އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ކުރިން ސަޕޯޓަރުންގެ ފޯރި އިތުރުކުރުމުގެ ގޮތުން އަންނަ ސެޕްޓެމްބަރު މަހު ޚާއްސަ ކެމްޕެއިނެއް ފަށަން ނިންމާފައިވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މި ފަހަރުގެ ސާފް ޗެމްޕިއަންޝިޕް ކުރިއަށްދާނީ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ.

ސާފް ޗެމްޕިއަންޝިޕަށް ތައްޔާރުމުގެ ގޮތުން ގައުމީ ޓީމުން ބުރާސްފަތި ދުވަހުގެރޭ ގައުމީ ފުޓްބޯޅަ ދަނޑުގައި ފަރިތަކުރުންތައް ފެށިއިރު، މި ފަރިތަކުރުންތައް ފެށުމުގެ ކުރިން އެފްއޭއެމުގެ ރައީސް ބައްސާމް އަދީލް ޖަލީލް ވަނީ ގައުމީ ޓީމުގެ ކުޅުންތެރިންނާއި އޮފިޝަލުންނާ ބައްދަލުކޮށް ހިތްވަރުދީފައެވެ.

އަދި އެއަށްފަހު މީޑިއާތަކަށް ދިން އިންޓަވިއުއެއްގައި ބައްސާމް ވިދާޅުވީ ސެޕްޓެމްބަރު މަހުގެ އަށްވަނަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހިމެނޭނެހެން ސާފް ޗެމްޕިއަންޝިޕަށް ތައްޔާރުވުމުގެ ގޮތުން ޚާއްސަ ކެމްޕޭނެއް ކުރިއަށްގެންދާން ނިންމާފައިވާ ކަމަށެވެ. އަދި މި މުބާރާތަށް އެފްއޭއެމުގެ ޓީމުން ވަރަށް ރަނގަޅަށް ތައްޔާރުވެފައިވާ ކަމަށާއި، އެކަން ނިމިދިޔަ އޭއެފްސީ ކަޕުގެ މެޗުތަކުން ފެނިގެންދާނެ ކަމަށްވެސް ބައްސާމް ވިދާޅުވިއެވެ.

ބައްސާމް އިތުރަށް ވިދާޅުވީ ސާފް ޗެމްޕިއަންޝިޕުގެ ތައްޓަކީ ދިވެހީން އެންމެ ބޮޑަށް ބޭނުންވާ އެއް ކާމިޔާބީ ކަމަށެވެ. އަދި އަށެއް ސެޕްޓެމްބަރުގައި ފަށާ ކެމްޕެއިނަކީ ގައުމީ ކެމްޕެއިނެއް ކަމަށާއި، އުއްމީދަކީ ގައުމު އެއްބައިވަންތަކޮށް، ރާއްޖޭގެ ހުރިހާ ގެއްގައި ގައުމީ ދިދަ ނެގިގެންދިޔުން ކަމަށްވެސް ވިދާޅުވިއެވެ.

އަދި މި ކެމްޕޭނުގައި ރާއްޖޭގެ ހުރިހާ ކައުންސިލެއް ޝާމިލުކުރުމަށް ނިންމާފައިވާ ކަމަށާއި، އެގޮތުން ރަށްތަކުގައިވެސް ފޯރި ގެނައުމަށް ނިންމާފައިވާ ކަމަށް ވިދާޅުވިއެވެ. އެގޮތުން އެފްއޭއެމުގެ ޓީމުތައް ރާއްޖޭގެ ހަތަރު ހިސާބަށް ދަތުރުކުރުމަށް ނިންމާފައިވާ ކަމަށްވެސް ބައްސާމް ވަނީ ވިދާޅުވެފައެވެ.

މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.