ކޮމިޓީގެ މަސައްކަތްތައް ނިންމުމަށްޓަކައި، ބުދަ ދުވަހު ޖަލްސާ ނުބާއްވަން ނިންމައިފި
މިހާރު ކުރިއަށްދާ މިއަހަރުގެ ފަހު ދައުރަށް 32 ބިލެއް މަޖިލީހަށް ފޮނުވަން ނިންމާފައިވާކަމަށް ބަންޑާރަނައިބުގެ އޮފީހުން ވަނީ ބުނެފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ގިނަ ކޮމެޓީތަކެއްގައި ނިންމަންޖެހޭ ގިނަ މަސައްކަތްތަކެއް ހުރުމުން, ބުދަ ދުވަހު ރައްޔިތުންގެ މަޖިލީހުގެ ޖަލްސާ ނުބާއްވައި ކޮމެޓީ ބައްދަލުވުންތައް ބޭއްވުމަށް ނިންމަވައިފިއެވެ.
މަޖިލީހުގެ ގަވާއިދުގައި ބުނާގޮތުން ކޮންމެ ހަފްތާއަކުވެސް ހޯމަ، އަންގާރަ، ބުދަ ދުވަހަކީ މަޖިލިސް ޖަލްސާތައް އޮންނަ ތިން ދުވަހެއެވެ. ނަމަވެސް އަންގާރަ ދުވަހުގެ ޖަލްސާ ނިންމާލައްވަމުން ރިޔާސަތުގައި އިންނެވި ވިލުފުށި ދާއިރާގެ މެމްބަރ ޙަސަން ޢަފީފް ވިދާޅުވީ މަޖިލިސް ޖަލްސާ ނުބޭއްވުމަށް ނިންމާފައިވަނީ މަޖިލީހުގެ ކޮމެޓީތަކުގެ މަަސައްކަތް ނިންމުމަށް ޖާގަ ދިނުމުގެ ގޮތުންކަމަށެވެ.
އަންގާރަ ދުވަހު ކުރިޔަށްދިޔަ ޖަލްސާގައިވެސް ކޮމެޓީތަކުގައި ކުރަންޖެހޭ މަސައްކަތް ގިނަވެ، މެމްބަރުން ކޮމެޓީތަކަށް ދާންޖެހުމުން ތަޅުމުގައި މެމްބަރުން މަދުވުމުގެ ސަބަބުން ޖަލްސާ ކުރިޔަށްދިޔައީ މަދު ވަގުތުކޮޅެއްގައެވެ. މަޖިލީހުގައި މިހާރު ކުރިއަށްދާ މިއަހަރުގެ ފަހު ދައުރަށް 32 ބިލެއް މަޖިލީހަށް ފޮނުވަން ނިންމާފައިވާކަމަށް ބަންޑާރަ ނާއިބުގެ އޮފީހުން ވަނީ ބުނެފައެވެ. މީގެ ތެރެއިން ބައެއް ބިލްތައް މިހާރުވަނީ މަޖިލީހަށް ފޮނުވާފައެވެ.
މިދައުރުގައި މަޖިލީހަށް ފޮނުވާ މުހިންމު ބިލު ތަކުގެ ތެރޭގައި ހެއްކާބެހޭ ބިލާއި، އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދޭ ބިލާއި، މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ބިލާއި، ޑިޕްލޮމެޓިކް އިމްތިޔާޒުގެ ބިލުވެސް ހިމެނެއެވެ.
