ވަށް ތަކެތީގެ ބާބާއި ވަށްރޮށީގެ ވާހަކަ!

މީހަކާމެދު ނުރުހިގެން އެމީހަކާ ދިމާއަށް ހެއްދެވި ނެހެއްދެވިއަށް ގޮވައި ހިތަށް އައިހާ ގޮވެލިފައްޗެއް ގޮވުމަށް މަޖާޒީގޮތުން ބުނެވޭ ބަހަކީ ވައްވައްޖެހުމެވެ. މީހަކު ދެރަކޮށް ނިކަމެތިކޮށްލުމުގެ ގަސްތުގައި ހަގީގަތާ ޚިލާފު ވާހަކަތަކެއް ހަދަހަދައިގެން ގޮވުންވެސް ހިމެނެނީ މި ގިންތީގައެވެ. ޕީޕީއެމް-ޕީއެންސީ ކޯލިޝަނުގެ ފަރާތުން ހުކުރުދުވަހުގެރޭ މާލޭގައި ބޭއްވި ޖަލްސާގައި ވަށް އެއްޗިއްސާއި ރައީސް އިބްރާހިމް މުހައްމަދު ސާލިހާ ގުޅުވައިގެން ބައެއް ބޭފުޅުން ދެއްކެވި ވާހަކަފުޅުތައް ވެސް އަޅުގަޑުގެ ނަޒަރުގައި ފެތެނީ މި ގިންތިއަށެވެ.

ނައިފަރު ދާއިރާގެ މަޖިލީސް މެންބަރު އަދި ޕީޕީއެމްގެ ނާއިބުރައީސް އަހުމަދު ޝިޔާމް ވިދާޅުވިއެވެ. ރައީސް ސާލިހަށް އެނގިވަޑައިގަންނަވާ ހަމައެކަނި ކަމަކީ ވަށްކޮށް ރޮށި ފިހުމެވެ. މާލޭ ސިޓީ ކައުންސިލްގައި ހިމެނިވަޑައިގަންނަވާ ކައުންސިލަރަކު ވިދާޅުވިއެވެ. ރައީސް ސާލިހަކީ ވަށްކޮށް ފިހެފައިވާ ރޮށްޓެކެވެ. ދެން މިހެންގޮސް ވަށްރޮށްޓާއި ގުޅުވައިގެން އެބޭފުޅުން މިޒާތަކުން ލައްކަ ގިނަ ވާހަކަ ދެއްކެވިއެވެ. މިއަޑު އަހާން އިނދެފައި ހިތުގައި ޖެހުނެވެ. ސިޔާސީގޮތުން މިހާރު އެންމެ ހަލުވިކޮށް ވިއްކެނީ ވަށްކޮށް ފިހާ ރޮށްޓާއި ވަށް ތަކެތި ބާވަައެވެ. ވަށް ތަކެތީގެ ބާބުގައި އޮތީ ވަށްރޮށީގެ ނަން އެކަނިބާވަަައެވެ.

ރައީސް ސާލިހު 2018 ވަނަ އަހަރުގެ ތެރޭގައި ދެއްވި އިންޓަރވިޔުއެއްގައި އެމަނިކުފާނުގެ އާއިލީ ދިރިއުޅުއްވުމާއި ސާދާ މިޒާޖާއި އާދަތަކުގެ ވާހަކަ ދެއްކެވިއިރު އަމިއްލަފުޅު ކަންކަން އަމިއްލަފުޅަށް ކުރައްވަމޭ ވިދާޅުވިއެވެ. ވަށްކޮށް ރޮށި ދަމަން އެނގޭ ކަމަށްވެސް ވިދާޅުވިއެވެ. އެނޫންވެސް ކިތަންމެ ވާހަކައެއް ވިދާޅުވިއެވެ. މީގެ ތެރެއިން ވަށްރޮށީގެ ވާހަކަ ނައިފަރު ދާއިރާގެ މެންބަރު އަހުމަދު ޝިޔާމު އެ ނެންގެވީ އެއީ ދެރަކަމަކަށް ހައްދަވައިގެންނެވެ. އެއީ ފިރިހެނުންނާ އަރަފޯދިގެން ނުވާ ކަމެކޭ ހީފުޅު ކުރައްވައިގެންނެވެ. ބަދިގެޔަކީ ފިރިހެނުންގެ ތަނެއް ނޫނޭ އެއީ އަންހެނުންނަށް ޚާއްސަ ތަނެކޭ ހީކުރައްވައިގެންނެވެ. ރައީސް ސާލިހަށް ފުރައްސާރަކުރައްވައި ދެރަކޮށްލެއްވުމުގެ ގޮތުންނެވެ.

އަހުމަދު ޝިޔާމަށް އެނގިވަޑައިނުގަންނަވާ އެއްޗަކީ މިޒާތުން މީހުންނާއި ފޮށުމާއި ފުރައްސާރަ ކުރުމަށް ވާވުން ފެށޭ މަޖާޒީބަހެއް އޮންނަކަމެވެ. އަދި ފިލިކޯޅި ހަމަކޮށްގެން މިޒާތަށް ކިޔޭނޭ ކިތަންމެ ބަހެއް ދިވެހިބަހުގައި އެބައޮތްކަމެވެ. ދެންވާނީވެސް އެހެންނެވެ. ހުވަދުއަތޮޅު ބަހުރުވައިން ވަށްޑެއްޔާއޭ ކިޔުނު ބަހެއް އޮވެއެވެ. އެއީ ފެންހެދިފައި އޮންނަ ކުދިކުދި ވަޅުވަޅުގަނޑެވެ. އެކަހަލަ ވަޅުގަނޑަކަށް ވެއްޓި އޭގެތެރޭގައި ތާށިވީމާ ދެން ބޭރުގައި ހިނގާ ކަންކަމާއި އެހެން މީހުން އުޅޭނޫޅޭ ގޮތް ނުފެނިދާނެއެވެ. ނޭނގިދާނެއެވެ. މިއީވެސް އެޒާތުގެ ކަމެކޭ ހީވެއެވެ. އެޗްޕީއޭގެ ގައިޑްލައިން އޮތްތާކު ބާއްވަވާފައި ވަށްޓެއްގައި ކަނޑޫޖަހާފައި ހުރިހެން އެބޭކަލުން މި ޖަލްސާއެއްގައި އެތުރިގެން ތިއްބެވި ތިއްބެވުން މައިގަޑު ގޮތެއްގައި އަޅުގަޑަށް ސިފަކުރެވުނީ ވަށްޑެއްޔާއެކެވެ.

ވައްކަން ކުރުމަށްވުރެ ވަށްކޮށް ރޮށި ދަމަން އެނގުމުގެ ހެޔޮކަންވެސް މާބޮޑެވެ. ރައީސް ސާލިހުގެ އިންޓަރވިޔުއެއްގައި ވެސް އަދި ތަގުރީރެއްގައި ވެސް ވައްކަން ކުރަމެކޭ ވިދާޅެއް ނުވެއެވެ. އަދި ވައްކަމަށް ހިތްވަރު ދެއްވާފައެއްވެސް ނުވެއެވެ. ގެޔަށް ހަރާން ފައިސާ ވަދެޔޭ ވައްދަމޭ ވިދާޅެއް ނުވެއެވެ. ފައިސާވިއްޔާ އަންހެނުންވެސް ހަރާން ހަލާލުގެ ވާހަކައިން ސުވާލު ނުކުރާނެޔެކޭ ވިދާޅެއް ނުވެއެވެ. ގޮތްނޭނގޭ ފައިސާތަކެއް އެމަނިކުފާނުގެ ބޭންކް އެކައުންޓަކަށް ވަދެގެން ތަހުގީގީ އިދާރާޔަކުން ތަހުގީގެއް ހިންގަން ޖެހިފައެއްވެސް ނެތެވެ. އަދި ވައްކަމުގެ މައްސަލައެއްގައި ފަނޑިޔާރު ގެޔަކުން ނިޔާއެއްވެސް އިއްވައިފައެއް ނެތެވެ.

ވާވުން ފެށޭ ކުރު ބަސްބަސް އަމުނައިގެން ގަތައިގެން ވަށްރޮށީގެ ވާހަކަ ދެއްކެވި ބޭފުޅުންގެ ތަގުރީރުން ވައްކަން މި ލަފުޒު ވަނީ އުނިކުރައްވައިފައެވެ. އެއީ އެބޭފުޅުންނަށް ދެއްކެން އޮތް ވާހަކައަކަށް ނުވަނީ ކަމަށް ވެދާނެއެވެ. އެކަމަކު މުޅިޔަކުން އެހެނެއްވެސް ނޫނެވެ. ނުދެއްކޭނޭ ނުވަތަ ދައްކަން ފުރުސަތެއް ނެތް ކިތަންމެ ކިތަންމެ ވާހަކައެއް އެބޭފުޅުން ދެއްކެވިއެވެ. ކޯޓުތަކާއި ގުޅުވައިގެން ބައެއް ބޭފުޅުން ދެއްކެވި ނަޖިހުގެ ވާހަކައަކީ މިކަމުގެ މިސާލެކެވެ.

ކޯޓުތަކުގެ ފުރާޅުން ޓިނު ނައްޓައިގެން ފަނޑިޔާރުން ވަގަށް ނެގުމާއި މީސްމީހުން ފްރޭމްކުރުމާއި ކުއްލިޔަކަށް ވުޖޫދުވާ ކަޅުފޮށްޓާއި ކަޅުދަބަހާއި މިހިރަ މިހަރަ ކަންކަމަކީ އެވެރިން ސަރުކާރު ހިންގި ދުވަސްވަރު ނިކަން ފަރިތަކޮށް ހިންގި ކަންކަމެވެ. ދުނިޔެއަށް ވެސް މި މަންޒަރުތައް ބަލަން ނުކެރިގެން ހޯހޯއޭ ގޮވާން ޖެހުނު ކަންކަމެވެ. މިކަން މިމަގުން ހިންގާން އުޅެއުޅެފައި އަދި ރައްޔިތުން އިންތިޚާބު ކުޅަޔަސް ވެރިކަން ހަވާލެއްވެސް ނުކުރާނަމޭ ބުނެ ބޮޑާ ހޭކި މީހުން މިއަދު މިދައްކަނީ ކޮން ނަޖިހެއްގެ ވާހަކަ ބާވައެވެ؟ ނަޖިހެެއް ފެނުނަސް އެއީ ނަޖިހެެއްކަން އެނގޭނޭބާވައެވެ؟ ވާވުގައި އަބަފިލިޖެހިގެން ދެން ށަވިޔަނި ސުކުނާއި އަލިފު ސުކުން ކުރެވޭ ބަސްބަހުގެ ގިނަކަމާއި މާނައިގެ ތަފާތުކަން އެނގޭބާވައެވެ؟