ލަގްޝަރީ އޮސްޓްރޭލިއަން ޓްރެވަލް ޓްރޭޑް އީ-ނިއުސް (ލަޓޭ)ގެ ޖުލައި މަހުގެ ޑެސްޓިނޭޝަނަކީ ރާއްޖެއެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން އޮސްޓްރޭލިއާގައި ރާއްޖެ އިޝްތިހާރުކުރުމުގެ މަސައްކަތް ލަޓޭއާއެކު ފަށައިފިއެވެ. އެގޮތުން ރާއްޖެއަކީ ރައްކާތެރި އަދި ލަގްޝަރީ މަންޒިލެއްގެ ގޮތުގައި އޮސްޓްރޭލިއާގައި އިޝްތިހާރު ކުރާނެއެވެ.
ލަޓޭ އަކީ އޮސްޓްރޭލިއާގެ އީ-ނިއުސް ލެޓަރއެކެވެ. ކޮންމެ ހަފްތާއެއްގެ ހުކުރު ދުވަހު ލަޓޭގެ އައު ނިއުސްލެޓަރއެއް ޕަބްލިޝްކުރާ އިރު، ލަޓޭގެ އަމާޒަކީ ޓްރެވަލް ރީޓެއިލަރސް އަދި އިންޑަސްޓްރީގެ ޕްރޮފެޝަނަލުންނަށް އެންމެ ފަހުގެ މައުލޫމާތާއި ޚަބަރު ފޯރުކޮށްދިނުމެވެ.
ލަޓޭއާއެކު އެމްއެމްޕީއާރުސީން ކުރިއަށް ގެންދާ މިކެމްޕެއިންގައި ޖުލައި މަހުގެ ކޮންމެ ހުކުރު ދުވަހެއްގައި ރާއްޖެ އިޝްތިހާރު ކުރުމުގު އާރޓިކަލްތައް ޕަބްލިޝްކުރެވޭނެއެވެ. އެގޮތުން މި އާރޓިކަލްތަކުގައި، ރާއްޖޭގެ ރައްކާތެރިކަމާއި "ވަން އައިލެންޑް ވަން ރިސޯޓް" ކޮންސެޕްޓްގެ އިތުރުން، ރާއްޖޭގައި ފަތުރުވެރިންނަށް ތަޖުތިބާ ކުރެވޭނެ ޚާއްސަ ކަންތައްތަކާއި ރާއްޖޭގެ ކަނޑުއަޑީގެ ރީތިކަން އިޝްތިހާރު ކުރެވިގެންދާނެއެވެ.
މިއާރޓިކަލްތައް އޮސްޓްރޭލިއާގެ 2000އެއްހާ ލަގްޝަރީ ޓްރެވަލް އެޖެންޓުންނަށް ހިއްސާކުރެވިގެންދާނެ ކަމަށް އެމްއެމްޕީއާރުސީން ބުނެއެވެ.
ލަޓޭ ނިއުސް ލެޓަރ އަކީ އޮސްޓްރޭލިއާ އަދި ނިއުޒިލޭންޑްގެ 15000އަށްވުރެ ގިނަ ޓްރެވަލް އެޖެންޓުންނާއި، ޓުއަރ އޮޕަރޭޓަރުން އަދި ބްރޯކަރުންގެ ވިއުވަރޝިޕެއް އޮންނަ ނިއުސްލެޓަރއެކެވެ.
ރާއްޖެއަކީ ރައްކާތެރި މަންޒިލެއްގެ ގޮތުގައި ދުނިޔޭގެ އެކި ކަންކޮޅުތަކުގައި އިޝްތިހާރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ.
