މި ސަރުކާރުން ތާރުއަޅައި ނިންމި އަމީނީމަގުގެ އެންމެފަހު ސެގްމަންޓް ހަލާކުވުމުން އަލުން މަގު މަރާމާތުކުރުމުގެ މަސައްކަތް ނޮވެމްބަރަށް ނިންމަނީ
6 އޯގަސްޓު 2026 | ބުރާސްފަތި 08:28އަމީނީމަގުގެ ފަހު ސެގްމަންޓުގެ ތާރުގަނޑު ހަލާކުވުމާ ގުޅިގެން، އެ ސަރަހައްދު މަރާމާތުކުރުމުގެ އަމަލީ މަސައްކަތް އެމްޓީސީސީން މިހާރު ވަނީ ފަށާފައި. މި މަސައްކަތުގެ ދަށުން ތާރުގަނޑު އަލުން އެޅުމާއި ބަސް ހުއްޓިތައް ހިމެނޭ ސަރަހައްދުގެ ޕޭވްމަންޓަށް ބަދަލު ގެނައުމަށް ހަމަޖެހިފައިވާއިރު، މުޅި މަޝްރޫއު ނޮވެމްބަރު މަހުގެ ނިޔަލަށް ނިންމުމަށް ވަނީ އަމާޒު ހިފާފައި
އަމީނީ މަހުގެ ފަހު ދެ ސެގްމެންޓްގެ މަސައްކަތް ދެވަނަ ފަހަރަށް ތަރައްގީ ކުރުމުގެ މަސައްކަތް ކުރަނީ | ރާއްޖެއެމްވީ
މި ސަރުކާރުން ތާރުއަޅައި ނިންމި އަމީނީމަގުގެ އެންމެފަހު ސެގްމަންޓު ހަލާކުވުމާ ގުޅިގެން، އެ ސަރަހައްދު އަލުން މަރާމާތުކޮށް ތާރުއެޅުމުގެ މަސައްކަތް އަންނަ ނޮވެމްބަރު މަހުގެ ތެރޭގައި ނިންމުމަށް ހަމަޖެހިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފި އެވެ.
އަމީނީމަގުގެ ހުޅަނގަށްވީ ފަރާތުގެ އެކި ސަރަހައްދުތަކުން ތާރުގަނޑު އުފުލި، މަގު ވަރަށް ބޮޑަށް ހަލާކުވެފައިވާތީ، އެ މަގު މަރާމާތުކުރުމުގެ އަމަލީ މަސައްކަތް އެމްޓީސީސީން ފަށާފައިވަނީ މި އޮގަސްޓު މަހުގެ 3 ވަނަ ދުވަހު އެވެ. އަމީނީމަގު މަރާމާތުކުރުމުގެ މަސައްކަތް އެމްޓީސީސީއާއި ހަވާލުކޮށްފައިވަނީ މި އަހަރުގެ ޖޫން މަހުގެ 15 ވަނަ ދުވަހު އެވެ.
މަރާމާތުގެ މަސައްކަތް ކުރިއަށްދާތީ، މިހާރު ވަނީ އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލް ކައިރީގައިވާ ޕާކާ ހަމައަށް އަމީނީމަގު ބަންދުކޮށްފަ އެވެ. އަމީނީމަގަކީ ނިމިދިޔަ އެމްޑީޕީ ސަރުކާރުން 84.4 މިލިއަން ރުފިޔާ ހަރަދުކޮށްގެން، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްގެން ކުރިއަށްގެންދިޔަ މަޝްރޫއެކެވެ. ނަމަވެސް އެމްޑީޕީ ސަރުކާރު ނިމުނުއިރު ތާރުއަޅާ ނިމުނީ އަމީނީ މަގުގެ 90 އިންސައްތަ އަށެވެ. އެގޮތުން ކުރީގެ ހައުސިންގ މިނިސްޓްރީއާ ހަމައަށް އޭރު ތާރުއަޅާ އެއްކޮށް ނިންމާލި އެވެ.
ސަރުކާރު ނިމުނުއިރު ވެސް މަގު ހެދުމުގެ މަސައްކަތް އެއްކޮށް ނިންމާނުލެވުނު ކަމަށް ބުނެ، ކުރީގެ ހައުސިންގ މިނިސްޓްރީން ފެށިގެން ދަރުމަވަންތަ ހޮސްޕިޓަލް ކައިރީގައިވާ ޕާކާއި ހަމައަށް ހަލުވި ދުވެއްޔެއްގައި ތާރުއަޅައި އެއްކޮށް ނިންމާލި އެވެ. އަމީނީމަގުގެ ހަލާކުވެގެން އަލުން މަރާމާތުކުރަން ޖެހުނީ އެ ސަރަހައްދެވެ. އެ މަގު ހަލާކުވާން މެދުވެރިވީ، މަގުގައި ތާރުއެޅުމަށްފަހު، ތާރުގަނޑު ރަނގަޅަށް ނުހިކެނީސް އާންމު ދަތުރުފަތުރަށް މަގު ހުޅުވާލުމުގެ ސަބަބުން ކަމަށް ކަމާ ގުޅުންހުރި ޓެކްނިކަލް ފަރާތްތަކުން ބުނެ އެވެ.
އަމީނީމަގު ތަރައްގީކޮށް އާންމު ދަތުރުފަތުރަށް ހުޅުވާލިތާ ގިނަ ދުވަސްތަކެއް ނުވަނީސް މަގު ހަލާކުވެ، ދެވަނަ ފަހަރަށް މަގު މަރާމާތުކުރަން ޖެހުމުން ގިނަ ބައެއްގެ ފާޑުކިޔުން ވަނީ މި ސަރުކާރަށާއި ރައީސް ޑރ. މުހައްމަދު މުއިއްޒަށް އަމާޒުވެފަ އެވެ.
އަމީނީމަގު މަރާމާތުކުރުމުގެ މަސައްކަތުގެ ދަށުން މަގުގައި އަޅާފައިވާ ތާރުގަނޑު ނަގައި އަލުން ތާރުއެޅުމުގެ މަސައްކަތުގެ އިތުރުން، ބަސް ހުއްޓިތައް ހިމެނޭ ސަރަހައްދުތަކުގެ ޕޭވްމަންޓް ޑިޒައިނަށް ބަދަލުތަކެއް ގެނައުމަށް ވަނީ ހަމަޖެހިފަ އެވެ.
