ކުޑަގިރި ފަޅުގައި ތަރައްގީކުރުމަށް ހަމަޖެހިފައިވާ ޕިކްނިކް އައިލެންޑްގެ ބިންހިއްކުމުގެ ޕްރޮޖެކްޓަށް އާންމުންގެ ޚިޔާލު ހޯދުމަށް ހުޅުވާލައިފިއެވެ.

މި ސަރވޭއަކީ ގްރޭޓަރ މާލެ ސަރަހައްދުގައި ދިރިއުޅޭ ރައްޔިތުން ޕިިކްނިކް ދިއުމަށްޓަކައި ރަށެއް ތަރައްގީކުރުމަށްް ސަރުކާރުން ރާވައިފައިވާތީ އެމަޝްރޫއުގެ ދަށުން ކުރިއަށް ގެންދިޔުމަށް ހަމަޖެހިފައިވާ ބިންހިއްކުމުގެ މަޝްރޫއަށް ތައްޔާރުކުރެވޭ "ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު (އީ.އައި.އޭ ރިޕޯޓު)" ހެދުމަށް ބޭނުންވާ މައުލޫމާތު އެއްކުރުމަށް އެކުލަވާލެވިފައިވާ ސަރވޭއެކެވެ.

މި ސަރވޭގެ ބޭނުމަކީ އެކުލަވާލެވިފައިވާ ޕްރޮޖެކްޓާބެހޭގޮތުން އާންމު ރައްޔިތުންގެ ޚިޔާލާއި، މަޝްވަރާއާއި، ޕްރޮޖެކްޓާބެހޭގޮތުން ފާހަގަކުރެވޭ ކަންބޮޑުވުންތަކާއި, ޕްރޮޖެކްޓްގެ ސަބަބުން ލިބޭނެފައިދާތައް ދެނެގަތުމަށް ކުރިއަށް ގެންދެވޭ ސަރވޭއެކެވެ. މި ސަރވޭގައި އެއްކުރެވޭ މައުލޫމާތު ބޭނުންކުރެވޭނީ ހަމައެކަނި އީ.އައި.އޭގެ ބޭނުމަށެވެ. އަދި މައުލޫމާތުދިން ފަރާތުގެ ނަން، އެފަރާތުން ފޯރުކޮށްދިން މައުލޫމާތު އެގޭނެގޮތަށް ނުހިމެނޭނެއެވެ. މިނިސްޓްރީ އޮފް ނެޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރއިން ކުރިއަށް ގެންދާ މި މަޝްރޫއުގެ އީއައިއޭ ކޮންސަލްޓަންޓަކީ އެމްޓީސީސީއެވެ.

މި ޕްރޮޖެކްޓްގައި ހިމެނެނީ މާލެއާ 10.5 ކިލޯމީޓަރު ދުރުގައިވާ ކުޑަގިރިއޭ ކިޔޭ ފަޅުގައި 2 ރަށް ހިއްކުމެވެ. މީގެ ތެރޭގައި ހިމެނެނީ 8 ހެކްޓަރުގެ ޕިކްނިކް އައިލެންޑަކާއި ސޭންޑްބޭންކް ގޮތަށް ހެދިގެންދާނެ 1.5 ހެކްޓަރުގެ ރަށެކެވެ. އަދި މިދެރަށުގެ ބިން ހިމާޔަތް ކުރުމަށް ގްރޮއިންއާއި ރިވެޓްމަންޓް ޖެހިގެންދާނެއެެވެ. މި ޕްރޮޖެކްޓަށް ބޭނުންވާ ވެލި ނެގުމަށް ހަމަޖެހިފައިވަނީ މާލެ އަތޮޅު އެތެރެވަރިންނެވެ. އެއީ މިހާރުވެސް ގިނަ ބިންހިއްކުމުގެ މަޝްރޫއުތަކަށް ވެލި ނަގަމުންދާ ސަަރަހައްދެކެވެ. މި ޕްރޮޖެކްޓަށް ޖުމުލަ 250،000 ކޮޑިމީޓަރުގެ ވެލި ބޭނުންވާނެއެވެ.