ޓޫރިޒަމް މިނިސްޓްރީއަށް ގޮތް ނޭނގޭ އެއްޗެއް ލިބުމާއެކު، ސިފައިން ހަރަކާތްތެރިވަނީ
ޓޫރިޒަމް މިނިސްޓްރީގެ މުވައްޒަފުން އޮފީހުން ވަނީ ނެރެފައި
ވެލާނާގެ- ވެލާނާ ބިލްޑިންގްގައި ހުންނަ ޓްއަރިޒަމް މިނިސްޓްރީ ތެރެއިން ގޮތް ނޭނގޭ އެއްޗެއް ފެނިގެން ސިފައިން ގެންދަނީ ޙަރަކާތްތެރިވަމުން
ޓޫރިޒަމް މިނިސްޓްރީއަށް ގޮތް ނޭނގޭ އެއްޗެއް ލިބިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހަރަކާތްތެރިވާން ފަށައިފިއެވެ.
އެކަމާ ގުޅޭގޮތުން އެމްއެންޑީއެފުން ބުނީ، ވެލާނާ ބިލްޑިންގްގައި ހުންނަ ޓޫރިޒަމް މިނިސްޓްރީ ތެރެއިން ގޮތް ނޭނގޭ އެއްޗެއް ފެނިގެން ރިޕޯޓް ކުރުމުން، އެމްއެންޑީއެފްގެ ބޮން ސްކޮޑުން ހަރަކާތްތެރިވާން ފަށާފައިވާ ކަމަށެވެ. އެމްއެންޑީއެފުން ވަނީ ޓޫރިޒަމް މިނިސްޓްރީގެ މުވައްޒަފުން އޮފީހުން ނެރުމަށް ފަހު އެތަނުގައި ހަރަކާތްތެރިވެފައެވެ.
އެކަމާ ގުޅޭ އިތުރު ތަފްސީލެއް އެމްއެންޑީއެފުން ހާމަކޮށްފައެއް ނުވެއެވެ. އެމްއެންޑީއެފުން ވަނީ ގޮތް ނޭނގޭ ތަކެއްޗާ ހަވާލުނުވުމަށް އިލްތިމާސްކޮށްފައެވެ.
މެއި 6 ގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ޙަމަލާއަށްފަހު، ޚާއްސަ އިސްކަމެއް ދީގެން މިފަދަ ކަންކަން އެމްއެންޑީއެފުން ގެންދަނީ ބަލަމުންނެވެ. އެގޮތުން މާލޭގެ ރަށްދެބައިމަގުގައި ހުންނަ ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮވެގެން ދާދި ފަހުން ސިފައިން އެ ސަރަޙައްދު ބަލާފައިވާއިރު، ސުޕްރީމް ކޯޓު ސަރަޙައްދުގައި އޮތް ކާރެއް ފެނިގެން ވެސް ސިފައިން ހަރަކާތްތެރިވެފައިވެއެވެ. ނަމަވެސް އެ ދެ ފަހަރުވެސް ގެއްލުމެއްވާ ޒާތުގެ އެއްޗެއް ފެނިފައެއް ނުވެއެވެ.
އޭގެ އިތުރުން، މެއި 6 ގެ ޙަމަލާއާ ގުޅިގެން ގްރޭޓަރ މާލެ ސަރަޙައްދުގެ އިތުރުން، މުޅި ރާއްޖޭގެ ސެކިއުރިޓީ ވަރުގަދަކޮށް ސިފައިން ހަރަކާތްތެރިވެފައި ވެސް ވެއެވެ.
