުން މިއަހަރު ބޭއްވި ހަފްލާގައި ވަނީ 2020 ވަނަ އަހަރު އަދި 2021 ވަނަ އަހަރު ރެހެންދި އެވޯޑް ހާސިލްކުރި އަންހެނުންނަށް އެވޯޑް ދީފައެވެ.
2020 ވަނަ އަހަރު ރެހެންދި އެވޯޑް ލިބިފައިވަނީ ފާޠިމަތު އިބްރާހީމް, މަރިޔަމް ޝުނާނާ, ޢާއިޝަތު ޙުސައިން މަނިކު, އަމީނާ ނަޢީމް, ޙައްވާ ލަޠީފް, މިންޙާ ފާއިޒު އަދި ޝިފްޒާ މުސްޠަފާއަށެވެ. 2021 ވަނަ އަހަރު އެވޯޑް ލިބިފައިވަނީ އަހުމީމާ ލުޠުފީ, އައިމިނަތު ޝާހާ ހާޝިމް, ޒީނިއާ އަޙުމަދު ޙަމީދު, ނާދިޔާ ޢަބްދުލްޣަފޫރު, ޙައްވާ ރާމިޒާ, ސަރޖަންޓް ފަސްޓް ކްލާސް ނަސްރީނާ ޙަސަން, ޝިޔާމާ އަޙުމަދު އަދި ފޮނަދޫ އަންހެނުންގެ ތަރައްޤީއަށް މަަސައްކަތް ކުރާ ކޮމެޓީއަށެވެ.
ރެހެންދި އެވޯޑަކީ ޤައުމީ ޚިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި، މުޖުތަމަޢު ބިނާ ކުރުމަށް އަންހެނުން އަދާކުރާ ދައުރުގެ އަގު، ޤައުމީ ފެންވަރެއްގައި ވަޒަންކުރުމުގެ ގޮތުންނާއި މުޖުތަމައުގައި އަންހެނުންގެ ޙައްޤުތައް ރައްކާތެރިކުރުމަށާއި ކުރިއެރުވުމަށް ވަކިވަކި ފަރުދުންނާއި ޖަމްޢިއްޔާތަކާއި ޖަމާޢަތްތަކުން ކުރަމުންދާ މަސައްކަތްތަކުގެ އަގުވަޒަން ކުރުމަށާއި، ދިވެހިރާއްޖޭގެ ޤައުމީ ތަރައްޤީއަށާއި އަންހެނުންގެ ކުރިއެރުމަށް އަގުހުރި ޚިދުމަތްތައް ކޮށްދީފައިވާ ފަރާތްތަކަށް މިނިސްޓްރީ އޮފް ޖެންޑަރ, ފެމިލީ އެންޑް ސޯޝަލް ސަރވިސަސް އިން ކޮންމެ އަހަރަކު ދެމުން ގެންދާ ޚާއްސަ އެވޯޑެކެވެ.
ހަމައެއާއެކު، ދިވެހިރާއްޖޭގެ ތަރައްޤީއާއި ކުރިއެރުމަށް ކުރާ މަސައްކަތްތަކުގައި އަންހެނުންގެ ބައިވެރިވުމާއި، އެ ކަނބަލުން ކުރާ އަގުހުރި މަސައްކަތްތަކާއި، އަންހެނުން ހާސިލުކޮށްފައިވާ ކާމިޔާބީތައް ފާހަގަކޮށް އަގުވަޒަންކުރުމާއި، ޤައުމީ ޚިދުމަތުގައާއި އަންހެނުންގެ ބައިވެރިވުން މަދު ދާއިރާތަކުގައި އަންހެނުންގެ ހިއްސާ އިތުރުކުރުމާއި، އާ ދާއިރާތަކަށް އަންހެނުން ނެރުމަށް ބާރުއެޅުމާއި، މިންތީގެ ހަމަހަމަކަން ޤާއިމުކުރުމަށް މަސައްކަތްކުރާ ވަކިވަކި ފަރުދުންނާއި އަދި މުއައްސަސާތަކުގެ މަސައްކަތްތައް ބަލައިގަނެ އަގުވަޒަންކުރުން ވެސް މި އެވޯޑު ދިނުމުގެ މަޤުޞަދުތަކުގެ ތެރޭގައި ހިމެނެއެވެ.
މިއެވޯޑަކީ 2014 ވަނަ އަހަރުން ފެށިގެން ދެމުންގެންދާ އެވޯޑެކެވެ.
