ފްރާންސްގެ ޒުވާން ތަރި ކީލިއަން އެމްބާޕޭ ގަންގަން ރެއާލް މެޑްރިޑުން ހުށަހެޅި ދެވަނަ ބިޑާއެކު އޭނާ ވިއްކާލުމާ މެދު ޕީއެސްޖީން މަޝްވަރާކުރަން ފަށާފައިވާ ކަމަށް ރިޕޯޓުތައް ބުނެފިއެވެ.
މި ފަހަރުގެ ޓްރާންސްފާ ބާޒާރުގައި އެމްބާޕޭ ގަތުމަށް ރެއާލުން އެންމެ ފުރަތަމަ ހުށަހެޅީ 160 މިލިޔަން ޔޫރޯގެ ބިޑެކެވެ. އެކަމަކު އެ ބިޑް ބަލައިނުގަންނަން ޕީއެސްޖީން ނިންމުމާއެކު، މިހާރު ވަނީ ބޯނަހާއެކު ޖުމްލަ 180 މިލިޔަން ޔޫރޯގެ ބިޑެއް ހުށަހަޅާފައެވެ. އެއާއެކު މި ފަހަރުގެ ޓްރާންސްފާގައި އެމްބާޕޭ ވިއްކާލަން ޕީއެސްޖީން މަޝްވަރާކުރަން ފަށާފައިވާ ކަމަށް ރިޕޯޓުތައް ބުނެއެވެ.
މީގެ ކުރިން ރެއާލުން ހުށަހެޅި ފުރަތަމަ ބިޑާއެކު ފްރާންސްގެ ނޫހަކަށް ދިން އިންޓަވިއުއެއްގައި ޕީއެސްޖީގެ ސްޕޯޓިން ޑިރެކްޓަރު ލިއޮނާޑޯ އެ ޓީމުން އެއްބަސްވުން އާކުރަން މަސައްކަތްކުރަމުން އަންނަ ކުޅުންތެރިއަކަށް ރެއާލުން ހުށަހެޅި 160 މިލިޔަން ޔޫރޯގެ ބިޑް ނުފުދޭ ކަމަށެވެ. އަދި ޕީއެސްޖީން އަދިވެސް މަސައްކަތްކުރަމުން އަންނަނީ އެމްބާޕޭގެ އެއްބަސްވުން އާކުރަން ކަމަށް ވަނީ ބުނެފައެވެ. ލެއޮނާޑޯ ބުނީ ރެއާލަށް ބަދަލުވާން އެމްބާޕޭ ބޭނުންވާނަމަ އެކަން އެ ކުލަބުން ނުހުއްޓުވާނެ ކަމަށާއި، ނަމަވެސް އޭނާއަށް ކުލަބު ބަދަލުކުރެވޭނީ ޕީއެސްޖީގެ ޝަރުތުތަކާ އެއްގޮތަށް ކަމަށެވެ.
މި ފަހަރުގެ ޓްރާންސްފާގައި ރެއާލުން އެމްބާޕޭ ހޯދުމަށް މަސައްކަތްކުރަމުން އަންނައިރު، އޭނާ މި ވަގުތު ޕީއެސްޖީގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. މީގެ ކުރިންވެސް ރެއާލުން ވަނީ ދެ ފަހަރެއްގެ މަތިން އެމްބާޕޭ ހޯދުމަށް މަސައްކަތްކޮށްފައިވާއިރު، އޭނާ އެންމެ ފުރަތަމަ 2017 ވަނަ އަހަރު މޮނާކޯ ދޫކޮށް ބަދަލުވީ ޕީއެސްޖީއަށް ބަދަލުވީ ލޯނު އެއްބަސްވުމެއްގެ ދަށުންނެވެ.
އެކަމަކު 2018 ވަނަ އަހަރު ޕީއެސްޖީން ވަނީ 145 މިލިޔަން ޔޫރޯ ދެއްކުމަށްފަހު އެމްބާޕޭގެ އެއްބަސްވުން ދާއިމީކޮށްފައެވެ. އަދި އެ ފަހަރު ބޯނަހުގެ ގޮތުގައި އިތުރު 35 މިލިޔަން ޔޫރޯ ޕީއެސްޖީން ޚަރަދުކުރި ކަމަށް ރިޕޯޓުތައް ބުނެއެވެ. އެހެންކަމުން ރެއާލުން ހުށަހެޅި ބިޑް، ޕީއެސްޖީން މޮނާކޯއަށް ދެއްކި ޖުމްލަ އަދަދާ (180 މިލިޔަން ޔޫރޯ) ދިމާވެއެވެ.
ޕީއެސްޖީ ދޫކޮށް ރެއާލަށް ބަދަލުވާން އެމްބާޕޭ ބޭނުންވާއިރު، އޭނާ ވަނީ މިހާތަނަށް ޕީއެސްޖީގައި ތަފާތު މޮޅު ކުޅުމެއް ދައްކާފައެވެ. އެގޮތުން އެމްބާޕޭ ވަނީ މިހާތަނަށް އެ ޓީމަށް ކުޅެދުން 174 މެޗުގައި 133 ލަނޑު ޖަހާފައެވެ. އަދި ވަނީ ޕީއެސްޖީއާއެކު ފްރެންޗް ލީގު ތިން ފަހަރު ކާމިޔާބުކޮށްފައެވެ. މީގެ އިތުރުން ޒުވާން އުމުރުގައި އެމްބާޕޭ ވަނީ ފްރާންސާއެކު ފީފާ ވޯލްޑް ކަޕުވެސް ކާމިޔާބުކޮށްފައެވެ.
