ހޯމް މިނިސްޓަރާއި ޕޮލިސް ކޮމިޝަނަރ ނ. އަތޮޅަށް
މިއީ ސެޕްޓެމްބަރު 1 ވަނަ ދުވަހުގެ ނިޔަލަށް ކުރައްވާ ދަތުރުފުޅެއް
މިނިސްޓަރ އިމްރާން ނ. ލަންދޫއަށް ވަޑައިގަތުން
މިނިސްޓަރ އޮފް ހޯމް އެފެއާޒް އިމްރާން އަބްދުﷲ އާއި ކޮމިޝަނަރ އޮފް ޕޮލިސް މުހައްމަދު ހަމީދު ރަސްމީ ދަތުރުފުޅެއްގައި ހޯމަދުވަހު ނ. އަތޮޅަށް ވަޑައިގެންފިއެވެ.
ސެޕްޓެމްބަރު 1 ވަނަ ދުވަހުގެ ނިޔަލަށް ކުރައްވާ މި ދަތުރުފުޅުގައި ހޯމަ ދުވަހު ނ. ލަންދުއަށް ވަޑައިގެން، އެ ރަށު ޕޮލިސް ސްޓޭޝަނަށް ޒިޔާރަތްކުރައްވައި އެ ސްޓޭޝަންގެ މުވައްޒަފުންނާ އެ ދެބޭފުޅުން ވަނީ ބައްދަލުކުރައްވާފައެވެ.
މި ދަތުރުފުޅުގައި ނ. އަތޮޅު ކައުންސިލާއި އެ އަތޮޅު ރަށްރަށުގެ ކައުންސިލްތަކާއި ޕޮލިސް ސްޓޭޝަންތަކަށް ޒިޔާރަތްކުރައްވައި މުވައްޒަފުންނާ ބައްދަލުކުރެއްވުމަށް ވަނީ ހަމަޖެހިފައެވެ. މަނަދޫ ޕޮލިސް ސްޓޭޝަންގެ ބިންގާ އެޅުމާއި މާފަރު ޕޮލިސް ސްޓޭޝަން ހުޅުވުމަށް ވެސް ވަނީ ހަމަޖެހިފައެވެ.
މި ދަތުރުފުޅުގައި ޑެޕިއުޓީ ކޮމިޝަނަރ އޮފް ޕޮލިސް އަބްދުލްމަންނާން ޔޫސުފާއި ފުލުހުންގެ އެގްޒެކެޓިވް ބައެއް އޮފިސަރުން ވެސް ބައިވެރިވެވަޑައިގަންނަވައެވެ.
