"ސުޕްރީމް ކޯޓުގެ ފަނޑިޔާރުކަމަށް އެއްވެސް އިރަކު ޝައުޤެއް ނެތް"
ހައިލަމް ވަނީ އެއީ ކަނޑައެޅިގެން ދޮގު ވާހަކަތަކެއްކަމަށް ވިދާޅުވެފައި
ރައީސް ޔާމީންގެ ޝަރީއަތުގެ ތެރެއިން- ހައިލަމް ވަނީ ގާޒީ ނަޖީބު ދެއްކެވި ވާހަކަތައް ދޮގު ކުރައްވާފައި
ކްރިމިނަލް ކޯޓްގެ ކުރީގެ އިސް ގާޒީ އަހުމަދު ހައިލަމްއާއި، ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ ފޯނުކޯލެއް އިވިވަޑައިގެންކަމަށް ވިދާޅުވެ އެ ކޯޓުގެ ކުރީގެ ގާޒީ ޙަސަން ނަޖީބު ދާދި ފަހުން ދެއްކެވި ވާހަކަތަކަށް ހައިލަމް ރައްދު ދެއްވައިފިއެވެ.
ކުރީގެ ބައެއް ފަނޑިޔާރުންނާއި ގާނޫނީ ވަކީލުން ގުޅިގެން ބޭއްވި ނޫސްވެރިންގެ ބައްދަލުވުމެއްގައި އެވާހަކަ ފުރަތަމަ އާންމު ކުރެއްވީ ކްރިމިނަލް ކޯޓުގެ ކުރީގެ ގާޒީ ޙަސަން ނަޖީބެވެ. އެގޮތުން އޭރު ރައީސް ޔާމީނުގެ މައްސަލަ ބެއްލެވި ގާޒީ ހައިލަމަށް ދިވެހި ރާއްޖޭގެ ސުޕްރީމް ކޯޓުން ޖާގައެއް ކަށަވަރުވެފައިވާކަމަށް އަލީ ޒާހިރު ފޯނު ކޯލެއްގައި ވިދާޅުވި އަޑު އެއްސެވިކަމަށް ގާޒީ ނަޖީބު ވަނީ ވިދާޅުވެފައެވެ. ގާޒީ ނަޖީބަކީ ފަނޑިޔާރުކަމުން ވަކިކުރަން ޖޭއެސްސީން ނިންމައި، މަޖިލީހުގައި އެކަމަށް ވޯޓަށް އަހާ ހިސާބުގައި މައްސަލަ އޮއްވައި މަގާމުން އިސްތިއުފާ ދެއްވި ބޭފުޅެކެވެ.
ނަޖީބުގެ މި ތުހުމަތުތަކާ ގުޅިގެން ރާއްޖެއެމްވީން ސުވާލު ކޮށްލުމުން ހައިލަމް ވަނީ އެއީ ކަނޑައެޅިގެން ދޮގު ވާހަކަތަކެއްކަމަށް ވިދާޅުވެފައެވެ. ހައިލަމް ވިދާޅުވީ، ނަޖީބު މަސައްކަތް ކުރައްވާފައި އެ ވަނީ ރައީސް ޔާމީނުގެ ޝަރީއަތް ކުރިއަށްދާ ގޮތާމެދު ކަންބޮޑުވާކަން ފާޅު ކުރެއްވުމަށް ކަމަށެވެ. ހައިލަމް ވަނީ އެއްވެސް އިރެއްގައި ސުޕްރީމް ކޯޓުގެ ފަނޑިޔާރުކަމަށް ވަޑައިގެންނެވުމުގެ ޝައުޤުވެރިކަމެއް ނެތްކަން ފާހަގަކުރައްވައި، އެކަމަށް މަސައްކަތެއް ވެސް ކުރައްވާފައިނުވާނެ ކަމަށް ވިދާޅުވެފައެވެ.
ހައިލަމް ވިދާޅުވީ، ރައީސް ޔާމީނުގެ މައްސަލަ ކުރިއަށް ދިޔައިރު ވެސް ގާޒީ ނަޖީބު މަސައްކަތް ކުރެއްވީ ހަމައެކަނި ވަޒީފާ ސަލާމަތްކުރުމުގެ ވިސްނުމުގައި ކަމަށެވެ. އެގޮތުން ރައީސް ޔާމީނަށް ކޮންމެ ގޮތަކަށް ޙުކުމް އައި ނަމަވެސް، އެބޭފުޅުންގެ އޭރުގެ ވިސްނުން ހުރީ ވަޒީފާ ދެމެހެއްޓުންކަން ފާހަގަކުރައްވައި ހައިލަމް ވަނީ މިއަދު ރައީސް ޔާމީނުގެ ޝަރީއަތާމެދު ކަންބޮޑުވާކަން ދެއްކުމުގެ ބޭނުމެއް ނެތް ކަމަށް ވިދާޅުވެފައެވެ. އަދި އެއީ ހައްތަހާވެސް ރައީސް ޔާމީނުގެ ރުހުން ހޯއްދެވުމުގެ މަޤްސަދުގައި ދައްކަވާ ޙަޤީޤަތެއް ނެތް ވާހަކަތަކެއްކަން ހައިލަމް ފާހަގަކުރެއްވިއެވެ.
ހައިލަމް ވިދާޅުވީ، އަލީ ޒާހިރަކީ ވަރަށް ކުރިން ފެށިގެން ވެސް އެކުވެރި ބޭފުޅެއް ކަމަށެވެ. އެގޮތުން ގާތް ގުޅުމެއް އަބަދުވެސް އޮތް ނަމަވެސް، ނަޖީބު އެ ވިދާޅުވާ ފަދަ ކަމެއް ހިނގާފައިނުވާ ކަމުގެ ޔަޤީންކަން ހައިލަމް ދެއްވިއެވެ.
އޭގެ އިތުރުން، ކޯޓުގައި އެތައް މައްސަލައެއް ކުރިއަށްދިޔައިރު، ހަމައެކަނި ރައީސް ޔާމީނުގެ މައްސަލައާ ގުޅޭގޮތުން ވާހަކަ ދެއްކުމުން ވެސް ޝައްކުތަކެއް އުފެދޭކަން ހައިލަމް ފާހަގަކުރެއްވިއެވެ.
އޯޑިއޯތަކުގެ ވާހަކަ މި ދަނޑިވަޅުގައި ދައްކަމުންދަނީ ރައީސް ޔާމީންގެ ޝަރީއަތަށް ނުފޫރު ފޯރުވުމަށް ކަމަށް އަލީ ޒާހިރު ވެސް ވަނީ ވިދާޅުވެފައެވެ. ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ވާހަކަދައްކަވަމުން އަލީ ޒާހިރު ވިދާޅުވީ މި ސަރުކާރުން ކޯޓުތަކާއި، ފަނޑިޔާރުންނަށް އެއްވެސް ނުފޫޒެއް ފޯރުވާފައި ނުވާނެ ކަމަށެވެ. އަދި ކުރިއަށް އޮތް ތަނުގައި ވެސް މިފަދަ ކަމެއް މި ސަރުކާރުން ނުކުރާނެ ކަމަށެވެ.
ކޯޓުތަކާމެދު އާންމު ރައްޔިތުންގެ އިތުބާރު އިތުރަށް ރަނގަޅުވަމުން އަންނަ ކަމަށާއި، މިފަދަ ވަގުތެއްގައި ފަނޑިޔާރުންތަކަކާ ގުޅޭ އޯޑިއޯއެއް ލީކުކޮށްގެން އުޅެނީ ރައީސް ޔާމީންގެ ޝަރީއަތަށް ނުފޫޒު ފޯރުވުމަށް ސިޔާސީ ބޭނުމެއްގައި ކަމަށް އަލީ ޒާހިރު ވިދާޅުވިއެވެ. މި ވާހަކަ އެންމެ ބޮޑަށް ދައްކަމުންދަނީ ވެސް އިދިކޮޅުން ކަމަށާއި، މިއީވެސް އިއްތިފާގަކުން ހިނގާ ކަމެއް ކަމަށް ވެދާނެ ކަމަށް އަލީ ޒާހިރު ވިދާޅުވިއެވެ.
