މި ރާއްޖޭގައި އެހެން ދީނަކަށް ޖާގައެއް ނެތްކަމަށާއި، އިސްލާމް ދީން ހިމާޔަތް ކުރެއްވުމަށް ކުރައްވަން ޖެހިވަޑައިގެންނެވި ކޮންމެ ކަމެއް ރައީސުލްޖުމްހޫރިއްޔާ ކުރައްވާނެކަމުގެ ޔަގީންކަން އެބައޮތް ކަމަށް ދިއްގަރު ދާއިރާގެ މެމްބަރު އިކްރާމް ޙަސަން ވިދާޅުވެއްޖެއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި އިކްރާމް މިހެން ވިދާޅުވީ، އިސްލާމްދީނަށް ފުރައްސާރަކުރުމަކީ ކުށެއްކަމަށް ކަނޑައެޅުމަށް ޤާނޫނުލްޢުޤޫބާތަށް ހުށަހެޅި އިސްލާހާ ގުޅޭގޮތުން ދެއްކެވި ވާހަކައިގައެވެ. އިކްރާމް ވިދާޅުވީ، ރައީސް ރާއްޖޭގައި އެހެން ދީނަކަށް ފުރުސަތު ނުދެއްވާނެކަން ދޭހަވާ ކަމަކީ، މިހާތަނަށް 6 ޕަބްލިކް ސްޕީޗެއްގައި 8 ފަހަރު މަތިން މިވާހަކަ ރައީސް ތަކުރާރުކުރައްވާފައިވާތީ ކަމަށެވެ.

އިކްރާމް ވިދާޅުވީ، މުވާސަލާތީ ވަސީލަތް ނުވަތަ އެހެން ވަސީލަތެއް މެދުވެރިކޮށްވެސް އިސްލާމް ދީނަށް ތައުހީނު ކުރުމަކީ ކުށެއް ކަމަށް ކަނޑައެޅުމަށް ތާއީދު ކުރައްވާ ކަމަށާއި، ރާއްޖޭގެ މިއަދު ހާލަތަށް ބަލާއިރު، ދީނުގެ ނަމުގައި ހަރުކަށި ފިކުރުގެ ފަރާތްތައްވެސް އުޅޭކަން ގަބޫލުކުރަން ޖެހޭ ކަމަށެވެ. ނިޒާމު ހަރުދަނާ ކުރުމަށް ހުރިހާ އެންމެންވެސް އެއްބާރުލުން ދޭން ޖެހޭ ކަމަށާއި، އެ ނިޒާމުގެ ތެރެއިން ކަންކަން ކުރުމަށް އެއްބާރުލުން ދޭން ޖެހޭ ކަމަށެވެ.

އިންސާފު އެމީހުންގެ އަތްމައްޗަށް ނަގައި ހުކުމް ކުރާ އަމަލު ތަކަކީ، ގައުމުގެ މަސްލަހަތު ގެއްލިގެން ހިގައިދާނެ އަމަލުތަކެއް ކަމަށާއި, އެކަމުގެ ސަބަބުން މުޖުތަމަޢަށް ގެއްލުންވާނެކަން ގަބޫލު ކުރަން ޖެހޭ ކަމަށް އިކްރާމް ވިދާޅުވިއެވެ.

ސަރުކާރު ފެއިލްވާކަމަށް ބައެއް މެމްބަރުން ވިދާޅުވަމުން ގެންދެވި ނަމަވެސް ހަގީގަތަކީ، ގައުމު ހަމަމަގުގައި ކުރިއަށް ގެންދެވުމަށް ރައީސް ކުރައްވާ މަސައްކަތްޕުޅުތައް, ބަލައިލި ކޮންމެ ދިމާއަކުންވެސް ފެންނަން ހުރިކަން ކަމަށާއި، އެއީ ފާހަގަކޮށްލެވޭ މަސައްކަތްޕުޅުތަކެއް ކަމަށް އިކްރާމް ވިދާޅުވިއެވެ.  

އިސްލާމްދީނަށް ފުރައްސާރަކުރުމަކީ ކުށެއްކަމަށް ކަނޑައެޅުމަށް ޤާނޫނުލްޢުޤޫބާތަށް ހުށަހެޅި އިސްލާހު ބަލައިގަނެ، އެ ބިލު ދިރާސާކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް މިހާރުވަނީ ފޮނުވާފައެވެ.