މައްސަލަތަކުގެ ތަހުގީގުގައި ޚާއްސަ އުކުޅުތައް ބޭނުންކުރުމުގެ ބާރު ފުލުހުންނަށް ލިބޭ ގަވައިދެއް އެކުލަވާލައި، އެ ގަވައިދަށް އަމަލުކުރަން ފަށައިފިއެވެ.

މި ގާނޫނު އެކުލަވާލާފައިވަނީ ދިވެހި ފުލުހުންގެ ޚިދުމަތުގެ ގާނޫނުގެ 102 މާއްދާގެ (ށ)އާއި، 133 ވަނަ މާއްދާގެ (ނ)ގެ (14)ވަނަ ނަންބަރުން ބާރު ލިބިގެންނެވެ. މި ގާނޫނު އެކުލަވާލާފައިވަނީ ތަހުގީގު ކުރުމުގެ ޚާއްސަ އުކުޅު ބޭނުންކުރުމުގެ މިންތަކާއި، ހަމަތައް ބަޔާންކުރުމާއި، ތަހުގީގު ކުރުމުގެ ޚާއްސަ އުކުޅު ބޭނުންކުރުމުގައި ހުއްދައަށް އެދުމާއި، ހުއްދަ ދޭނޭ ގޮތްތައް ބަޔާން ކުރުމާއި، ތަހުގީގު ކުރުމުގެ ޚާއްސަ އުކުޅު ބޭނުންކުރުމުގައި ޖަވާބުދާރީ ކުރުވުމާއި، ޖަވާބުދާރީ ކުރުވާނޭ ގޮތްތައް ބަޔާންކުރުމާއި، ތަހުގީގު ކުރުމުގެ ޚާއްސަ އުކުޅު ބޭނުންކޮށްގެން ހޯދާ ހެކި، ތަހުގީގުގެ މަރުހަލާއާއި، ޝަރީއަތުގެ މަރުހަލާގައި ބޭނުންކުރާނެ ހަމަތައް ބަޔާންކުރުމާއި، ތަހުގީގު ކުރުމުގެ ޚާއްސަ އުކުޅު ބޭނުންކުރުމުގައި އިންސާނީ ހައްގުތަކަށް އިޙުތިރާމްކުރުމާއެކު އެފަދަ އުކުޅުތައް ބޭނުންކުރުމުގެ އުސޫލުތައް ކަނޑައަޅައި ބަޔާންކުރުމާއި، ތަހުގީގުކުރުމުގެ ޚާއްސަ އުކުޅު ބޭނުންކޮށްގެން އެއްކުރެވޭ މައުލޫމާތު ރައްކާތެރިކަމާއެކު ބެލެހެއްޓުމާއި، އެފަދަ މައުލޫމާތު ނައްތައިލެވޭނެ ހަމަތަކާ އުސޫލުތައް ބަޔާންކުރުމުގެ މަގުސަދުގައެވެ.

ތަހުގީގު ކުރުމަށް ބޭނުންކުރާ ޚާއްސަ އުކުޅުތަކުގެ ތެރޭގައި މީހަކު ކުރާ ކަންކަމާއި، ބައްދަލުކުރާ މީހުންނާއި، ދާ ތަންތަން ދެނެގަތުމަށް ޓަކައި، އޭނާއަށް ނޭނގޭގޮތަށް އޭނާ މޮނިޓަރ ކުރުމާއި، ވަކި މީހަކާ ގުޅުމެއް އުފައްދައިގެން އެ ގުޅުމުގެ ތެރެއިން ކުރެވޭ ސުވާލުންނާއި ލިބޭ މަޢުލޫމާތުން ތަޙުޤީޤަށް ބޭނުންވާ ކަންކަން ހޯދުމާއި، ވަކި މީހަކު ދިރިއުޅޭ ގެއެއްގައި ނުވަތަ އޭނާ ބޭނުންކުރާ އުޅަނދެއްގައި ދެކެވޭ ވާހަކަ އަޑުއެހުމަށް ނުވަތަ ބެލުމަށް ކެމެރާއާއި އަޑުއެހޭނެ ވަސީލަތްތައް ޤާއިމްކޮށް، އެ ގެއެއްގައި ނުވަތަ އުޅަނދެއްގައި ދެކެވޭ ވާހަކަ އަޑުއެހުމާއި، މަންޒަރު ރެކޯޑުކުރުމާއި، ބެލުމުގެ އިތުރުން މުއާސަލާތީ ވަސީލަތްތަކާއި، ސިޓީއާއި، ލިޔުމާއި، އީމެއިލާއި، ފޯނު މެދުވެރިކޮށް އޭނާ ހިންގާ މުއާމަލާތްތައް ހޯދައި ބެލުމާއި، އަޑުއެހުމާއި، ވަކި ބާވަތެއްގެ ކުށަކާ ގުޅިގެން ޚާއްސަ ތަހުގީގީ އުކުޅެއް ބޭނުންކުރުން ގާނޫނަކުން ކަނޑައެޅިގެން ހުއްދަކޮށްފައިވާ ހާލަތުގައި އެފަދަ ކުށެއް ކުރަމުންދާކަމަށް ތުހުމަތުކުރެވޭ މީހާ އެކަން ކުރަމުން ދަނިކޮށް ހެއްކާއެކު އަތުލައިގަތުމުގެ ގޮތުން ސްޓިންގ އޮޕަރޭޝަން ހިންގުމުގެ އިތުރުން ޠަބީއީ ޝަޚުސެއް ނޫން ގޮތެއްގައި މުއާމަލާތުކުރާނެ ފަރާތެއް އުފެއްދުމާއި، އެފަދަ ފަރާތްތައް ބޭނުންކޮށްގެން މުއާމަލާތްކުރުން ހިމެނޭ ކަމަށް މި ގަވައިދުގައި ބުނެއެވެ.

މި ތަހުގީގީ އުކުޅުތައް ބޭނުންކުރެވޭނީ ގައުމީ ސަލާމަތަށް އުނިކަން އަތުވެދާނެ ކަންކަން ހޯދައި، ބަލައި، އެ ކަންކަން ދެނެގަނެ، އެފަދަ ކަންކަން ހުއްޓުވުމަށާއި، ޖިނާއީ އިޖުރާތުގެ ޤާނޫނުގައި ބަޔާންކޮށްފައިވާ ޖިނާއީ ބޮޑެތި ކުށްކުށުގެ ތަޙުގީގުގައާއި، އެފަދަ ކުށްތައް ހޯދައި ދެނެގަނެ، އެފަދަ ކަންކަން ހުއްޓުވުމަށެވެ. މީގެ އިތުރުންވެސް ތަހުގީގު ކުރުމުގެ ޚާއްސަ އުކުޅެއް ބޭނުންކުރުމަށް ގާނޫނަކުން ހުއްދަ ދީފައިވާ ހާލަތުގައި މި އުކުޅުތައް ބޭނުންކުރެވޭނެކަމަށް މި ގަވައިދުގައި ވެއެވެ.

މިގޮތަށް ހޯދާ ހެކިތައް ޝަރީއަތަށްވެސް ހުށަހެޅޭނެ ކަމަށް މި ގަވައިދުގައި ވެއެވެ. މިފަދަ މައްސަލައެއް ޝަރީއަތަށް ހުށަހަޅާނަމަ އެކަށީގެންވާ ހެއްކާއެކު، ހެއްކަށް ބިނާކޮށް އެކުލަވާލާފައިވާ ރިޕޯޓެއް ހުށަހަޅަންޖެހޭނެ ކަމަށް ގަވައިދުގައި ވެއެވެ. އަދި ތަހުގީގު ކުރުމުގެ ޚާއްސަ އުކުޅެއް ފުލުހުން ވަކި މީހަކާ ދެކޮޅަށް ބޭނުންކުރަމުންދާކަމަށް، އެ މީހަކަށް އެކަށީގެންވާ ސަބަބުތަކުގެ މައްޗަށް ބިނާކޮށް ޝައްކުކުރެވޭނަމަ، އެ ކަން ބަލައިދިނުމަށް އެދި އެކަމަށް ޚާއްސަކޮށް އެކުލަވާލާފައިވާ ކޮމިޓީއަށް ހުށަހެޅޭނެ ކަމަށްވެސް ގަވައިދުގައި ވެއެވެ. ހުށަހަޅާ ޝަކުވާ ބިނާކޮށްފައިވަނީ އެކަށީގެންވާ ސަބަބެއްގެ މައްޗަށްކަމަށް، ކޮމެޓީގެ އަޣުލަބިއްޔަތުން ނިންމައިފިނަމަ، އެ ޝަކުވާއެއް ކޮމެޓީން ބަލާނެ ކަމަށް ބުނެފައިވެއެވެ.

މީގެ ކުރިންވެސް ފުލުހުން ވަނީ އެކި އެކި މައްސަލަތަކުގައި ބޮޑެތި ތަހުގީގުތައް ކުރިއަށްގެންގޮސްފައެވެ. މި ތަހުގީގުތަކުގައި މީހުންގެ ފޯނު ކޯލުތައް އަޑުއެހުން ފަދަ ކަންކަން ކޮށްފައިވީނަމަވެސް ސެކިއުރިޓީ ކެމެރާ ފަދަ ތަކެތި ބޭނުންކޮށްގެން, ތުހުމަތުކުރެވޭ މީހުންގެ ކަންކަން މީގެ ކުރިން މޮނިޓަރ ކޮށްފައެއް ނުވެއެވެ.