ޖަޕާނުގެ ފަތުރުވެރިން އިތުރުކުރުމަށް ވިޒިޓް މޯލްޑިވްސްގެ ޚާއްސަ ހަރަކާތްތަކެއް!

ރާއްޖެއަށް އަންނަ ޖަޕާނުގެ ފަތުރުވެރިން އިތުރުކުރުމަށް ވިޒިޓް މޯލްޑިވްސްގެ ޚާއްސަ ހަރަކާތްތަކެއް ހިންގައިފިއެވެ.

ޖަޕާނުގެ ބޯޑަރު ފަތުރުވެރިނަށް ހުޅުވާލައި ފަތުރުވެރިކަން ފެށުމަށް ދަނީ ތައްޔާރުވަމުންނެވެ. މި ދުވަސްވަރާއި ދިމާކޮށް ވިޒިޓް މޯލްޑިވްސްއިން ވަނީ ޚާއްސަ ހަރަކާތްތަކެއް ކުރިއަށްގެންދަން ނިންމާފައިވާކަން ހާމަކޮށްފައެވެ. އެންމެ ފަހުން ވިޒިޓް މޯލްޑިވްސްއިން ކުރިއަށްގެންގޮސްފައި ވަނީ ޖަޕާނުގެ "ޓަބި މޫސް"އާ ގުޅިގެން އެ ޤައުމުގައި ރާއްޖެ އިޝްތިހާރުކުރުމުގެ ކެމްޕެއިނެކެވެ.

"ޓަބި މޫސް"އަކީ ޖަޕާނުގެ އެންމެ ކުރިއަރާފައިވާ ޓްރެވަލް ސޯޝަލް މީޑިއާ ޕްލެޓްފޯމްއެވެ. ޖަޕާނުގައި ރާއްޖެ އިޝްތިހާރުކުރުމަށް ވިޒިޓް މޯލްޑިވްސްއިން މި ހަރަކާތް ކުރިއަށްގެންގޮސްފައި ވަނީ އޮންލައިންކޮށެވެ. މި ހަރަކާތުގެ އެންމެ ބޮޑު ބޭނުމަކީ ޖަޕާނުގައި ރާއްޖޭގެ މަޤްބޫލުކަން އިތުރުކޮށް އެ ޤައުމުން ރާއްޖެ އަންނަ ފަތުރުވެރިން އިތުރުކުރުމެވެ. މި ކެމްޕެއިންގެ ތެރެއިން އެ ޤައުމުގެ ފަތުރުވެރިންނަށް, ރާއްޖެއަކީ މި ހާލަތުގައިވެސް ދަތުރުކުރުން ރައްކާތެރި ޤައުމެއްކަން ބުނެދީފައިވާކަނެކަމަށް ވިޒިޓް މޯލްޑިވްސްއިން ބުނެއެވެ. މި ކެމްޕެއިންގެ ތެރެއިން ރާއްޖޭގެ ފަތުރުވެރިކަމުގެ ޞިނާޢަތުގެ މަޢުލޫމާތު ވަނީ ފޯރުކޮށްދީފައެވެ. އޭގެތެރޭގައި ރިސޯޓްތަކާއި، ގެސްޓްހައުސްތަކާއި، ސަފާރީތައް ހިމެނެއެވެ. އަދި ކޮވިޑް-19އާ ގުޅިގެން ރާއްޖެއަށް ދަތުރުކުރުމުގައި އަޅާފައިވާ ފިޔަވަޅުތައްވެސް ޖަޕާނުގެ ފަތުރުވެރިންނަށް ވަނީ ބުނެދީފައެވެ.

2019 ވަނަ އަހަރު ޖަޕާނު ހިމެނިފައިވަނީ ރާއްޖެއަށް 9 ވަނައަށް އެންމެ ގިނައިން ފަތުރުވެރިން އައި ޤައުމުގެ ގޮތުގައެވެ. 2019 ވަނަ އަހަރު ޖަޕާނުން 44،251 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.