އޮގަސްޓް 31ށް އަފްޣާނުގައި ތިބި އެމެރިކާ ސިފައިން ފައިބާނެ - ބައިޑަން

ތާވަލުކުރެވިފައިވާ ގޮތަށް އަފްޣާނުގައި ހަރަކާތްތެރިވާ އެމެރިކާގެ ސިފައިން އެގައުމުން ފައިބާނެ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

އަފްޣާނުގައި ހަރަކާތްތެރިވާ އެމެރިކާ ސިފައިން އޮގަސްޓު 31 ވަނަ ދުވަހުގެ ނިޔަލަށް އެގައުމުން ފައިބާން ޖެހޭނެ ކަމަށް ޠާލިބާނުން ބުނެފައި ވާއިރު، ތާވަލުކުރެވިފައިވާ ގޮތަށް އެމެރިކާގެ ސިފައިން އެގައުމުން ފޭބުމުގެ މަސައްކަތްތައް ކުރެވެމުންދާ ކަމަށް ރައީސް ބައިޑަން ވިދާޅުވެފައި ވަނީ އަންގާރަ ދުވަހުއެވެ. މިކަމާ ގުޅޭގޮތުން ވާހަކަދައްކަވަމުން ބައިޑަން ވަނީ އެމެރިކާގެ ސިފައިން މާ ގިނަ ދުވަހު އަފްޣާނިސްތާނުގައި ބައިތިއްބަން ބޭނުންފުޅު ނުވާކަމަށް ވެސް ވިދާޅުވެފައެވެ.

އޭގެ އިތުރުން ބައިޑަން ވަނީ ތާވާލުކުރެވިފައިވާ ގޮތަށް އޮގަސްޓު 31ގެ ނިޔަލަށް އަފްޣާނުގައި ތިބި އެމެރިކާ ސިފައިން ބޭލުމުގައި ޠާލިބާނުންގެ ފަރާތުން އެއްބާރުލުން ބޭނުންވާނެ ކަމަށް ވިދާޅުވެފައެވެ. އެގޮތުން އަފްޣާނިސްތާނުން ފައިބަން ބޭނުންވާ ފަރާތްތަކަށް ފަސޭހައިން އެގައުމުން ފޭބޭނެ މަގު ޠާލިބާނުން ފޯރުކޮށްދޭން ޖެހޭނެ ކަމަށާއި އެއަރޕޯޓުތަކުން ދަތިކަމެއް ނެތި ފުރޭނެ އިންތިޒާމުތައް ހަމަޖައްސައިދޭން ޖެހޭނެ ކަމަށް ވަނީ ވިދާޅުވެފައެވެ. އަދި ބޭނުން ޖެހިއްޖެ ހާލަތެއްގައި ސުންގަޑި އިތުރުކުރަން ވާންޖެހޭ ތައްޔާރީތައްވެގެން ތިބުމަށް އަންގާފައިވާނެ ކަމަށްވެސް ބައިޑަން ވަނީ ވިދާޅުވެފައެވެ.

ބައިޑަން ވަނީ އަމާޒަކީ ވީހާވެސް އަވަހަކަށް އަފްޣާނިސްތާނުގައި ހަރަކާތްތެރިވަމުންދާ އެމެރިކާ ސިފައިން އެގައުމުން ބޭލުން ކަމަށް ވިދާޅުވެ، އެމެރިކާ ސިފައިން އަފްޣާނުގައި ހޭދަކުރާ ކޮންމެ ދުވަހަކީ ސިފައިން ނުރައްކަލުގެ ތެރެއަށް ހުށަހެޅޭ ދުވަހެއް ކަމަށް ވިދާޅުވެފައެވެ.

އަންގާރަ ދުވަހުގެ ހެނދުނުގެ ވަގުތެއްގައި ކުރިއަށްދިޔަ ޖީ7 ގައުމުތަކުގެ ބައްދަލުވުމުގައި ވެސް ބައިޑަން ވަނީ މި ވާހަކަތައް މިގޮތަށް ދައްކަވައި، އެމެރިކާގެ ސިފައިން އަފްޣާނިސްތާނުން ފޭބުމުގެ މަސައްކަތްތައް ހުއްޓުމެއްނެތި ކުރިއަށްދާ ކަމަށް ވިދާޅުވެފައެވެ.

އޮގަސްޓު 31 ވަނަ ދުވަހުގެ ނިޔަލަށް އަފްޣާނުގައި ތިބި އެމެރިކާ ސިފައިން އެގައުމުން ނުފައިބައިފި ކަމަށް ވާނަމަ އޭގެ ބަދަލު ވައިޓްހައުސަށް އަންނާނެ ކަމުގެ އިންޒާރު ޠާލިބާނުން ދިނުމާ ގުޅިގެން އެމެރިކާގެ ނެޝަނަލް ސެކިއުރިޓީގެ އެޑްވައިޒަރު ޖޭކް ސަލިވަން ވަނީ އެގައުމުގެ ސިފައިން އަފްޣާނުން ފައިބާނެ ތާރީޚެއް ކަނޑައަޅުއްވާނީ ރައީސް ޖޯ ބައިޑަން ކަމަށް ވިދާޅުވެ އެނިންމުން އެހެން އެއްވެސް ފަރާތަކަށް ނުނިންމޭނެ ކަމަށް ވިދާޅުވެފައެވެ.

އެމެރިކާގެ ހުރިހާ ސިފައިން އެގައުމުން ފައިބާނީ އަފްޣާނުުގައި ތިބި އެމެރިކާގެ ހުރިހާ ރައްޔިތުން ސަލާމަތްކަމާއެކު އެގައުމުން ފޭބުމުން ކަމަށާއި އޮގަސްޓު 31ގެ ނިޔަލަށް އެކަން ނުކުރެވިއްޖެ ނަަމަ ހުރިހާ ރައްޔިތުން އެގައުމުން ބޭލެންދެން ސިފައިން އަފްޣާނުގައި ހަރަކާތްތެރިވަމުންދާނެ ކަމަށް ބައިޑަން ވަނީ މީގެ ކުރިން ވިދާޅުވެފައެވެ.