އަފްޣާނިސްތާނުގެ ކާބުލް އެއަރޕޯޓުގެ ބޭރުގައި ދިން ހަމަލާތަކުގައި 100ށް ވުރެ ގިނަ މީހުން މަރުވެފައިވާ ކަމަށް ރިޕޯޓުކޮށްފިއެވެ.

ބޭރުގެ ނޫސްތަކުުގައި ރިޕޯޓުކޮށްފައިވާގޮތުން ކާބުލް އެއަރޕޯޓުގައި ދިން ޓެރަރިސްޓު ހަމަލާގައި އެގައުމުގައި ހަރަކާތްތެރިވަމުން ދިޔަ އެމެރިކާ ސިފައިންގެ 13 މީހަކު ހިމެނެއެވެ. އަދި އަފްޣާނިސްތާނުގެ އާންމު ރައްޔިތުންގެ ތެރެއިން 90 މީހުން ވަނީ މަރުވެފައެވެ.

އަފްޣާނިސްތާނުން ފައިބަން ބޭނުންވާ މީހުން ބޭލުމުގެ މަސައްކަތް ކާބުލް އެއަރޕޯޓުގައި ހިނގަމުންދަނިކޮށް ކާބުލް އެއަރޕޯޓު ބޭރުގައި ޖާނުންފިދާވެގެންދިން ބޮމުގެ ހަމަލާ އާއި ބަޑީގެ ހަމަލާތަކާ ގުޅޭގޮތުން ވާހަކަ ދައްކަވަމުން އެމެރިކާގެ ރައީސް ޖޯ ބައިޑަން ވަނީ އެ ހަމަލާތަކުގެ ބަދަލު ހިފާނެ ކަމަށް ވިދާޅުވެފައެވެ. އަދި ހަމަލާތައް ދިން ނަމަވެސް އަފްޣާނިސްތާނުން ފައިބަން ބޭނުންވާ މީހުން އެގައުމުން ބޭލުމުގެ މަސައްކަތްކުރާނެ ކަމަށް ބައިޑަން ވަނީ ވިދާޅުވެފައެވެ.

ކާބުލް އެއަރޕޯޓަށް މި ޓެރަރިސްޓު ހަމަލާދީފައި މި ވަނީ އަފްޣާނިސްތާނުގައި ހަރަކާތްތެރިވާ ސިފައިން އެ ގައުމުން ފައިބާނެ ކަމަށް ބުނެފައިވާ ސުންގަޑި ހަމަވާން ފަސް ދުވަހަށް ވެފައި ވަނިކޮށެވެ. ތާވަލު ކުރެވިފައިވާ ގޮތަށް އޮގަސްޓު 31ގެ ނިޔަލަށް އެމެރިކާ ސިފައިން އަފްޣާނިސްތާނުން ފޭބުމުގެ މަސައްކަތްތައް ކުރަމުންދާ އިރު، އެމެރިކާގެ ސިފައިން އެ ގައުމުން ފައިބާނީ އެ ގައުމުގައި ތިބި އެމެރިކާގެ ރައްޔިތުން ސަލާމަތްކަމާއެކު އެ ގައުމުން ބޭލެވުމުން ކަމަށް ރައީސް ބައިޑަން ވަނީ މީގެ ކުރިން ވިދާޅުވެފައެވެ.

އަފްޣާނިސްތާނުގެ ކޮންޓްރޯލް ޠާލިބާނުން ނެގުމާއެކު އަފްޣާނިސްތާނުން ފައިބަން ބޭނުންވާ އެތައް ހާސް ބަޔަކު އަންނަނީ ކާބުލް އެއަރޕޯޓަށް ޖަމާވަމުންނެވެ. އެގޮތުން ފާއިތުވި 10 ވަރަކަށް ދުވަހު ވެސް ކާބުލް އެއަރޕޯޓް ހުންނަ ސަރަހައްދު ވަނީ މީހުން ގިނަވެ ތޮއްޖެހިފައެވެ. އަފްޣާނިސްތާނުގައި ތިބި ބޭރު ގައުމުތަކުގެ ފައުޖުތަކާއި ބޭރު ގައުމުތަކުގެ މީހުންގެ އިތުރުން އަފްޣާން ރައްޔިތުންގެ ތެރެއިން ގައުމު ދޫކޮށްދާން ބޭނުންވާ މީހުން ގައުމުން ބޭލުމުގެ ކަންކަން އަންނަނީ ކުރަމުންނެވެ.

އެގޮތުން އެމެރިކާގެ އަސްކަރީ ފްލައިޓެއް ކޮންމެ 39 މިނެޓަކުން ކާބުލް އެއަރޕޯޓުން މީހުން ގޮވައިގެން ފުރާކަމަށް އަލްޖަޒީރާއިން ވަނީ ރިޕޯޓްކޮށްފައެވެ. މިހާތަނަށް އައިއިރު 88،000ށް ވުރެ ގިނަ މީހުން އަފްޣާނިސްތާނުން ބޭލިފައިވާކަމަށް އެމެރިކާއިން ވަނީ ބުނެފައެވެ.

އެމެރިކާގެ އޮފިޝަލުންނާއި ހަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި އެއަރޕޯޓަށް ދިން ހަމަލާތަކުގެ ފަހަތުގައި ވަނީ ކޮން ބައެއްތޯ ބެލުމުގެ ތަހުގީގުދަނީ ކުރިޔަށެވެ. ނަމަވެސް މިކަމުގެ ފަހަތުގައިވާ ބަޔަކީ އައިއެސްގެ ޚުރާސަން ގްރޫޕްކަމަށް ވަރަށް ބޮޑަށް ގަބޫލުކުރެވޭކަމަށް ވަނީ ރިޕޯޓްކޮށްފައެވެ.

އައިއެސްގެ ޚުރާސަން ޖަމާއަތަކީ އެމެރިކާ އާއި ޠާލިބާނުންނާ ވެސް ދެކޮޅު ޖަމާއަތެކެވެ. މި ޖަމާއަތް އަފްޣާނިސްތާނުގައި އުފެދިފައިވަނީ 2015 ވަނަ އަހަރުއެވެ. މިއީ ޠާލިބާން ޖަމާއަތުގެ ތެރެއިން އެޖަމާއަތާ ހިތްހަމަ ނުޖެހިފައިތިބި ހަނގުރާމަވެރިން ބޭނުންކޮށްގެން އައިއެސްއިން އެ ސަރަހައްދުގައި އުފައްދާފައިވާ ޖަމާއަތެކެވެ.