ރަސްފަރި ހުޅަނގު ފަރާތުން ފަރަށް އެރި ބޯޓު ފުންކޮށްފި

ކ. ރަސްފަރި ހުޅަނގު ފަރާތުން ފަރަށް އެރި ބޯޓު މިހާރު ފުންކުރެވިފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.

ޕެނަމާއަށް ނިސްބަތްވާ އެމްވީ ނޭވިއަސް އަމަރިލިސް ނަމަކަށް ކިޔާ އާގުބޯޓު ފަރަށް އަރާފައިވަނީ އޮގަސްޓު މަހުގެ 19 ވަނަ ދުވަހުއެވެ. އެ ދުވަހުން ފެށިގެން ބޯޓު ފުންކުރުމުގެ މަސައްކަތް ވަނީ ކުރިއަށްގެންގޮސްފައެވެ. ބޯޓު ފަރަށް އެރިތާ 10 ވަނަ ދުވަހު ބޯޓު ފުންކުރެވިފައިވާކަމަށް އެމްއެންޑީއެފުން ވަނީ ބުނެފައެވެ. އެމްއެންޑީއެފުން ބުނީ ކޯސްޓްގާޑާއި، ކަމާ ގުޅުންހުރި އެހެނިހެން އިދާރާތައް ގުޅިގެން ކުރި މަސައްކަތުގެ އާދިއްތަ ދުވަހުގެ 14:08 އެހާއިރު ބޯޓު ފުންކުރެެވިފައިވާ ކަމަށެވެ. މިކަމާއި ގުޅޭ އިތުރު މައުލޫމާތެއް އެމްއެންޑީއެފުން ހާމަކޮށްފައެއް ނުވެއެވެ.

ކަމާ ގުޅުންހުރި އިދާރާތައް ގުޅިގެން މިދިޔަ ހަފުތާގެ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ ބޯޓު ފުންކުރުމުގެ މަސައްކަތް ފެށޭ ވަރު ވާނީ ސެޕްޓެމްބަރު 1 ވަނަ ދުވަހު ކަމަށެވެ. އަދި ބޯޓު ފުންކުރުމަށް ދެ ދުވަސް ނަގާނެ ކަމަށް މި ބައްދަލުވުމުގައި ބުނެފައިވެއެވެ. ބޯޓު ފުންކުރުމުގެ މަސައްކަތް ސެޕްޓެމްބަރު 1 ގައި ފެށޭ ވަރު ވަނީ މިކަމަށް ބޭނުންވާ ބައެއް އާލާތްތައް ރާއްޖެއިން ބޭރުން ގެންނާތީ ކަމަށް ބުނެފައިވެއެވެ. އަދި މިކަމަށް އިތުރު ދެ ޓަގު ބޯޓެއް ގެނެސްފައިވާކަމަށްވެސް ބުނެފައިވެއެވެ. އެހެންނަމަވެސް މި މަސައްކަތް ފަށަން ބުނި ދުވަހާއި ނިންމޭނެ ކަމަށް ދިން މުއްދަތުގެ ކުރިން ބޯޓު ފުންކޮށް ނިންމާލެވިފައިވެއެވެ.

ކ. ރަސްފަރި ފަރަކީ ހިމާޔަތްކޮށްފައިވާ ފަރަކަށްވާތީ ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުން ބަލަން ސަރވޭތައް ފަށާނެ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފައިވެއެވެ. ބޯޓު ފުންކުރެވުމުގެ ކުރިންވެސް މަތިން ފަރަށް ލިބުނު ގެއްލުން ބަލާފައިވާކަމަށް އީޕީއޭއިން ބުނެފައިވެއެވެ. އަދި ފަރަށް ލިބުނު ގެއްލުން ބަލައި، ބޮޑު އަދަދަކުން ބޯޓުގެ ވެރިފަރާތް ޖޫރިމަނާ ކުރާނެ ކަމަށް އީޕީއޭއިން ބުނެފައިވެއެވެ. ސަރވޭގެ ކުރިން ބޯޓު ފުރަން އެދޭނަމަ ޑިޕޮޒިޓެއްގެ ގޮތުގައި 100 މިލިއަން ރުފިޔާ ނަގާނެ ކަމަށް އީޕީއޭއިން ބުނެފައިވެއެވެ.

މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓްރާންސްޕޯޓް މިނިސްޓްރީީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވިއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ.

އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން ފާހަގަވި ކަމަށް ޓްރާންސްޕޯޓް މިނިސްޓްރީން ބުނެއެވެ. ވަކިން ޚާއްސަކޮށް ނަގިލިލުން ފަދަ ކަމެއްވެސް ކޮށްފައިނުވާ ކަމަށާއި، އަދި އެހީއަށްވެސް އެދިފައިނުވާކަމަށް ހަމަދު ވިދާޅުވިއެވެ.