ކ އަތޮޮޅުގައި ފިކްނިކް އައިލެންޑެއް ތަރައްގީ ކުރަނީ
މި މަޝްރޫއު ނިންމުމަށް ހަމަޖެހިފައިވަނީ 150 ދުވަހުގެތެރޭގައި
ޕިކްނިކް އައިލެންޑް ތަރައްގީ ކުރުމަށް އެމްޓީސީސީއާ ހަވާލުކުރުމުގެ ތެރެއިން
ކ.ކުޑަގިރީގައި ޕިކްނިކް އައިލެންޑެއް ތަރައްގީކުރުމަށް އެމްޓީސީސީއާ ހަވާލުކޮށްފިއެވެ.
އެމްޓީސީސީއާ ހަވާލުކޮށްފައިވާ މި މަޝްރޫއު ނިންމުމަށް ހަމަޖެހިފައިވަނީ 150 ދުވަހުގެތެރޭގައެވެ. މި މަޝްރޫއުގެދަށުން ކުޑަގިރީ ފަޅުން 8 ހެކްޓަރުގެ ބިން ހިއްކައި، 397.27 މީޓަރުގެ ބޮޑުހިލަ ޖެހުމާއި، 428.32 މީޓަރުގެ ބޮޑު ހިލައިގެ ގްރޯއިންސް ޖެހުން ހިމެނެއެވެ.
މި މަސައްކަތް އެމްޓީސީސީއާ ހަވާލުކޮށްފައިވަނީ، ސެޕްޓެމްބަރ މަހުގެ 1ވަނަ ދުވަހުއެވެ. މި މަސައްކަތް ހަވާލު ކުރުމަށް ޕްލޭނިންގ މިނިސްޓްރީގައި އޮތް ރަސްމިއްޔާތުގައި އެމްޓީސީސީގެ ސީއީއޯ އާދަމް ޢާޒިމް ވިދާޅުވީ، މަަސައްކަތުގެ އީއައިއޭ މަސައްކަތް މިހާރު ފަށާފައިވާ ކަމަށާއި، އެ މަސައްކަތް ނިމުމުން ބިންހިއްކަން ފަށާނެ ކަމަށެވެ.
ޕްލޭނިން މިނިސްޓްރީން ނިންމާފައިވަނީ ކުރިން ކުޑަ ބަނޑޮސް އޮތްގޮތަށް ޕިކްނިކް އައިލެންޑް ތަރައްގީކޮށް ނިންމަށެވެ. މާލެއާ ގާތްގަނޑަކަށް 10ވަރަކަށް ކިލޯމިޓަރު ދުރުގައި އޮންނަ ކުޑަގިރީ ފަޅުގައި ޕިކްނިކް އައިލެންޑަކާއި، ފިނޮޅެއްގެ ތަރައްގީ ކުރުމަށް ވަނީ ނިންމާފައެވެ. މިކަމަށް އާއްމުންގެ ޚިޔާލު ހޯދުމަށްވެސް ޕްލޭނިންގ މިނިސްޓްރީންވަނީ ހުޅުވާލާފައެވެ.
މާލޭގައި އުޅޭ މީހުން ދަތުރު ދިއުމަށް ރަށެއް ހަމަޖެއްސުމަކީ މި ސަރުކާރުން 100 ދުވަހުގެ ވައުދުތަކުގެ ތެރޭގައި ހިމެނޭ ކަމެކެވެ. މީގެ ކުރިން ޕިކްނިކް އައިލެންޑެއްގެ ގޮތުގައި، އެނބޫދޫފަޅުގައި ހިއްކާފައިވާ ރަށްތަކުގެ ތެރެއިން ރަށެއް ހަމަޖައްސައި އެ ރަށް ތަރައްގީ ކުރާނެ ގޮތާ ބެހޭ ގޮތުން އާންމުންގެ ޚިޔާލު ހޯދުމަށް ވެސް ހުޅުވާލިއެވެ.
