ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ނެތި ޔުވެންޓަސްއިން ކުޅުނު ފުރަތަމަ މެޗުން އެމްޕޯލީ އަތުން އެ ޓީމު ބަލިވެއްޖެއެވެ.

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް ބަލިވީ 1-0 ގެ ނަތީޖާއަކުންނެވެ.

ދާދި ފަހުން އުމުރުން 36 އަހަރުގެ ރޮނާލްޑޯ ވަނީ ޔުވެންޓަސް ދޫކޮށް، އޭނާގެ ކުރީގެ ކުލަބު މެންޗެސްޓާ ޔުނައިޓެޑަށް ބަދަލުވެފައެވެ. އޭގެ ކުރިން ލީގުގެ ފުރަތަމަ މެޗުގައި އުދިނޭޒީއާ ދެކޮޅަށް ޔުވެންޓަސް ކުޅުނު މެޗުގެ ފުރަތަމަ އެގާރައިގައި ހިމެނިގެން ރޮނާލްޑޯ ކުޅެފައެއް ނުވެއެވެ. އެކަމަކު ދެވަނަ ހާފުގައި ރޮނާލްޑޯ ކުޅެން އެރުވިއިރު، ފަހު ވަގުތު ޔުވެންޓަސް މޮޅުކޮށްދޭން ރޮނާލްޑޯ ލަނޑެއްވެސް ޖެހިއެވެ. ނަމަވެސް ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށް ފަހު، އެއީ އޮފްސައިޑް ލަނޑެއް ކަމަށް ވަނީ ނިންމާފައެވެ.

އެ މެޗުގެ ފަހުން ރޮނާލްޑޯ ޔުވެންޓަސް ދޫކޮށްލާފައިވާއިރު، އޭނާ ނެތި ކުޅުނު ފުރަތަމަ މެޗުގައި އެ ޓީމަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އަމިއްލަ ދަނޑުގައި ކުޅުނު މެޗުގެ ފުރަތަމަ ހާފުގެ ކުރީކޮޅު ޔުވެންޓަސްގެ ފެޑެރީކޯ ކިއޭސާއަށް ވަނީ ލީޑު ނަގަން ރަނގަޅު ދެ ފުރުސަތެއް ލިބި ބޭކާރުވެފައެވެ.

އެއާއެކު މެޗުގެ 21 ވަނަ މިނެޓުގައި އެމްޕޯލީން ވަނީ ލީޑު ނަގާފައެވެ. އޭރިއާ ތެރެއިން ލިބުނު ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ލެއޮނާޑޯ މަންކޫސޯއެވެ. އަދި އޭގެ ފަހުން ފުރަތަމަ ހާފުގައި އެމްޕޯލީގެ ޕެޓްރިކް ކުޓްރޯނޭ ނުރައްކާތެރި ހަމަލާއެއް ފޮނުވާލި ނަމަވެސް، އެ ހަމަލާ ދިޔައީ ގޯލުގެ ދަނޑި ކައިރިން ބޭރަށެވެ.

މި މެޗުގެ ދެވަނަ ހާފުގައި ޔުވެންޓަސްއަށް މާ ނުރައްކާތެރި ހަމަލާއެއް އުފެއްދިފައި ނުވާއިރު، މި ހާފުގައި ނަތީޖާ އެއްވަރުކުރަން އެންމެ ރަނގަޅު ފުރުސަތެއް ލިބުނީ އެ ޓީމުގެ މަނުއެލް ލޮކަޓެއްލީއަށެވެ. އެކަމަކު އޭރިއާ ތެރެއިން އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

މި މެޗުން ޔުވެންޓަސް ބަލިވިއިރު، އެ ޓީމަށް އަދި ލީގުގައި މޮޅެއް ހޯދިފައެއް ނުވެއެވެ. އެގޮތުން ލީގުގައި ކުޅުނު ފުރަތަމަ މެޗުން ޔުވެންޓަސް ވަނީ އުދިނޭޒީއާ އެއްވަރުވެފައެވެ. ލީގުގައި ޔުވެންޓަސްއިން ދެން މެޗެއް ކުޅޭނީ އަންނަ ސެޕްޓެމްބަރު މަހުގެ 12 ވަނަ ދުވަހެވެ. އެ ދުވަހު ރަށުން ބޭރުގައި ޔުވެންޓަސް ނުކުންނާނީ ނާޕޮލީއާ ދެކޮޅަށެވެ.