އަނެއްކާވެސް އައު ރެކޯޑެއް، މި މަހުގެ މިހާތަނަށް 120،000 ފަތުރުވެރިން!
މި އަހަރު އެންމެ ގިނަ ފަތުރުވެރިން އައީ އޮގަސްޓު މަހު
ފަތުރުވެރިން ރާއްޖެ އައުން
އޮގަސްޓު މަހުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު 120،529 އަށް އަރައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ރާއްޖޭގެ ފަތުރުވެރިކަމުގެ ރިޕޯޓުގައި ވާގޮތުން އޮގަސްޓު މަސް ވެފައިވަނީ މި އަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައި މަހަށެވެ. އޮގަސްޓު މަހުގެ 25 ވަނަ ދުވަހުގެ ނިޔަލަށް މި މަހުގެ 120،529 ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ބުނެއެވެ. މިއީ މިދިޔަ އަހަރުގެ މިހާތަނާ އަޅާ ބަލާއިރު އެތައް ގުނައެއް ބޮޑު އަދަދެކެވެ. އަދި ކޮވިޑް-19 ގެ ކުރިން އޮތް ހާލަތާ އަޅާ ކިޔާއިރުވެސް އިތުރު އަދަދެކެވެ. 2019 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 120،341 ފަތުރުވެރިންނެވެ.
މިއީ މި އަހަރު އެއްލައްކައަށްވުރެ ގިނަ ފަތުރުވެރިން ރާއްޖެ އައި ތިންވަނަ މަހެވެ. މި އަހަރު އެއްލައްކައަށްވުރެ ގިނަ ފަތުރުވެރިން ރާއްޖެ އައިސްފައިވަނީ މާޗް، ޖުލައި އަދި އޮގަސްޓު މަހުއެވެ. މާޗް މަހު 109،585 ފަތުރުވެރިން ރާއްޖެ އައިސްފައިވެއެވެ. އެއަށްފަހު އަނެއްކާވެސް ފަތުރުވެރިކަން ކުޑަކޮށް ދަށަށް ދިއުމަށްފަހު ޖުލައި މަހު 101،818 ފަތުރުވެރިން ރާއްޖެ އައިސްފައިވެއެވެ. އޮގަސްޓު މަހު ރާއްޖެ އައި ފަތުރުވެރިންގެ އަދަދުވެސް އެއް ލައްކައަށް އަރާފައިވާތީ ޖުލައި މަހަށް ފަހު ހަމަ އެ ބާރުމިނުގައި ފަތުރުވެރިކަން ރަނގަޅުވަމުން އަންނަކަން ވަނީ ފާހަގަކުރެވިފައެވެ. އަދި މި އަހަރުގެ މިހާތަނަށް 732،896 ފަތުރުވެރިން ރާއްޖެ އައި ކަމަށް ވަނީ ރެކޯޑުކޮށްފައެވެ.
ޓޫރިޒަމް މިނިސްޓްރީން އާންމުކޮށްފަިއވާ ރިޕޯޓުގައިވާގޮތުން މި އަހަރު އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. އެއީ 157،876 ފަތުރުވެރިންނެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އިންޑިއާއިން އައިސްފައިވަނީ 146،205 ފަތުރުވެރިންނެވެ. ތިންވަނައިގައި އުޅެނީ ޖަރުމަނެވެ. ޖަރުމަނުން މިހާތަނަށް 42،078 ފަތުރުވެރިން ރާއްޖެ އައިސްފައިވެއެވެ. މީގެ އިތުރުން އެންމެ ގިނަ ފަތުރުވެރިން އައި 10 މާކެޓުގެ ތެރޭގައި ހިމެނޭ ގައުމުތަކަކީ ޔޫއުސްއޭ، ޔޫކްރެއިން، ސައުދި އަރަބިއާ، ސްޕެއިން، ކަޒަކިސްތާން، ޔޫކޭ އަދި ފްރާންސެވެ.
މީގެ ތެރެއިން ބައެއް މާކެޓުތަކުން ފަތުރުވެރިން އަންނަ މިންވަރު މީގެ ކުރީގެ އަހަރުތަކާ އަޅާ ބަލާއިރު އިތުރުވާން ފަށާފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ. މިގޮތުން ފާހަގަކޮށްލެވޭ އެއް މާކެޓަކީ ކަޒަކިސްތާނެވެ. 2019 ވަނަ އަހަރު ކަޒަކިސްތާނުން 3،238 ފަތުރުވެރިން އައިސްފައިވާއިރު، 2020 ވަނަ އަހަރު ކަޒަކިސްތާނުން އައިސްފައިވަނީ 2،876 ފަތުރުވެރިންނެވެ. އަދި މި އަހަރުގެ މިހާތަނަށް ކަޒަކިސްތާނުން އައި ފަތުރުވެރިންގެ އަދަދު 17،334 އަށް އަރާފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ. މިއީ 502.7 އިންސައްތައިގެ އިތުރުވުމެކެވެ.
ކަޒަކްސްތާނުގެ އިތުރުން ޔޫކްރެއިން، ރަޝިއާ، ރޮމޭނިއާ، ބްރެޒިލް، ޔޫއޭއީ، އިންޑިއާ, ޗެކް ރިޕަބްލިކް، ސައުދި އަރަބިއާ އަދި ޕޮލޭންޑުން އަންނަ ފަތުރުވެރިންގެ އަދަދު ވެސް މީގެ ކުރީގެ އަހަރުތަކާ އަޅާ ބަލާއިރު އިތުރުވަމުން އަންނަކަމަށް ޓޫރިޒަމް މިނިސްޓްރީގެ ރިޕޯޓުގައި ވެއެވެ.
ރާއްޖެ އަންނަ ފަތުރުވެރިންގެ އަދަދު އިތުރުވާން ފަށާފައިވަނީ ރާއްޖޭގައި ކުރިއަށްގެންދާ ވެކްސިން ޕްރޮގްރާމާއެކު، ގިނަ މާކެޓުތަކަކުން ފަތުރުވެރިންނަށް ރާއްޖެ އާދެވޭގޮތަށް ހުޅުވާލުމުންނެވެ. ވެކްސިން ޕްރޮގްރާމް މިހާރު ކުރިއަށްދާ ބާރުމިނުގައި ކުރިއަށްދާނަމަ ރާއްޖޭގެ ފަތުރުވެރިކަން ނުހުއްޓި ކުރިއަށްދާނެ ކަމަށްކަމާބެހޭ މާހިރުން ބުނެއެވެ. އަދި ރާއްޖޭގެ އިޤްތިޞާދު ވެސް ދާނީ ރަނގަޅުވަމުން ކަމަށް ބުނެފައިވެއެވެ.
