މަސްރަހު ގޯސްވެފައިވާ އަފްޣާނިސްތާނުގައި ދިރިއުޅޭ ކުއްތާތަކާއި ބުޅާތައް ބޭރުކުރުމުގެ މަސައްކަތް ފަށައިފިއެވެ.
ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން ކުރިން ބްރިޓިޝް ރޯޔަލް މެރިންގައި މަސައްކަތްކުރި ސިފައިންގެ މީހެއް ކަމަށްވާ ޕެން ފާތިން ވަނީ ބުޅަލާއި ކުއްތާ އެގައުމުން ބޭލުމުގެ ޚާއްސަ ކެންޕޭނެއް ފަށާފައެވެ. އެގޮތުން އެނިމަލް ޝެލްޓަރއެއްގައި މަސައްކަތް ކުރާ މުއައްޒަފުންނާއި އަދި އެތާގައި ގެންގުޅުނު ހުރިހާ ޖަނަވާރުތަކާއި އެކު އަފްޣާނިސްތާނުން ފޭބުމަށް މިހާރު އޭނާ ވަނީ އެއަރޕޯޓަށް ގޮސްފައެވެ. އެ ޖަނަވާރުތަކާ ނުލައި އޭނާ ގައުމު ދޫކޮށް ނުދާނެ ކަމަށް ބުނެފައިވެއެވެ.
ހަތިޔާރު އެޅި ސިފައިންނާއެކު ހާމިދު ކަރުޒާއީ އިންޓަނޭޝަނަލް އެއާޕޯޓުގައި މަޑުކުރުމުގެ ހުއްދަ ދީފައިވަނީ ހުކުރު ދުވަހުގެ ވަގުތެއްގައެވެ. ފްލައިޓް ހަމަޖެހުނުހާ އަވަހަށް ފުރާނެ ކަމަށް ރިޕޯޓުތަކުން ބުނެއެވެ.
ފާތިން ވަނީ މި އޮޕަރޭޝަނަށް ''އޮޕަރޭޝަން އާރކް''ގެ ނަމުން ނަން ދީފައެވެ. އަދި އުންމީދަކީ އިނގިރޭސިވިލާތަށް ހުރިހާ އެންމެން ބަދަލުވާއިރު، އެމީހުން ގެންގުޅޭ ޕެޓްތައް ހިފައިގެން ބަދަލުވުމަށް ބާރުއެޅުން ކަމަށް އޭނާއާ ހަވާލާދީ މީޑިއާތަކުގައި ރިޕޯޓުކޮށްފައިވެއެވެ.
ހުރިހާ ޖަނަވާރުތަކާއެކު އަފްޣާނިސްތާނުން ފޭބުމަށް މަސައްކަތް ކުރަމުންދާއިރު، މިކަން ވަނީ ގިނަ ބައެއްގެ ސަމާލުކަމަށް އައިސްފައެވެ. ޖަނަވާރުގެ ހައްގުތަކުގައި ވަކާލާތުކުރާ ފާތިން ވަނީ ނައުޒާދްގެ ނަމުގައި އެނިމަލް ޝެލްޓަރއެއް 2000 އަހަރުތަކުގެ ތެރޭގައި އަފްޣާނިސްތާނުގެ ކާބުލްގައި ހުޅުވާފައެވެ.
