ފުރަތަމަ ޑޯޒް ފުރިހަމަކުރި މީހުންގެ އަދަދު 385،383ށް އަރައިފި
ބުރާސްފަތި ދުވަހު ކޮވިޑް ވެކްސިންގެ ފުރަތަމަ ޑޯޒް ޖެހީ 404 މީހުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ރާއްޖޭގައި ކޮވިޑް-19ން ދިފާއުވުމަށް ކޮވިޑް ވެކްސިންގެ ފުރަތަމަ ޑޯޒް ޖެހި މީހުންގެ އަދަދު 385،383ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ބުރާސްފަތި ދުވަހު ކޮވިޑް ވެކްސިންގެ ފުރަތަމަ ޑޯޒް 404 މީހުން ވަނީ ޖަހާފައެވެ. އޭގެތެރޭގައި ހިމެނެނީ މާލެ ސަރަހައްދުން ފުރަތަމަ ޑޯޒް ޖެހި 319 މީހުންނާއި އަތޮޅުތަކުން ވެކްސިން ޖެހި 85 މީހުންނެވެ.
ބުރާސްފަތި ދުވަހު ދެ ވަނަ ޑޯޒް ޖަހާފައިވަނީ 301 މީހުންނެވެ. އެއީ މާލެ ސަރަހައްދުން ދެ ވަނަ ޑޯޒް ޖެހި 178 މީހުން އަދި އަތޮޅުތަކުގައި ދެ ވަނަ ޑޯޒް ޖެހި 123 މީހުންނެވެ. މިއާއެކު ރާއްޖޭގައި ކޮވިޑް ވެކްސިންގެ ދެ ޑޯޒް ޖެހި މީހުންގެ އަދަދު ވަނީ 303،430ށް އަރާފައެވެ.
މިދިޔަ އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިން ޖެހުމަކީ މި ސަރުކާރުގެ އަމާޒެކެވެ. މި އަމާޒަށް ވަސިލުވުމަށް ކެމްޕޭނެއް ވެސް ކުރިއަށް ގެންގޮސްފައި ވެއެވެ. އެހެންނަމަވެސް އޮގަސްޓު މަސް ނިމުނުއިރު ވެކްސިން ޖެހުނީ އާބާދީގެ 85 އިންސައްތަ މީހުންނަށް ކަމަށް ސަރުކާރުން ވަނީ ބުނެފައެވެ. މި ވެކްސިން ޕްރޮގްރާމުތައް އަދިވެސް ކުރިއަށްދާއިރު، ވީހާވެސް އަވަހަކަށް ވެކްސިން ފުރިހަމަކުރުމަށް ސަރުކާރުން ގެންދަނީ ބާރު އަޅަމުންނެވެ.
ވެކްސިން ފުރިހަމަނުކުރާ މީހުންނާމެދު ފިޔަވަޅު އަޅަން ސަރުކާރުން ނިންމާފައިވާއިރު، ސެޕްޓެމްބަރ މަހުން ފެށިގެން ވަނީ ވެކްސިން ނުޖަހާ މީހުންނަށް އެތެރޭގެ އުދުހުންތަކުން ދަތުރުނުކުރެވޭގޮތަށް ނިންމާފައެވެ. ވެކްސިންގެ އެއްވެސް ޑޯޒްއެއް ނުޖަހާ މީހުންނަށް ކެފޭ ރެސްޓޯރަންޓްތަކުގެ އެތެރޭގައި ޚިދުމަތް ދިނުން މަނާކުރުމަށް ނިންމާފައިވީނަމަވެސް އެ މީހުންނަށް ޓޭކްއަވޭގެ ޚިދުމަތް ލިބޭނެ ކަމަށް ސަރުކާރުން ހާމަކޮށްފައިވެއެވެ.
