ރައީސް ޔާމީންގެ ޝަރީއަތަކީ އިތުބާރު ހިފޭ ގޮތަށް ހިންގާފައިވާ ޝަރީއަތެއް ނޫންކަމަށް ދެއްކުމަށް ކުރީގެ ބައެއް ފަނޑިޔާރުންނާއި ވަކީލުން މަސައްކަތް ކުރޭ: އެމްޑީޕީ
6 ސެޕްޓެމްބަރު 2021 | ހޯމަ 03:22ރައީސް ޔާމީންގެ ކަންކަން ހިނގައި ދިޔަގޮތް ކަމަށް ބުނެ ދެއްކެވި ވާހަކަތަކަކީ އެއްވެސް އަސާސެއްގެ މައްޗަށް ދައްކަވާފައިވާ ވާހަކަތަކެއް ނޫންކަން ސާފުވޭ
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމެއްގެ ތެރެއިން
ކުރީގެ ބައެއް ފަނޑިޔާރުންނާއި، ބައެއް ޤާނޫނީ ވަކީލުން 4 ސެޕްޓެމްބަރުގައި ބޭއްވި ނޫސްވެރިންގެ ބައްދަލުވުމަކީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ޝަރީޢަތަކީ އިތުބާރު ހިފޭ ގޮތަށް ހިންގާފައިވާ ޝަރީޢަތެއް ނޫންކަން ރައްޔިތުންނަށް ދެއްކުމަށް މަސައްކަތް ކުރުމަށް ބޭއްވި ބައްދަލުވުމެއް ކަަމަށް މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ) އިން ބުނެފިއެވެ.
އެޕާޓީން ނެރުނު ނޫސްބަޔާނެއްގައި ބުނީ ބައެއް ފަނޑިޔާރުންނާއި، ބައެއް ޤާނޫނީ ވަކީލުން ބޭއްވި ބައްދަލުވުމެއްގައި ރައީސް ޔާމީންގެ ކަންކަން ހިނގައި ދިޔަގޮތް ކަމަށް ބުނެ ދެއްކެވި ވާހަކަތަކަކީ އެއްވެސް އަސާސެއްގެ މައްޗަށް ދައްކަވާފައިވާ ވާހަކަތަކެއް ނޫންކަން ސާފުވާ ކަމަށެވެ. އަދި އެ ބައްދަލުވުމުގައި ވާހަކަ ދެއްކެވި ބޭފުޅުންނަކީ، އެބޭފުޅުންގެ ސުލޫކީ މައްސަލަތައް ޖުޑީޝަލް ސަރވިސް ކޮމިޝަނަށް ސާބިތުވެ ފަނޑިޔާރުކަމުން ވަކިކުރުމަށް އެކޮމިޝަނުން ނިންމައި ރައްޔިތުންގެ މަޖިލީހަށް އެ ފަނޑިޔާރުން ވަކިކުރުމުގެ މައްސަލަ ފޮނުވުމުން މަޤާމުން އިސްތިއުފާ ދެއްވާފައި ތިއްބެވި ބޭފުޅުން ކަމަށެވެ.
ބައެއް ފަނޑިޔާރުންނާއި، ބައެއް ޤާނޫނީ ވަކީލުން ހިންގި މި އަމަލަކީ މަތީ މަރުހަލާގެ ކޯޓުތަކަށް ކަމުގެ ޙަޤީޤަތް އޮޅުވާލައި އެކޯޓުތަކަށް ނުފޫޒު ފޯރުވުމަށް މަސައްކަތް ކުރުންކަން ފާހަގަކޮށް އެމްޑީޕީން ބުނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަދި އެމަނިކުފާނުގެ ސަރުކާރުން ޝަރީޢަތަކަށް ނުފޫޒު ފޯރުވުމުގެ އެއްވެސް ޢަމަލެއް ހިންގަވާފައި ނުވާނެކަމުގެ ފުރިހަމަ ޔަޤީންކަން އަރުވާ ކަމަށެވެ. ސަރުކާރުގެ އިސް ފަރާތްތަކާއި ފަނޑިޔާރުންތަކަކާ ދެމެދު ދެކެވިފައިހުރި ވާހަކަތަކެއް ކަމަށް ބުނެ ސޯޝަލް މީޑިޔާގައި ދައުރުވަމުންދާ އޯޑިއޯތަކެއްގެ މައްސަލައިގައި ހިމެނޭ ކަމަށް ޝައްކު ކުރެވޭ ފަނޑިޔާރުންގެ މައްސަލައިގެ ތަޙްޤީޤު ޖުޑީޝަލް ސަރވިސް ކޮމިޝަނުން ކުރަމުންދާ ކަަމަށް ވެސް ބަޔާނުގައިވެއެވެ.
އެ މައްސަލައިގައި ހިމެނޭ ހުރިހާ ފަރާތެއްގެ ފޮރެންސިކް ތަޙްޤީޤު ހިންގުމަށް މޯލްޑިވްސް ޕޮލިސް ސަރވިސް އަށް ޖުޑީޝަލް ސަރވިސް ކޮމިޝަނުން ހުށަހަޅާފައިވާ ކަމަށާއި ޕާޓީން އެދެނީ، ފަނޑިޔާރުންނަށް ނުފޫޒު ފޯރުވުމަށް އަމަލުތަކެއް ހިންގާފައިވާކަމުގެ ތުހުމަތުކުރެވޭ ފަރާތްތަކުގެ ޖިނާއީ ތަޙްޤީޤު އިތުބާރު ހިފޭނޭ ގޮތަށް އަދި ހަލުވިކަމާއެކު މޯލްޑިވްސް ޕޮލިސް ސަރވިސްއިން ހިންގައި ނިންމުން ކަމަށް އެމްޑީޕީން ބުނެއެވެ.
ޝަރީޢަތަށާއި ފަނޑިޔާރުންނަށް ނުފޫޒު ފޯރުވުމަށް އެއްވެސް ފަރާތަކުން ހިންގާ ދަށު ދަރަޖައިގެ ޢަމަލުތަކަކީ ޕާޓީން ސީރިއަސް މައްސަލަތަކެއްގެ ގޮތުގައި ދެކޭނޭ މައްސަލަތަކެއް ކަމަށާއި އަދި އެފަދަ ޢަމަލުތަކަކީ އެމްދީޕީން ތަހައްމަލު ކުރާނެ ކަމަށް ނޫން ކަމެއް ވެސް ބުންޏެވެ.
