އަފްޣާނިސްތާނުގެ ކުރީގެ ކޮމިއުނިކޭޝަން މިނިސްޓަރު މިހާރު ޕިއްޒާ ޑެލިވަރީކުރުމުގައި!

އަފްޣާނިސްތާނުގެ ކުރީގެ ކޮމިއުނިކޭޝަން އެންޑް ނެކްނޮލޮޖީ މިނިސްޓަރު ސަޢީދު އަޙުމަދު ސަދާތު، ޕިއްޒާ ޑެލިވަރީގެ ވަޒީފާ އަދާކުރާ ފޮޓޯތަކެއް އާއްމުވެއްޖެއެވެ.

އަލްޖަޒީރާއިން އާއްމުކޮށްފައިވާ މިފޮޓޯތަކަށް ގިނަ ބައެއްގެ ސަމާލުކަން ލިބިފައިވާއިރު، އެ ފޮޓޯއިން ފެންނަނީ ސަދާތުކަން އޭނާ ކަށަވަރުކޮށްދީފައިވާ ކަމަށް ބޭރުގެ މީޑީއާތަކުގައި ރިޕޯޓުކޮށްފައިވެއެވެ. ފޮޓޯތަކުން ފެންނަނީ ސަދާތު ބައިސްކަލުގައި ފިއްޒާ ޑެލިވަރީ ކުރުމުގެ މަސައްކަތުގައި އުޅޭ މަންޒަރެވެ.

ޖަނުމަނުވިލާތުގެ ލައިޕްސިގްގައި ދިރިއުޅެމުންދާ ސަދާތުއާ ހަވާލާދީ މީޑިއާތަކުގައި ރިޕޯޓުކޮށްފައިވަނީ, ޖަރުމަނުވިލާތުގެ ވަރަށް ގިނަ ކުންފުނިތަކުގެ ވަޒީފާއަށް ކުރިމަތިލާފައިވާ ކަމަށާއި، މިހާތަނަށް ވަކި ޖަވާބެއް ނުލިބޭ ކަމަށެވެ. އަދި އުންމީދަކީ ޖަރުމަނުވިލާތުގެ ޓެލެކޮމް ކުންފުނީގައި މަސައްކަތް ކުރުމުގެ ފުރުސަތު ލިބިގެން ދިއުން ކަމަށެވެ. ޖަރުމަނުވިލާތަށް ދިރިއުޅުން ބަދަލުކޮށްފައިވަނީ އަމާން ރައްކާތެރި އުފާވެރި ދިރިއުޅުމެއް އާރާސްތުކުރަން ބޭނުންވާތީ ކަމަށް އޭނާއާ ހަވާލާދީ ރިޕޯޓުކޮށްފައިވެއެވެ. ޕިއްޒާ ޑެލިވަރީގެ ވަޒީފާއިން މީހާގެ އަގު ނުވެއްޓޭ ކަމަށާއި، އެވަޒީފާއާ މެދު އޭނާ ހިތްހަމަޖެހޭކަން ވެސް ފާހަގަކޮށްފައިވެއެވެ.

2018 އަހަރު އަޝްރަފް ޣަނީގެ ކެބިނެޓްގައި މަސައްކަތް ކުރުމަށްފަހު ވަޒީފާއިން އިސްތިއުފާދިނީ 2020ވަނަ އަަހަރުގެ ތެރޭގައި އުފެދުނު ޚިޔާލު ތަފާތުވުންތަކުގެ ސަބަބުންނެވެ. 2020ވަނަ އަހަރު މަގާމުން އިސްތިއުފާ ދިނުމަށްފަހު އޭނާ ވަނީ ދިރިއުޅުން ޖަރުމަނުވިލާތަށް ބަދަލުކޮށްފައެވެ.

ސަދާތު ވަނީ އޮކްފޯޑް ޔުނިވަރސިޓީން ކޮމިއުނިކޭޝަން އެންޑް އިލެކްޓްރޯނިކް އިންޖިނިއަރިންގެ ދާއިރާއިން މާސްޓަރސް ހާސިލްކޮށްފައެވެ. 23 އަހަރު އެދާއިރާގައި މަސައްކަތް ކޮށްފައިވާއިރު، 13 ގައުމެއްގައި 20 ކުންފުނީގެ އެކި މަގާމުތައް ފުރުއްވިއެވެ. އެގޮތުން ސަޢޫދީ ޢަރަބިއްޔާގައި ހުންނަ ސަޢޫދީ ޓެލެކޮމްގައިވެސް ސަދާތު މަސައްކަތް ކޮށްފައިވެއެވެ. މީގެ އިތުރުން އަފްޣާނިސްތާން ކޮމިއުނިކޭޝަން އެންޑް އިންފޮމޭޝަން ޓެކްނޮލޮޖީ މިނިސްޓްރީގައި ޓެކްނިކަލް އެޑްވައިޒަރަކަށް ވެސް 2005 ވަނަ އަހަރުން ފެށިގެން 2013 ވަނަ އަހަރާ ހަމައަށް މަސައްކަތް ކޮށްފައިވެއެވެ. އަދި ލަންޑަންގެ އެރިއާނާ ޓެލެކޮމްގެ ސީއީއޯއަކަށްވެސް 2016ން 2017ށް މަސައްކަތް ކޮށްފައިވެއެވެ.