މުޖުތަމައު ސަލާމަތްކުރެވޭނީ އެންމެން އެކުގައި މަސައްކަތްކޮށްގެން: ހޯމް މިނިސްޓަރ
ރަނގަޅު ޞުލްހަވެރި މުޖުތަމައަކީ މީހުންނަށް އަދަބު ދޭން ޖެހޭ މުޖުތަމައެއް ނޫން
ނ. މާފަރު ޕޮލިސް ސްޓޭޝަން ހުޅުވުމަށް ބޭއްވި ރަސްމިއްޔާތުގައި ހޯމް މިނިސްޓަރ އިމްރާން އަބްދުﷲ ވާހަކަ ދައްކަވަނީ
އަޅުގަނޑުމެންގެ މުޖުތަމައު ސަލާމަތްކުރެވޭނީ އެންމެން އެކުގައި މަސައްކަތްކޮށްގެން ކަމަށް ހޯމް މިނިސްޓަރ ޝެއިހް އިމްރާން އަބްދުﷲ ވިދާޅުވެއްޖެއެވެ.
ނ. މާފަރު ޕޮލިސް ސްޓޭޝަން ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އިމްރާން ވިދާޅުވީ އިންސާނީ މުޖުތަމައެއްގެ ސަލާމަތާއި, ރައްކާތެރިކަމާއި, މުޖުތަމައުގެ ހަމަޖެހުން ކަށަވަރުވެފައި އޮތުމުގެ އެންމެ މަތިވެރި ބަހާ އަކީ އެ މުޖުތަމައުގެ އެއްބައިވަންތަކަން ކަމަށެވެ. އަދި މުޖުތަމައެއްގައި ބަދަހިކަމާއި, އެކުވެރިކަމާއި, އޯގާވެރިކަން އޮވެއްޖެނަމަ އެ މުޖުތަމައަކީ އަމާން ރައްކާތެރި ޞުލްހަވެރި މުޖުތަމައު އަކަށްވާނެ ކަމަށެވެ.
ރަނގަޅު ޞުލްހަވެރި މުޖުތަމައަކީ މީހުންނަށް އަދަބު ދޭން ޖެހޭ މުޖުތަމައެއް ނޫންކަން ފާހަގަކުރައްވައި އިމްރާން ވިދާޅުވީ ޖަލުތަކުގެ ފަހަތަށް ނުވަތަ ތޭރިތަކުގެ ފަހަތަށް އެ މުޖުތަމައުގެ ބޮޑު އަދަދެއް ލައިގެން އެކަމަށްޓަކައި ބޮޑެތި ހޭދަތައް ކުރަން ޖެހޭ ކަމަށެވެ.
ރައީސުލްޖުމްހޫރިއްޔާ ދެއްވާފައިވާ އިރުޝާދަކީ ކުރިއަށް އޮތް ތިން އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ޤާއިމްކުރުމުގެ އިރުޝާދު ކަމަށާއި އެއީ އެކަމަށްޓަކައި ވަރަށްބޮޑު ހޭދައެއް ދައުލަތުން ކުރަންޖެހޭކަމެއް ކަަމަށް އިމްރާން ވިދާޅުވިއެވެ. އެހެންނަމަވެސް ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި, ރައްޔިތުންގެ ހަމަޖެހުން ޤާއިމްކުރުމަށްޓަކައި ރައްޔިތުންގެ އިޖުތިމާއީ ގުޅުންތަކާއި, އިޤްތިޞާދު ސަލާމަތްކުރުމަށްޓަކައި މިއަދުގެ ހާލަތުގައި ކޮންމެހެން ބޭނުންވާތީވެ, އެކަން ކުރުމުގެ މަސައްކަތް މިނިސްޓްރީން ކުރަމުންދާ ކަމަށް ވެސް އިމްރާނު ވިދާޅުވިއެވެ.
މި މަހުގެ ތެރޭގައި މިހާރު ޚިދުމަތްދެމުންދާ ނިޒާމަށް މުހިއްމު ބަދަލުތަކެއް ގެނެސް, މިހާރު ޤާއިމްކުރެވިފައިވާ 7 ޑިވިޝަންގެ ބަދަލުގައި 5 ރީޖަން ކަނޑައެޅި, އެރީޖަންތަކަށް ކޮމާންޑަރުން ލެވި, އެ ކޮމާންޑަރުންނަކީ އިތުރު ބާރާއި, ވަޞީލަތްތަކާއި, ޚިދުމަތް ދިނުމަށް ފަހިކުރެވިފައިވާ އިސްބޭފުޅުންކަމުގައި ހަމަޖެހިގެންދާނެ ކަމަށް ވެސް ވިދާޅުވިއެވެ. އަދި މިކަމުގެ ނަތީޖާއަކަށް ވެގެންދާނީ ރައްޔިތުންނާ ގާތުން ފުލުހުން ޚިދުމަތް ދިނުމުގައި ފަސޭހަކަމާއި, އަވަސްކަމާއެކުގައި ނިންމަންޖެހޭ މުހިއްމު ނިންމުންތައް ނިންމާ، ކުރިއަށްގެންދަންޖެހޭ މުހިއްމު މަސައްކަތްތަކުގައި އެބޭފުޅުން ވަރަށް ހުނަރުވެރިކަމާއި ޤާބިލްކަމާއެކުގައި ކުރިއަށްދިއުމުގެ މަގު ތަނަވަސް ވެގެންދިއުން ކަމަށާއި، ހުރިހާކަމެއްގައި މައި އިދާރާގެ މައްޗަށް ބަރޯސާވެގެން ތިބުމުގެ ބަދަލުގައި ކަންކަން އަވަހަށް ނިންމުމުގައި ފަސޭހަތަކެއް ލިބިގެން ދިޔުން ކަަމަށް ވެސް މިނިސްޓަރ ވިދާޅުވިއެވެ.
މީގެ ހަޤީޤީ ނަތީޖާއަކަށްވާނީ ފުލުހުންގެ ފަރާތުން ރައްޔިތުން އުއްމީދުކުރާ ހަޤީޤީ ޚިދުމަތް ރައްޔިތުންނަށް ލިބިގެންދިއުން ކަމަށް އިމްރާން ވިދާޅުވިއެވެ.
