ދައުރު ނިމުމުގެ ކުރިން ޖޭއެސްސީއަށް ގެންނަންޖެހޭ ބަދަލުތައް ގެންނާނެ: މަބްރޫކް
2 ސެޕްޓެމްބަރު 2021 | ބުރާސްފަތި 01:39ޖޭއެސްސީއަށް ބަދަލުތަކެއް ގެނައުމަކީ މި ސަރުކާރުގެ ވައުދެއް
ރައީސް އޮފީހުގެ ތަރުޖަމާނު މަބްރޫކް އަޒީޒު
ވައުދާ އެއްގޮތަށް ދައުރު ނިމުމުގެ ކުރިން ޖުޑީޝަލް ސާވިސް ކޮމިޝަނަށް ގެންނަންޖެހޭ ބަދަލުތައް ގެންނާނެ ކަމަށް ރައީސް އޮފީހުން ބުނެފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ޖޭއެސްސީ އެކުލަވާލާފައިވާ ގޮތަށް ގެންނަންޖެހޭ ބަދަލުތައް ގެނައުމުގައި ލަސްތަކެއް އެބަހުރި ކަމަށެވެ. އެހެން ނަމަވެސް މި ދައުރު ނިމުމުގެ ކުރިން އެ ބަދަލުތައް ގެންނާނެ ކަމަށާއި، ގެންނަ ބަދަލުތަކަކީ ރައްޔިތުންގެ އިތުބާރު އެ މުއައްސަސާއަށް ލިބޭނެ ފަދަ ބަދަލުތަކަކަށް ވާނެ ކަމަށް މަބްރޫކް ވިދާޅުވިއެވެ. މި މަސައްކަތް ނިމޭނެ މުއްދަތެއް ނުދެވުނު ނަމަވެސް މި ދައުރުގެ ތެރޭގައި މި މަސައްކަތް ނިންމާނެ ކަމުގެ ޔަގީންކަން މަބްރޫކް ވަނީ ދެއްވާފައެވެ.
މަބްރޫކް ވިދާޅުވީ ޖޭއެސްސީއަށް ގެންނަންޖެހޭ ބަދަލުތައް ގެނައުމަށް ރައީސުލްޖުމްހޫރިއްޔާ ވަނީ ގާނޫނީ މާހިރުންގެ ލަފާ ހޯއްދެއްވުމަށް އެދިވަޑައިގެންފައި ކަމަށެވެ. މިކަން ކުރާނީ މިކަންކަމާ ގުޅުންހުރި މާހިރުންގެ ލަފާއާއެކު ކަން މަބްރޫކް ފާހަގަކުރެއްވިއެވެ.
ޖޭއެސްސީ އެކުލަވާލާފައިވާ ގޮތަށް ބަދަލުގެނައުމަކީ ރާއްޖޭގެ ޝަރުއީ ނިޒާމު ހަރުދަނާ ކުރުމަށް ކުރެވޭ މުހިންމު މަސައްކަތަކަށް ވާނެކަން މަބްރޫކް ފާހަގަކުރެއްވިއެވެ.
ފަނޑިޔާރުންގެ ކަންކަން ބަލަހައްޓާ، ޖޭއެސްސީއަށް ބަދަލުތަކެއް ގެންނެވުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުފުދުޅަކަށްވާއިރު، އެ ކޮމިޝަން ސިޔާސީ ނުފޫޒުން ސަލާމަތްކުރުމަކީ މި ސަރުކާރުން ވަކި ޚާއްސަ އިސްކަމެއް ދީގެން ކުރަމުން އަންނަ ކަމެކެވެ.
