މާފުށި ޖަލު ކުއްލި ހާލަތަށް: ރައީސް ޔާމީން ޖަލަށް ބަދަލުކުރުން އަނެއްކާވެސް ފަސްވެއްޖެ
3 ސެޕްޓެމްބަރު 2021 | ހުކުރު 06:33މާފުށީ ޖަލުން އޮފިސަރަކު ވަނީ ޕޮޒިޓިވްވެފައި
ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ޕޮލިހައް ހާޒިރުކުރުން-- ފޮޓޯ : ޔޫސުފް ސޮފްވާން
ކުރީގެ ރައީސް އަބްދުﷲ ޔާމިން އަނބުރާ ޖަލަށް ބަދަލުކުރެވޭނީ ކިހާތަނަކު ކަމެއް އަދި ކަނޑަނޭޅޭ ކަމަށް ކަރެކްޝަންސްއިން ބުނެފިއެވެ.
ކޮވިޑް-19 ގެ ހާލަތާ ގުޅިގެން ރައީސް ޔާމީން ހިމެނިވަޑައިގަންނަވާހެން ހައިރިސްކު ގައިދީން ވަނީ ގެއަށް ބަދަލުކޮށްފައެވެ. ގެއަށް ބަދަލުކުރި ހައި ރިސްކު ގައިދީން ޢީދު ބަންދަަށްފަހު އަނބުރާ ޖަލަށް ބަދަލުކުރުމުގެ މަޝްވަރާތައް ކުރައްވަމުން ގެންދަވާ ކަމަށް ކޮމިޝަނަރ އޮފް ޕްރިޒަންސް އަޙުމަދު މުޙައްމަދުފުޅު ވަނީ ރާއްޖެއެމްވީއަށް ވިދާޅުވެފައެވެ. މި މަޝްވަރާތައް ކުރިއަށްދާކަމަށް ކަރެކްޝަންސްއިން ބުނެފައިވާ ދަނޑިވަޅެއްގައި މާފުށި ޖަލުގައި މަސައްކަތްކުރާ އޮފިސަރަކު ކޮވިޑަށް ޕޮޒިޓިވްވުމާ ގުޅިގެން ޖަލު ވަނީ ކުއްލި ހާލަތަށް ގެނެސްފައެވެ.
މިކަމާ ގުޅިގެން ރާއްޖެއެމްވީން ކުރި ސުވާލަކަށް ޖަވާބުދެއްވަމުން މޯލްޑިވްސް ކަރެކްޝަނަލް ސާވިސްގެ މީޑިއާ އޮފިސަރ ވިދާޅުވީ މިހާރު ޖަލު އޮތް ހާލަތުން އާންމު ހާލަތަށް ގެނައުމަށް ވެސް ގިނަ ދުވަސްތަކެއް ނަގާނެ ކަމަށެވެ. އެހެންކަމުން ރައީސް ޔާމީން ޖަލަށް ބަދަލުކުރެވޭނީ ކިހާ ތަނަކު ކަމެއް އަދި ކަނޑަނޭޅޭ ކަމަށެވެ.
އަދިވެސް ރައީސް ޔާމީން ހުންނެވީ އެމަނިކުފާނުގެ ގެކޮޅުގައެވެ. އެމްއެމްޕީއާރުސީގެ ޚިޔާނާތުގެ ތެރެއިން މަނީ ލޯންޑަރކުރުމުގެ ކުށް ސާބިތުވެ، ފަސް އަހަރު ދުވަހުގެ ޖަލު ހުކުމެއް ރައީސް ޔާމީން ތަންފީޒު ކުރައްވަމުން ގެންދަވާއިރު، މިހާރުވެސް ކްރިމިނަލް ކޯޓުގައި، ރ. ފުއްގިރި މައްސަލާގައި, މަނީ ލޯންޑަރކުރުމާއި ރިޝްވަތު ގަބޫލުކުރުމުގެ ކުށުގެ ދައުވާގެ ޝަރީޢަތުގެ އަޑުއެހުންތަކެއް ކުރިއަށްދެއެވެ.
އޭގެއިތުރުންވެސް، އެމްއެމްޕީއާރުސީގެ މައްސަލަތަކެއް ފުލުހުންނާއި އެސެޓް ރިކަވަރީ ކޮމިޝަން އަދި އެންޓި ކޮރަޕްޝަން ކޮމިޝަން ގުޅިގެން ތަހުގީގު ކުރަމުންދެއެވެ.
އެމްއެމްޕީއާރުސީގެ ޚިޔާނާތުގައި ގިނަ އަދަދެއްގެ ފަޅުރަށްތަކަކާއި ފަޅުތަކެއް ވިއްކައިގެން ދައުލަތަށް ލިބެންޖެހޭ 1.23 ބިލިއަން ރުފިޔާއަށް ރައީސް ޔާމީންގެ ސަރުކާރުން ވަނީ ޚިނާޔާތްތެރިވެފައެވެ. އެމްއެމްޕީއާރުސީގެ ޚިޔާނާތަކީ 1.23 ބިލިއަން ރުފިޔާގެ ޚިޔާނާތެއްކަމަށް އޮޑިޓް އޮފީހުން ނެރުނު ޚާއްސަ އޮޑިޓް ރިޕޯޓްގައި ފާހަގަކުރިނަމަވެސް، އެމްއެމްޕީއާރުސީން ފަޅު ރަށްތަކާއި ފަޅުތައް ވިއްކާފައިވަނީ ނުއަގުގައެވެ. އެހެންކަމުން ރާއްޖޭގެ އިޤްތިޞާދު ދިރާސާކުރާ ފަރާތްތަކުން ބުނާގޮތުގައި އެމްއެމްޕީއާރުސީގެ ޚިޔާނާތަކީ ހަތަރު ބިލިއަން ރުފިޔާގެ ބޮޑު ޚިޔާނާތެއްކަމަށެވެ.
