އަނގޮޅިތީމު ބަނދަރުގެ 53 އިންސައްތަ މަސައްކަތް ނިމިއްޖެ
މިއީ 40.7 މިލިއަން ރުފިޔާގެ މަޝްރޫއެއް
ރ.އަނގޮޅިތީމު ބަނދަރު ސަރަހައްދު
ރ. އަނގޮޅިތީމު ބަނދަރުގެ ޕޭވްމެންޓް ހެދުމުގެ މަސައްކަތް ނިމިއްޖެއެވެ.
ރ.އަނގޮޅިތީމު ބަނދަރު ތަރައްޤީ ކުރުމުގެ މަޝްރޫއުގެ ދަށުން ބަނދަރުގެ ޕޭވްމެންޓް ހެދުމުގެ މަސައްކަތް ބުރާސްފަތި ދުވަހު ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ)އިން ވަނީ ބުނެފައެވެ. މި މަޝްރޫއުގެ 53 އިންސައްތަ މަސައްކަތް މިހާރު ނިމިފައިވާކަމަށް އެކުންފުނިން ވަނީ ހާމަކޮށްފައެވެ.
މި މަޝްރޫޢުގެ ދަށުން، 42،615 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 221 މީޓަރުގެ ސަރަޙައްދެއްގައި ބޭރުތޮށި ލުމާއި، 166 މީޓަރުގެ ސަރަޙައްދެއްގައި ރިވެޓްމެންޓް ޖެހުން ހިމެނެއެވެ. އަދި 91 މީޓަރުގެ ސަރަޙައްދެއްގައި އެއްގަމުތޮށި ލުމާއި، 1،110 އަކަ މީޓަރުގެ ސަރަޙައްދެއްގައި ޕޭވްމެންޓް ހެދުމާއި، މަގުބައްތި ހަރުކުރުމާއި ނެރުބައްތި ހަރުކުރުމުގެ މަސައްކަތް ވެސް މި މަޝްރޫޢުގައި ހިމެނޭކަމަށް އެމްޓީސީސީން ވަނީ ބުނެފައެވެ.
އަދި މި މަޝްރޫއަކީ މިނިސްޓްރީ އޮފް ނެޝަނަލް ޕްލޭނިން، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ 40.7 މިލިއަން ރުފިޔާގެ މަޝްރޫއެކެވެ.
