މެމްބަރުން ދިރިއުޅުއްވާ ގެކޮޅާ ކައިރިން ޕާކިންގ ސްލޮޓް ހަމަޖެއްސުމަށް ހުށަހަޅަނީ

ރައްޔިތުންގެ މަޖިލީހުގެ މެމްބަރުން ދިރިއުޅުއްވާ ގެޔާ އެންމެ ކައިރީގައި ހުންނަ ޕާކިންގ އޭރިއާއަކުން, ޕާކިންގ ސްލޮޓް އޮންނަ އުސޫލުގެ ތެރެއިން, ޕާކިންގ ސްލޮޓް ހަމަޖެއްސުމަށް ރައްޔިތުންގެ މަޖިލީހުގެ އިމްތިޔާޒު އަދި ސުލޫކު ކޮމިޓީން ނިންމައިފިއެވެ.

ބުދަ ދުވަހު ކުރިޔަށްދިޔަ ކޮމިޓީގެ ބައްދަލުވުމެއްގައި އެފަދަ އިންތިޒާމުތަކެއް ހަމަޖެއްސުމަށް މަޖިލީހަށް ހުށަހަޅައިގެން އެކަން ކުރިޔަށް ގެންދިޔުމަށް ހުށަހެޅުއްވީ މަކުނުދޫ ދާއިރާގެ މެމްބަރ މުޙައްމަދު ރާއީއެވެ. އެހުށަހެޅުން ހުށަހަޅުއްވަމުން ރާއީ ވިދާޅުވީ ޕާކިންގ ސްލޮޓް ދޫކުރާ އުސޫލުން, ފައިސާ ދައްކާގޮތަށް މަޖިލީހުގެ މެމްބަރުންނަށްވެސް ޕާކިންގ ސްލޮޓްތަކެއް ހަމަޖެއްސުމަށް ހުށަހަޅުއްވާކަމަށެވެ. އެއީ މެމްބަރުން ގެންގުޅުއްވާ ކާރުކޮޅު ޕާކުކުރާނެ ތަނެއް ނެތުމުގެ ސަބަބުން ދަތިތަކާއި ކުރިމަތިވާއިރު, މެމްބަރުންގެ ސަލާމަތާއި ރައްކާތެރިކަމަށްވެސް މުހިންމު ކަމެއްކަމަށް ރާއީ ވިދާޅުވިއެވެ. ދައުލަތުގެ ވަޒީރުންނާއި ކުންފުނިތަކުގެ ވެރިންނަށް ކާރުގެ އިތުރުން ޕާކިންގ ސްލޮޓް ހަމަޖެހިފައި އޮންނައިރު މަޖިލީހުގެ މެމްބަރުންނަށްވެސް އެ އުސޫލުގެ ތެރެއިން އެކަން ހަމަޖެހިގެން ދިޔުމަކީ މުހިންމު ކަމެއްކަމަށް ދެކެވަޑައިގަންނަވާކަމަށް އޭނާ ވިދާޅުވިއެވެ.

މިކަން މަޖިލީހުގެ ޖަލްސާއަށް ހުށަހެޅި ފާސްވެގެންދިޔުމަށް އެދިވަޑައިގަންނަވާ ކަމަށާއި, މީގެއިތުރުން އެކި މެމްބަރުންގެ ސެކިޔުރިޓީގެ ކަންކަމަށް ބަލާއިރުވެސް މިއީ ހުރި ދަތިތަކަށް ހައްލެއް ގެނެވޭނެ ގޮތެއްކަމަށް ރާއީ ވިދާޅުވިއެވެ.

ރާއީގެ ހުށަހެޅުއްވުމަށް ތާއީދުކުރައްވާފައިވަނީ ތިނަދޫ ދެކުނު ދާއިރާގެ މެމްބަރ ޢަބްދުﷲ ސަނީފެވެ. މިކަން ކޮމިޓީން ކުރިޔަށް ގެންދިޔުމަށް ކޮމިޓީގެ ބައްދަލުވުމުގައި ވަނީ ފާސްކޮށްފައެވެ.

މީގެއިތުރުން ރައްޔިތުންގެ މަޖިލީހުގެ މެމްބަރުން ބޭނުންކުރަމުންދާ ސޯޝަލް މީޑިޔާ އެކައުންޓްތައް ވެރިފައި ކުރުމަށް މަޖިލީހުގެ ސެކްރެޓޭރިއަޓަށް ހުށަހެޅުމަށްވެސް ކޮމިޓީގެ ބައްދަލުވުމުގައި ވަނީ ނިންމާފައެވެ. މެމްބަރުންގެ އެކައުންޓްތައް ވެރިފައިކުރުމަށް މަޖިލީހުގެ އިދާރާ މެދުވެރިވެގެން އެކަން ކުރުމަށް ހުށަހަޅުއްވާފައިވަނީ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ޢަބްދުﷲ އެވެ. އެއީ މެމްބަރުންގެ ނަމުގައި ފޭކް އެކައުންޓްތައް ހަދައިގެން ގޯސް މައުލޫމާތުތައް ދައުރުކުރާ ކުރުން ހުއްޓުމަކަށް ގެނައުމަށްޓަކައެވެ.

ކޮމިޓީން ވަނީ މެމްބަރުންގެ ސޯޝަލް މީޑިޔާ އެކައުންޓްތައް މަޖިލީހުގެ އިދާރާ މެދުވެރިވެގެން ވެރިފައި ކުރުމުގެ ކަންކަން ކުރިޔަށް ގެންދިޔުމަށް ސެކްރެޓޭރިއަޓްގައި ދެންނެވުމަށް ފާސްކޮށްފައެވެ.