ޗާޑްގެ ކުރީގެ ރައީސް ހިސީން ހަބްރީ އަވަހާރަވެއްޖެއެވެ.
ހަނގުރާމައިގެ ޙާލަތުގައި ހިންގާފައިވާ އެކި ޖަރީމާތަކާއި ލާއިންސާނީ އަމަލުތަކުގެ ސަބަބުން އެކަމުގެ ކުށް ސާބިތުވެ ސެނެގަލްގައި އުމުރު ދުވަހުގެ ޖަލު ޙުކުމެއް ތަންފީޒު ކުރައްވަމުން ގެންދަވަނިކޮށް ހިސީން އަވަހާރަވެފައިވަނީ އަންގާރަ ދުވަހުގެ ވަގުތެއްގައެވެ. އޭނާ އަވަހާރަވީއިރު އުމުރުފުޅުން 79 އަހަރެވެ. ހިސީން އަވަހާރަވެފައިވާކަން ސެނެގާލްގެ ޖަސްޓިސް މިނިސްޓްރީއާ ޙަވާލާދީ ބޭރުގެ ނޫސްތަކުން ވަނީ ރިޕޯޓު ކޮށްފައެވެ.
ޗާޑްގެ އަސްކަރީ ސަރުކާރުގެ އިސް ވެރިޔާ މަހަމަތު އިދްރީސް ދޭބީ ވަނީ ހަބްރީގެ އާއިލާއަށް ތަޢުޒިޔާ ވިދާޅުވެފައެވެ.
އަލްޖަޒީރާގައި ރިޕޯޓު ކޮށްފައިވާ ގޮތުން ހަބްރީ އަވަހާރަވިއިރު ގެންދެވީ ކޮވިޑް-19އަށް ފަރުވާ ހޯއްދަވަމުންނެވެ.
ހަނގުރާމައިގެ ޙާލަތުގައި ހިންގާފައިވާ އެކި ޖަރީމާތަކާއި ލާއިންސާނީ އަމަލުތަކުގެ ސަބަބުން އެކަމުގެ ކުށް ސާބިތުވެ ހަބްރީގެ މައްޗަށް އުމުރު ދުވަހުގެ ޖަލު ޙުކުމެއް އިއްވީ 2016 ވަނަ އަހަރުއެވެ.
