އަފްޣާނިސްތާނުގައި 8 މަހުގެ މާބަނޑު ފުލުސް އޮފިސަރަކު މަރާލީ ކުދިންގެ ކުރިމަތީގައި

އަފްޣާނިސްތާނުގެ ތާލިބާން ޖަމާއަތަށް ނިސްބަތްވާ ބަޔަކު މާބަނޑު ފުލުސް އޮފިސަރެއްގެ ގެޔަށް ވަދެ އޭނާގެ ފިރިމީހާޔާއި ކުދިންގެ ކުރިމަތީގައި ތަޅައި އަނިޔާކޮށް އެންމެފަހުން ބަޑިޖަހައި މަރާލާފައިވާ ކަމަށް އެ އާއިލާއާ ހަވާލާދީ ނޫސްތަކުން ރިޕޯޓްކޮށްފިއެވެ.

މަރައިލެވުނު އޮފިސަރަކީ މެދުތެރޭގެ ޕްރޮވިންސެއް ކަމަށްވާ ޣޯރުގެ ވެރިރަށް ފީރޯޒްކާހުގެ ޖަލެއް ބަލަހައްޓާ އޮފިސަރެކެވެ. މިހާދިސާ ހިނގިއިރު އޭނާގެ ބަނޑަށް 8 މަހެވެ. އެ އާއިލާއިން މައުލޫމާތުދޭ ގޮތުގައި ގެޔަށް ވަދެގެންފައިވަނީ ހަތިޔާރު އަޅައިގެން ތިބި ތިން މީހެކެވެ. އެމީހުން ވާހަކަ ދައްކަމުންދިޔައީ އަފްޣާނިސްތާނުގެ ބަހަކުން ނޫންކަމަށާއި ވާހަކަ ދެއްކީ އަރަބި ބަހުން ކަމަށް ވެސް ބުނެފައިވެއެވެ.

ގެޔަށްވަދެ އާއިލާގެ އެންމެން ބަނދެ ހައްޔަރުކޮށްފައި މާބަނޑު ބާނޫ ނިގާރު ދަމައިނެރެ ތަޅައި އަނިޔާކޮށް ބަޑިޖަހައި މަރާލީ ކަމަށާއި މަރައިލުމަށްފަހުވެސް އޭނާގެ މޫނަށް އެކިވަރުގެ ގެއްލުންތައް ދީފައިވާ ކަމަށް ބުނެއެވެ. މި ތުހުމަތުތައް ތާލިބާން ޖަމާއަތުން ވަނީ ދޮގުކޮށްފައެވެ. އެ ޖަމާއަތަށް ނިސްބަތްވާ ބަޔަކު މިކަން ނުކުރާ ކަމަށާއި މިބާވަތުގެ އެހެން ކަމެއްވެސް ނުކުރާނެ ކަމަށް ތާލިބާނުން ވަނީ ބުނެފައެވެ.

ހުސްވި އޮގަސްޓު މަހުގެ 15 ވަނަ ދުވަހު ވެރިރަށް ކާބުލް ހިފުމަށްފަހު ތާލިބާނުން ބުނެފައިވަނީ އެމީހުންނަކީ މިހާރު ބަދަލުވެފައިވާ ބައެއް ކަމަށާއި ބަދަލުހިފުމުގެ ހަރަކާތްތަކެއް ނުހިންގާނެ ކަމަށެވެ. އަދި އަންހެނުންގެ ހައްގުތަކަށްވެސް އިހުތިރާމް ކުރާނެ ކަމުގައެވެ. މިހެން ބުނެފައިވިޔަސް ބަދަލުހިފުމުގެ ތަފާތު ހަރަކާތްތައް އެކި ސަހަރުތަކުގައި ހިންގަމުންދާ ކަމަށް ބައިނަލްއަގުވާމީ މީޑިއާގައި ދަނީ ޝާއިއު ކުރެވެމުންނެވެ.