އައްޑޫ ސިޓީން އިތުރު 32 މީހުން ޕޮޒިޓިވް
5 ސެޕްޓެމްބަރު 2021 | އާދީއްތަ 02:05އެކްޓިވް ކޭސްގެ އަދަދު މިވަނީ 270ށް އަރާފައި
އައްޑޫ ސިޓީގައި އަނެއްކާވެސް ކޮވިޑްގެ ހާލަތު ގޯސް
އައްޑޫ ސިޓީން އިތުރު 32 މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
އައްޑޫ އިކުއެޓޯރިއަލް ހޮސްޕިޓަލުން އެންމެ ފަހުން އާއްމުކުރި ތަފާސްހިސާބުތައް ދައްކާގޮތުން ހޮނިހިރު ދުވަހުގެ ހަވީރު 6 ޖެހުމާ ހަމައަށް ފެނުނު 32 ކޭސްގެ ތެރެއިން 21 ކޭސް ފެނިފައިވަނީ މަރަދޫންނެވެ. އަދި ހިތަދޫއިން 10 ކޭސް، މަރަދޫފޭދޫން އެއް ކޭސް ފެނިފައިވެއެވެ.
މީގެތެރޭގައި ހިމެނޭ 24 މީހުން ޕޮޒިޓިވްވެފައިވަނީ ޑައިރެކްޓް ކޮންޓެކްޓް ސާމްޕަލްގެ ތެރެއިންނެވެ. އަދި ފްލޫ ކްލިނިކަށް ދެއްކި 4 މީހުންނާއި، ރެންޑަމް ސާމްޕަލްގެ ތެރެއިން ވެސް 3 މީހުންވަނީ ޕޮޒިޓިވްވެފައެވެ.
އައްޑޫގެ އަވަށްތަކުގެ ތެރެއިން އެންމެ ގިނަ އަދަދަކަށް އެކްޓިވް ކޭސް މިހާރު އުޅެނީ މަރަދޫގައެވެ. އެގޮތުން މަރަދޫގައި ކޮވިޑްގެ 139 ކޭސް އުޅޭއިރު، ހިތަދޫގައި 79 ކޭސް، ފޭދޫގައި 17 ކޭސް، މަރަދޫފޭދޫގައި 9 ކޭސް، ހުޅުދޫގައި ތިން ކޭސް، ގަމުގައި އެއް ކޭސް އަދި މީދޫގައި 22 އުޅޭ ކަމަށް ހޮސްޕިޓަލުން ބުނެއެވެ. އެއާއެކު އައްޑޫ ސިޓީގެ އެކްޓިވް ކޭސްތަކުގެ އަދަދު މިވަނީ 270ށް އަރާފައެވެ.
އައްޑޫ ކޮވިޑް ފެސިލިޓީގައި ފަސް މީހަކަށް ފަރުވާ ދެމުންދާއިރު، މި ބަލީގައި އައްޑޫ ސީޓީން ވަނީ ތިން މީހަކު ނިޔާވެފައެވެ.
ޕޮޒިޓިވް ކޭސްތަކާ ގުޅިގެން އައްޑޫ ސިޓީ މިހާރު ވަނީ މޮނީޓަރިން ހާލަތަށް ގެނެސްފައެވެ.
