މަންދީއަށް ހަމަލާދިން ޖަޒީލުގެ ބަންދަށް 15 ދުވަސް
4 ސެޕްޓެމްބަރު 2021 | ހޮނިހިރު 15:13ފުރިހަމަ ޖިނާއީ ތަހުގީގެއް ކުރުމަށް ފުލުހުންނަށް ވަނީ ހުށައަޅާފައި
އެމްޑީޕީ އޮފީހުގައި ހިނގި މާރާމާރީ- ޖަޒީލް މަންދީއަށް ހަމަލާދީފައިވަނީ ޗޭނުގަނޑަކުން
ސޯސަން މަގުގައި ހުންނަ އެމްޑީޕީ އޮފީހުގައި މާރާމާރީ ހިންގި އަޙުމަދު ޖަޒީލުގެ ބަންދަށް ކްރިމިނަލް ކޯޓުން 15 ދުވަސް ޖަަހައިފިއެވެ.
ބުރާސްފަތި ދުވަހުގެ މެންދުރު ހިނގި މި މާރާމާރީގައި އެމްޑީޕީގެ ސެކެޓްރޭޓިއަޓްގައި މަސައްކަތްކުރާ މަރިޔަމް ޒުބައިރު(މަންދީ) ގެ ބޮލަށް ބޮޑެތި އަނިޔާތަކެއް ލިބިފައިވެއެވެ. މަންދީ އަކީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ ގޮނޑި ތަމްސީލުކުރައްވާ އެމްޑީޕީގެ މެމްބަރ މީކާއީލް އަހުމަދު ނަސީމުގެ މަންމައެވެ. އެމްޑީޕީ އޮފީހުގައި ހިންގި މާރާމާރީއާ ގުޅިގެން އެކި ގޮތްގޮތަށް ވާހަކަތައް ދައްކަމުން އަންނައިރު, މީކާއީލް ވަނީ މަންމައަށް ދިން ހަމަލާއަކީ ރާވައިގެން ޓާގެޓްކޮށްގެން ދީފައިވާ ސިޔާސީ ހަމަލާއެއް ނޫންކަމަށް ވިދާޅުވެފައެވެ.
މަންދީއަށް ހަމަލާދީފައިވާ ޖަޒީލަކީ އެމްޑީޕީ އޮފީހުގެ ޕިއޯނުކަމުގެ ވަޒީފާ އަދާކުރަމުންދާ މީހެކެވެ. މަންދީއަށް ހަމަލާދީފައިވަނީ ޗޭނުގަނޑަކުންނެވެ. މިހަމަލާގައި މަންދީގެ އިތުރުން އެހެން މުވައްޒަފަކަށްވެސް އަނިޔާވެފައިވެއެވެ. މަންދީއަށް އަމާޒުވި ހަމަލާއަކީ މަސްތުގެ ހާލަތުގައި ހުރެގެން ދިން ހަމަލާއެއްކަމަށް މައުލޫމާތު ލިބެއެވެ.
މި މައްސަލައާ ގުޅިގެން ޖަޒީލް ހައްޔަރުކޮށް ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ ޖަޒީލުގެ ބަންދަށް 15 ދުވަސް ޖަހާފައެވެ. އެގޮތުން ޖަޒީލުގެ ބަންދުގެ މުއްދަތު އިތުރު ނުކޮށްފިނަމަ، މިހާރު އޮތް ބަންދުގެ މުއްދަތު ހަމަވާނީ 19 ސެޕްޓެމްބަރު 2021 އަށެވެ.
މި މައްސަލައިގެ އަވަސް އަދި ފުރިހަމަ ޖިނާއީ ތަހުގީގެއް ކުރުމަށް މޯލްޑިވްސް ޕޮލިސް ސަރވިސްއަށް އެމްޑީޕީން ވަނީ ގޮވާލާފައެވެ. އަދި މިމައްސަލަ އެމްޑީޕީގެ ފަރާތުން ފުލުހުންނަށް ހުށަހަޅާފައިވާކަމަށްވެސް, އެޕާޓީން މިކަމާއި ގުޅިގެން ނެރެފައިވާ ބަޔާނެއްގައި ވަނީ ބުނެފައެވެ.
