އެމްޑީޕީގެ އެތެރޭގެ އިންތިޚާބުގައި ޔޫތް މިނިސްޓަރު އަހުމަދު މަހްލޫފަށް ވާދަ ނުކުރެވޭ މައްސަލަ، އިސްތިއުނާފް މަޖިލީހަށް ހުށަހެޅުމުގެ ފުރުސަތު އަދިވެސް އެބައޮތް ކަމަށް އެ ޕާޓީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.

އެމްޑީޕީ އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޕާޓީގެ ޗެއަރޕާސަން ހަސަން ލަތީފް ވިދާޅުވީ މިނިސްޓަރ މަހްލޫފް އިންތިޚާބުގައި ވާދަ ނުކުރެވޭ މައްސަލައިގައި ޝަކުވާއެއް ހުށަހަޅުއްވާފައިވާ ކަމަށާއި، މަހްލޫފް ހުށަހެޅުއްވި ޝަކުވާ، ޝަކުވާ ބަލާ ކޮމިޓީން ބެލުމަށްފަހުގައި މަހްލޫފަށް ޖަވާބެއް އަރުވާފައިވާނެ ކަމަށެވެ.

ހަސަން ލަތީފް ވިދާޅުވީ އެމްޑީޕީގެ އެތެރޭގެ އިންތިޚާބުތަކުގައި އަބަދުވެސް އަމަލުކުރާ އުސޫލާ އެއްގޮތަށް މިފަހަރުގެ އިންތިޚާބުގައި ވެސް އަމަލުކުރަމުންދާ ކަމަށާއި، އިންތިޚާބުގެ ކަމެއްގައި ޝަކުވާއެއް ހުށަހަޅާފައިވާނަމަ އެ ޝަކުވާއެއް ބެލުމަށްފަހު ޖަވާބެއް އަރުވާނެ ކަމަށާއި، އެ ޖަވާބާ މެދު ހިތްހަމަ ޖެހިވަޑައިނުގަންނަވާނަމަ އިސްތިއުނާފް ފަނޑިޔާރުންގެ މަޖިލީހަށް މައްސަލަ ހުށަހެޅޭނެ ކަމަށެވެ.

ހަސަން ލަތީފް ވިދާޅުވީ މިނިސްޓަރ މަހުލޫފުގެ މައްސަލައިގައި އިލެކްޝަންސް ކޮމިޝަނުން ސިޓީއެއް ލިބިފައިވާ ކަމަށާއި، އެއީ ޝަކުވާ ހުށަހަޅާ ކޮމިޓީން ނިންމި ނިންމުމުގެ ތަފްސީލު ހޯދަން އެދިކަމަށެވެ. އަދި އެ ސިޓީގައި ބުނެފައިވާ މުއްދަތުގެ ތެރޭގައި އިލެކްޝަންސް ކޮމިޝަނަށް ވެސް ޖަވާބު އަރުވާނެކަމަށް ހަސަން ލަތީފް ވިދާޅުވިއެވެ.

މި އިންތިޚާބާ ގުޅިގެން ގައުމީ ހިންގާ މަޖިލީހުން ނިންމުންތަކެއް ނިންމަވާފައިވާކަން ފާހަގަކުރައްވައި ހަސަން ލަތީފް ވިދާޅުވީ ކެންޑިޑޭޓުންގެ ކިބައިގައި ހުންނަންޖެހޭ ޝަރުތުތަކެއް ކަނޑައަޅާފައިވާނެ ކަމަށާއި، އެކަމަށް ގަރާރެއް ވެސް ފާސްކޮށްފައިވާނެ ކަމަށެވެ.

އެމްޑީޕީން ވަނީ އެޕާޓީގެ އެތެރޭގެ އިންތިޚާބުގައި އެސެޓް ރިކަވަރީ ކޮމިޝަނާއި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަ ބަލާ ކޮމިޝަނުން ބަލާ މައްސަލައެއްގައި ތުހުމަތު ކުރެވޭ އެއްވެސް ބޭފުޅަކަށް ވާދަ ނުކުރެވޭނެކަމަށް ނިންމާފައެވެ. މީގެ އިތުރުން އެމްއެމްޕީއާރްސީގެ ޚިޔާނާތާ ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށް ވެސް ވާދަ ނުކުރެވޭނެ ކަމަށް ވަނީ ނިންމާފައެވެ.