ފަންނީ ވަޒީފާތަކަށް ބިދޭސީން ގެނައުން މަދުކުރެވޭނެ މާސްޓަރ ޕްލޭންއެއް!

ފަންނީ ވަޒީފާތަކަށް ބިދޭސީން ގެނައުން މަދުކުރެވޭނެ މާސްޓަރ ޕްލޭންއެއް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު އިފްތިތާހު ކޮށްދެއްވައިފިއެވެ.

"ނޭޝަނަލް ސްކިލްސް ޑިވޮލޮޕްމަންޓް މާސްޓަރ ޕްލޭން" ގެ ނަމުގައި ތައާރަފްކުރި މި ޕްލޭން އިފްތިތާޙު ކޮށްދެއްވާފައިވަނީ ބުދަ ދުވަހު އޮތް ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ, މި މާސްޓަރ ޕްލޭންއަކީ ޤައުމުގެ ތަރައްޤީއަށް ބޭނުންވާ މީހުން ބިނާކުރުމަށް ސަރުކާރުން ގެންގުޅޭ ސިޔާސަތުގެ މުހިއްމު ބައެއް ކަމަށެވެ. އަދި މި ޕްލޭނަށް އަމަލުކުރަން ފެށުމުން ރާއްޖޭގެ ވަޒީފާގެ ބާޒާރަށް ދިމާވެފައިވާ ގިނަ ގޮންޖެހުންތަކަށް ހައްލުތަކެއް ލިބިގެންދާނެކަމަށެވެ.

ރާއްޖޭގައި މީހުން ބިނާކުރުމުގެ މަސައްކަތް އަބަދުވެސް ކުރަމުންދާކަން ފާހަގަކުރައްވައި ރައީސް އިތުރަށް ވިދާޅުވީ، މިއީ ރާއްޖޭގެ އިޤްތިސާދީ ގޮތުން ފާހަގަކުރެވޭ ރޮނގުތަކުންނާއި، ވަޒީފާގެ ބާޒާރުގައި އެންމެ ބޭނުންޖެހިފައިވާ ދާއިރާތަކުން މީހުން ބިނާކުރުމަށް މާސްޓަރ ޕްލޭންއެއް އެކުލަވާލެވުނު ފުރަތަމަ ފަހަރު ކަމަށެވެ. އަދި ސަރުކާރުން މި މާސްޓަރ ޕްލޭން އެކުލަވާލާފައިވަނީ ކުރިއަށް އޮތް 5 އަހަރަށް އަމާޒުކޮށްގެންކަން ވެސް ރައީސްގެ ވާހަކަފުޅުގައި ފާހަގަކުރެއްވިއެވެ.

ރައީސް އިތުރަށް ވިދާޅުވީ، ރާއްޖޭގެ ވަޒީފާގެ ބާޒާރަށް އެންމެ ބޮޑަށް މީހުން ބޭނުންވެފައިވާ ދާއިރާތަކާއި ރާއްޖޭގެ ވަޒީފާގެ ބާޒާރުގައި މީހުން ތަމްރީނު ކުރަމުންދާ ދާއިރާތަކުގެ މެދުގައި އޮތް ހުސްކަން މި ޕްލޭންގެ އެހީގައި ކުޑަ ކުރެވިގެންދާނެ ކަމަށެވެ. އަދި ފަންނީ ވަޒީފާތަކަށް ތަމްރީނު ލިބިފައިވާ ދިވެހިން ހޯދުމަށް ދިމާވެފައިވާ ދަތިތަކަށް ވެސް މި ޕްލޭންގެ ދަށުން ހައްލު ލިބިގެންދާނެ ކަމަށާއި، ފަންނީ ވަޒީފާތަކަށް ބިދޭސީން ގެނައުން ވެސް މަދުކުރެވޭނެކަމަށެވެ. އަދި ރައީސް ވިދާޅުވީ އެކަމުގެ ނަތީޖާއެއްގެ ގޮތުން އިޖުތިމާއީ ގޮތުންނާއި، އިޤްތިސާދީ ގޮތުން މިހާރު ކުރިމަތިވަމުންދާ ބޮޑެތި ގޮންޖެހުންތަކަށް ހައްލު ލިބިގެންދާނެ ކަމަށެވެ.

މި ޕްލޭންއާ ގުޅޭގޮތުން އިތުރަށް ވާހަކަ ދައްކަވަމުން ރައީސް ވިދާޅުވީ، މި ޕްލޭންގެ ދަށުން މީހުން ބިނާ ކުރުމުގެ މަސައްކަތް ލާމަރުކަޒުކޮށް، ރާއްޖޭގެ އެކި ހިސާބުތަކުގައި ޓިވެޓް ސެންޓަރުތަކެއް ޤާއިމު ކުރެވިގެންދާނެ ކަމަށެވެ.

ރައީސް ވިދާޅުވީ، ކޮވިޑް-19 ގެ ދަތި އުނދަގުލުގައި ވެސް، ސަރުކާރުގެ އެންމެ އިސް ސިޔާސަތަކަށް ހެދީ، ދައުލަތުގެ ޚަރަދުތައް ކުޑަކޮށްގެންނަމަވެސް، މީހުން ބިނާކުރުމާ ގުޅިފައިވާ މަސައްކަތްތައް ހުއްޓާނުލައި ކުރިއަށް ގެންދިޔުން ކަމަށެވެ.

އޭގެ އިތުުރުން، ރާއްޖޭގެ އެކި ކަންކޮޅުތަކުގައި ސަރުކާރުން ހިންގަމުންދާ ތަރައްޤީގެ މަޝްރޫއުތަކުގެ ނަތީޖާއެއްގެ ގޮތުން ވެސް އެތައް ވަޒީފާއެއް އުފެދިގެންދާނެކަން ފާހަގަކުރައްވައި ރައީސް ވަނީ މިއިން ކޮންމެ މަޝްރޫޢަކާއެކު އުފެދޭ މުއައްސަސާތައް ހިންގުމަށްޓަކައި، ކިޔަވައިގެން ތިބި ފަންނީ މީހުން ބޭނުންވާނެކަމަށް ވިދާޅުވެފައެވެ. އަދި އެ ތަންތަން މަރާމާތުކޮށް ބެލެހެއްޓުމަށްޓަކައި ވެސް، ހުނަރުވެރި ފަންނީ މީހުން ބޭނުންވާނެކަން ރައީސްގެ ވަހަކަފުޅުގައި ފާހަގަކުރެއްވިއެވެ.