އިދިކޮޅުން އިންސާފުގެ ވާހަކަދައްކަނީ އެންމެ މީހެއްގެ މަސްލަހަތުގައި: ޢަބްދުލްޣަނީ
31 އޯގަސްޓު 2021 | އަންގާރަ 14:17މެމްބަރު ވިދާޅުވީ ރައީސް ޔާމީންގެ ސަރުކާރުގައި އަދުލުއިންސާފުގެ މައްޗަށް ވަނީ ވަރަށް ބޮޑަށް ބާރު ހިންގާފައިކަމަށް
ކުރެންދޫ ދާއިރާގެ މެމްބަރޢަބްދުލްޣަނީ ޢަބްދުލްޙަކީމް
އިދިކޮޅުން އިންސާފުގެ ވާހަކަދައްކަނީ އެންމެ މީހެއްގެ މަސްލަހަތުގައި ކަމަށް ކުރެންދޫ ދާއިރާގެ މެމްބަރ ޢަބްދުލްޣަނީ ޢަބްދުލްޙަކީމް ވިދާޅުވެއްޖެއެވެ.
ރައްޔިތުންގެ މަޖިލީހަށް މިހާރު ހުށަހަޅައި ބަހުސްކުރަމުންދާ, ދިވެހިރާއްޖޭގެ ބިމާ ބެހޭ ގާނޫނަށް މަތިވެރި ދާއިރާގެ މެމްބަރ ޙަސަން ޒަރީރު ހުށަހެޅުއްވި އިސްލާހުގެ ބިލަށް ބަހުސްކުރައްވަމުން ޢަބްދުލްޣަނީ ވިދާޅުވީ އަންގާރަ ދުވަހުގެ ހެނދުނުން ފެށިގެން އިދިކޮޅު ފަރާތްތަކުން އިންސާފުގެ ވާހަކަދައްކަމުންދާ އަޑުއިވެމުންދާ ކަމަށެވެ. އެހެންކަމުން ރައީސް ޢަބްދުﷲ ޔާމީންގެ ސަރުކާރުގައި ކުރީގެ ރައީސް މުޙައްމަދު ނަޝީދަށް ކޮށްފައިވާ އަނިޔާތަކާއި 13 އަހަރުގެ ޖަލު ހުކުމް އިއްވިގޮތް ފާހަގަކޮށްލަން ބޭނުންފުޅުވާކަމަށެވެ.
ރައީސް ނަޝީދަށް ޖަލު ހުކުމް އިއްވާފައިވަނީ 2015 ވަނަ އަހަރުގެ މާޗް މަހުގެ 13 ވަނަ ދުވަހު ކަމަށާއި އެއީ ހުކުރު ދުވަހެއްކަމަށް މެމްބަރު ވިދާޅުވިއެވެ.
މެމްބަރު މިމޭރުމުން ވާހަކަދައްކަވާފައި މިވަނީ ރައީސް ޔާމީނަށް މަނީލޯންޑަރިންގގެ ކުށް ސާބިތުވެ 5 އަހަރުގެ ޖަލު ހުކުމް އިއްވި މައްސަލަ ބެއްލެވި 5 ގާޒީންގެ ބެންޗުގައި ހިމެނިވަޑައިގެންނެވި ގާޒީ ޙުސައިން ފާއިޒް ރަޝާދުކަމަށް ބުނާ ބޭފުޅަކު ވާހަކަ ދައްކަވާ އޯޑިއޯއެއް ލީކުވުމުން އިދިކޮޅު ފަރާތްތަކުން މިހާރު ދައްކަމުންދާ ވާހަކަތަކާއި ގުޅިގެންނެވެ. އޯޑިއޯގައި އޭނާ ވަނީ ޔާމީނަށް ކޯޓުން ހުކުމް ކުރީ ގާޒީން "ރަހީނުކޮށްގެން" ކަމަށް ދޭހަވާ މޭރުމުން ވާހަކަ ދައްކަވާފައެވެ. އޭނާ ވަނީ ސިޔާސީ މީހުންގެ މައްސަލަ ބެލުމަކީ ފާޑެއްގެ ކަމެއް ކަމަށް ވިދާޅުވެ, ނުހައްގުން ހުކުމެއް ކޮށް ޖަލުގައި ދުވަސްތައް ހޭދަކުރައްވަން ޖެހުމަކީ ރައީސް ޔާމީނަށް އޮންނަ ތާއީދު ވެސް އިތުރުވެގެން ހިނގައިދާނެ ކަމެއްކަމަށް ވިދާޅުވެފައެވެ.
އޭގެ އިތުރުން، ޔާމީންގެ މައްޗަށް 5 އަހަރުގެ ޖަލު ހުކުމެއް އިއްވީ, ބިރު ދެއްކުމުންކަމަށް ވެސް އޯޑިއޯގައި ބުނެއެވެ. އެގޮތުން ބިރު ދެއްކުމުން އޮތީ ދެ ގޮތެއް ކަމަށް ވިދާޅުވެ، އެއްގޮތަކީ ބިރާ ދެކޮޅު ހެދުންކަމަށާއި އަނެއް ގޮތަކީ ބިރާ އެއްކޮޅަށް ހުކުމް ކުރުން ކަމަށް އޭނާ އޯޑިއޯގައި ވިދާޅުވެއެވެ.
މިކަމާއި ގުޅިގެން އިދިކޮޅުން ވަނީ މަޖިލީހަށް ކުއްލި މައްސަލައެއްވެސް ހުށަހަޅާފައެވެ. ނަމަވެސް އެމައްސަލަ ބަލައިނުގަތުމުން އެކަމަށް ތަޅުމުގައި ބަހުސްކުރުމުގެ ފުރުސަތެއް ލިބިފައެއްނުވެއެވެ.
މިއޯޑިއޯއާ ގުޅިގެން އިދިކޮޅު ފަރާތްތަކުން ދައްކަމުންދާ ވާހަކަތަކަށް އިޝާރާތް ކުރައްވައި ޢަބްދުލްޣަނީ ވިދާޅުވީ އިތުރަށް އިދިކޮޅު ފަރާތްތަކުން އިންސާފުގެ ވާހަކަ ދެއްކުން ރަނގަޅު ނޫންކަމަށާއި, އެވާހަކަ އިދިކޮޅުގައި ތިއްބެވި މެމްބަރުންނަށް ނުވެސް ދެއްކޭނެކަމަށެވެ.
އެވާހަކަދައްކަނީ އެންމެ ބޭފުޅެއްގެ މަސްލަހަތުގައި ކަމަށް ވިދާޅުވެ މެމްބަރު ވިދާޅުވީ ރައީސް ޔާމީންގެ ސަރުކާރުގައި ޢަދުލުއިންސާފުގެ މައްޗަށް ވަނީ ވަރަށް ބޮޑަށް ބާރު ހިންގާފައިކަމަށާއި, އެކަން އޭރު ހިނގާފައިވާކަންކަމަށް ބަލާލުމުން އެނގޭކަމަށެވެ. އެގޮތުން ރައީސް ޔާމީނާ ވާދަވެރި ހުރިހާ ސިޔާސީ ވެރިން ހައްޔަރުކޮށް ޖަލަށް ލާފައިވާކަން މެމްބަރު ފާހަގަކުރެއްވިއެވެ.
ރައީސް ޔާމީންގެ ސަރުކާރުގައި ވަނީ ރައްޔިތުންނަށާއި، ދައުލަތަށާއި އާންމު ފަރުދުންގެ ތެރެއިން އެކިއެކި ފަންތީގެ އަދި މުއައްސަސާތަކުގެ ވެރިންނަށްވެސް ވަރަށް ބޮޑަށް އަނިޔާކޮށްފައިވާކަމަށް މެމްބަރު ވިދާޅުވިއެވެ.
